سيد مراد علي شاهه سنڌ ڪرافٽ فيسٽيول 2025ع جو افتتاح ڪري ڇڏيو

ڪراچي-28 نومبر (اي پي پي)سنڌ جي وڏي وزير سيد مراد علي شاهه جمعي ڏينهن پورٽ گرائونڊ ۾ سنڌ ڪرافٽ فيسٽيول 2025 جو افتتاح ڪيو جيڪو صوبي جي شاهوڪار ثقافتي ورثي، روايتي هنر ۽ فنڪارن جي مهارت جو جشن آهي۔ ٻه ڏينهن جاري رهندڙ هي فيسٽيول جنهن جو اهتمام ثقافت کاتي حڪومتِ سنڌ ڪيو آهي، 30 نومبر تائين جاري رهندو۔ وڏي وزير جو آڌرڀاءُ صوبائي وزير ثقافت سيد ذوالفقار علي شاهه، سيڪريٽري ثقافت خير محمد ڪلهوڙو ۽ ٻين اعليٰ عملدارن ڪيو۔ مراد علي شاهه ربن ڪاٽي فيسٽيول جو افتتاح ڪيو ۽ 100 کان وڌيڪ اسٽالن جو دورو ڪري دستڪارن سان مليو ۽ انهن جي ڪم کي ساراهيو۔ تقريب کي خطاب ڪندي هن چيو سنڌ جي ثقافت ۽ فنون اسان جي سڃاڻپ آهن۔ سنڌ ڪرافٽ فيسٽيول اسان جي صدين پراڻي ورثي، مقامي فنڪارن جي تخليقي صلاحيتن ۽ خاص طور تي عورتن جي هنر کي اجاگر ڪرڻ لاءِ بهترين پليٽ فارم آهي۔ فيسٽيول ۾ ٻين صوبن جا به هٿ جا هنر رکيل آهن۔