پاڪستان جو اصل بنياد انهن جي ننڍن شهرن ۽ پٺتي پيل علائقن ۾ آهي: يوسف رضا گيلاني

ملتان-24 نومبر (اي پي پي)سينيٽ چيئرمين سيد يوسف رضا گيلاني چيو آهي ته پاڪستان جو اصل بنياد ان جي ننڍن شهرن ۽ پُٺتي پيل علائقن ۾ آهي، ڏکڻ پنجاب سميت سڄي ملڪ جي پُٺتي پيل ۽ ننڍن علائقن جي تعمير ۽ ترقيءَ ۾ هر ممڪن ڪردار ادا ڪندو رهندس. اهڙو اظهار هن ڪالهه هتي نجي اُڏام جي شروعات جي اعلان واري تقريب ۾ خاص مهمان طور خطاب ڪندي ڪيو. سيد يوسف رضا گيلاني چيو ته هي منهنجي لاءِ خوشي ۽ اعزاز جي ڳالهه آهي ته اڄ مان نجي اُڏام جي شروعات جي اعلان جي اهم موقعي تي اوهان جي وچ ۾ موجود آهيان. مان نجي اُڏام جي پوري قيادت جو شڪريو ادا ڪريان ٿو جن ان بامقصد تقريب ۾ مون کي گُهرايو. هن چيو ته اڄ جي تقريب صرف هڪ نئين اُڏام جي شروعات جو اعلان ناهي پر پاڪستان ۾ علائقائي رابطن، معاشي شموليت ۽ بهتر سفري سهولتن طرف هڪ اهم اڳڀرائي آهي. سينيٽ چيئرمين نجي اُڏام جو قيام ان ڳالهه جو اظهار آهي ته جتي دورانديشي موجود هجي اتي ترقي جي راهه ضرور هموار هوندي آهي. سيد يوسف رضا گيلاني چيو ته ننڍن شهرن ۽ ڏورانهن علائقن تائين بهتر رسائي پاڪستان جي پُراڻي ضرورت هئي ۽ مون کي خوشي آهي ته نجي اُڏام جو هي منصوبو ان خال کي ڀرڻ لاءِ هڪ ٺوس قدم ثابت ٿيندو. سيد يوسف رضا گيلاني وڌيڪ چيو ته منهنجي سياسي سفر ۾ چاهي هو پارليامينٽ جو ميمبر هجي، اسپيڪر هجي يا وزيراعظم يا اڄ سينيٽ جي چيئرمين طور هڪ ڳالهه مون هميشه محسوس ڪئي ته پاڪستان جو اصل بنياد ان جي ننڍن شهرن ۽ پُٺتي پيل علائقن ۾ آهي. ڏکڻ پنجاب، اندرونِ سنڌ، بلوچستان ۽ ڪي پي ڪي جا اهي خطا جيڪي سالن کان ترقيءَ جا منتظر رهيا آهن اڄ نجي اُڏام جي ان منصوبي سان ملڪي ترقيءَ جي مرڪزي ڌارا ۾ شامل ٿي رهيا آهن. سائوٿ ايئر ان عمل کي وڌيڪ مضبوط بڻائيندي ۽ عوام ڪاروبار، تعليم، صحت ۽ خدمتن تائين رسائيءَ کي بهتر بڻائي قومي يڪجهتيءَ ۾ پنهنجو ڪردار ادا ڪندي. هن چيو ته ملتان هميشه منهنجي دل جي ويجهو رهيو آهي. هي شهر صرف ڏکڻ پنجاب جو مرڪز نه پر تهذيب، محبت ۽ خدمت جو شهر آهي، هتي جي ماڻهن هميشه پنهنجي محنت ۽ خلوص سان ثابت ڪيو آهي ته جيڪڏهن موقعو فراهم ڪيو وڃي ته هي خطو ملڪ جو روشن مستقبل بڻجي سگهي ٿو. ملتان مان سائوٿ ايئر جي شروعات ان اعتماد جو اظهار آهي ته ملتان ۽ ڏکڻ پنجاب اڳتي وڌڻ لاءِ تيار آهن ۽ پنهنجي ترقي جا رُخ پاڻ طئي ڪرڻ جي صلاحيت رکن ٿا. هن چيو ته ايگزيڪيوٽو ڊائريڪٽر ايس او ايس گروپ ڪنور طارق جي خدمتن کي ساراهيان ٿو، جنهن پنهنجي ويزن ۽ قيادت سان هڪ چئلينجنگ منصوبي کي عملي جامو پارايو. اهڙيءَ طرح سي اي او نجي اُڏام نشاط فاطمه جي سربراهي هن ملڪ لاءِ هڪ تاريخي لمحو آهي. هي نه صرف ڏکڻ پنجاب پر پوري پاڪستان لاءِ فخر جي ڳالهه آهي ته ڪنهن فضائي ڪمپني جي پهرين ڀيرو قيادت هڪ عورت وٽ آهي ان جي پيشيوراڻي قابليت ۽ انتظامي بصيرت ان منصوبي جو بنياد آهن.