ٽيڪس، توانائي جي قيمتن ۽ بين الصوبائي واپار ۾ سڌارن جا مثبت نتيجا ظاهر ٿي رهيا آهن:خرم شهزاد

ڪراچي- 29 آڪٽوبر (اي پي پي) ناڻي واري وزير جي صلاحڪار خرم شهزاد چيو آهي ته ٽيڪس، توانائي جي قيمتن ۽ بين الصوبائي واپار ۾ سڌارن جا هاڪاري نتيجا هاڻي ظاهر ٿي رهيا آهن، انٽرنيٽ جي پهچ 60 سيڪڙو کان وڌائي 80 سيڪڙو تائين وڌائي ويندي جنهن سان جامع ڊجيٽل معيشت جو بنياد فراهم ٿيندو، نجي شعبو ڊجيٽل معيشت کي اختيار ڪرڻ ۽ روانگي واپار جي ترقي کي هٿي ڏيڻ ۾ پنهنجو ڪردار ادا ڪري. اهڙو اظهار هن ڪراچي ۾ منعقد پنجين پاڪستان فيوچر آف ريٽيل بزنس سمٽ اينڊ ايڪسپو جو افتتاح ڪندي ڪيو. هن سال تقريب جو موضوع ”تبديل ٿيندڙ دور ۾ ريٽيل: پاڪستان جي واپار ۾ مضبوطي جي تعمير“ هو. خاص مهمان طور افتتاحي اجلاس کي خطاب ڪندي خرم شهزاد حڪومت جي جامع سڌارن واري ايجنڊا کي اجاگر ڪيو جنهن جو مقصد معيشت کي مستحڪم ڪرڻ، ٽيڪس نيٽ کي وسيع ڪرڻ، ڊجيٽل شموليت کي هٿي ڏيڻ ۽ ڪيش ليس معيشت طرف منتقلي کي تيز ڪرڻ آهي. هن چيو ته حڪومت جون پاليسيون شفاف، دستاويزي ۽ ترقي تي ٻڌل معيشت جي قيام لاءِ ٺاهيون ويون آهن، جيڪي ڪاروباري اعتماد، صنعتي بحالي ۽ ڊگهي مدي واري سيڙپڪاري کي هٿي ڏينديون. هن ٻڌايو ته حڪومت جي ڪيش ليس منتقلي ٽن بنيادي ٿنڀن تبديلي، شموليت ۽ اختيار تي ٻڌل آهي، وفاقي، صوبائي ۽ مقامي سطح تي سرڪاري نقد ڏي وٺ کي ڊجيٽل چئنلز ۾ منتقل ڪرڻ، سمورن شهرين خاص ڪري عورتن ۽ غير بئنڪ شده طبقن کي مالي خدمتن تائين پهچ ڏيڻ ۽ ڪاروبارن، سرڪاري ادارن ۽ صارفين وچ ۾ ڊجيٽل ادائيگين جي استعمال کي هٿي ڏيڻ ان جي بنيادي مقصدن ۾ شامل آهن، هي ٿنڀ شفافيت، احتساب ۽ مالياتي نظام تي اعتماد کي هٿي ڏيڻ ۾ اهم حيثيت رکن ٿا. هن ٻڌايو ته انهن قدمن ۾ جون 2026ع تائين ماهوار فعال راست ڪيو آر مرچنٽس جو انگ 5 لک کان وڌائي 20 لک تائين ڪرڻ، ساليانو ڊجيٽل ٽرانزيڪشنز کي 7.5 ارب کان 15 ارب تائين ڪرڻ ۽ ڊسمبر 2026ع تائين حڪومت جون سموريون ادائيگيون (حڪومت کان عوام ۽ عوام کان حڪومت تائين) مڪمل طور تي ڊجيٽل بڻائڻ شامل آهن.