توانائي واري صوبائي وزير سيد ناصر حسين شاهه پاران  ٿرڪول بلاڪ ون ۽ بلاڪ ٽو جو دورو

ٿرپارڪر -09 آگسٽ (اي پي پي) توانائي واري صوبائي وزير سيد ناصر حسين شاهه ٿرڪول بلاڪ ون ۽ بلاڪ ٽو جو دورو ڪيو. صوبائي وزير دوري دوران پاور پلانٽس ۽ ڪول مائيننگ جو تفصيلي جائزو ورتو. ان موقعي تي ٿرڪول انتظاميه تفصيلي بريفنگ پڻ ڏني. ان موقعي تي ملڪ جي انرجي سيڪيورٽي ۽ جامع ترقي لاءِ کنيل قدمن جي تعريف ڪئي وئي، صوبائي وزير  چيو ته جلد ٿرڪول تي ڪول گيسيفيڪيشن شروع ڪري فرٽيلائيزرز جا پلانٽ لڳايا ويندا. سيد ناصر حسين شاهه سنڌ اينگرو ڪول مائيننگ ڪمپني طرفان ٿر فائونڊيشن ذريعي مائيننگ آپريشنز ۽ شموليتي ترقي جي عزم جي تعريف ڪئي. ايس اي سي ايم سي کي پاڪستان جي کاڻين کوٽڻ واري شعبي ۾ هڪ علمبردار، سنڌ حڪومت، اينگرو ۽ ٻين لاڳاپيل ادارن وچ ۾ ملڪ جي سڀ کان ڪامياب پبلڪ پرائيويٽ پارٽنرشپ طور وڏي پئماني تي سڃاتو ويندو آهي.  ٿر بلاڪ ٽو جي دوري دوران صوبائي وزير سان گڏ ايم اين اي ڊاڪٽر مهيش ڪمار ملاڻي، ايم اين اي ڊاڪٽر رميش لعل، وڏي وزير جو ماحوليات بابت صلاحڪار دوست علي راهمون، ايم پي اي فقير شير محمد بلالاڻي، ايم ڊي ٿرڪول انرجي بورڊ طارق شاهه، ڪمشنر ميرپورخاص، ايس ايس پي ٿرپارڪر، ايس اي سي ايم سي جون اختياريون ۽ ٻيا حڪومتي ۽ چونڊيل نمائنده به هئا. وفد کي پاڪستان جي انرجي مڪس ۾ مقامي ڪوئلي جي اسٽريٽجڪ ڪردار ۽ ٿر بلاڪ ٽو جي ترقي ۾ سنڌ حڪومت جي مسلسل تعاون بابت ٻڌايو ويو. ان ڳالهه تي به روشني وڌي وئي ته ايس اي سي ايم سي پنهنجي فيز ٿري جي کاڻ جي توسيع جي شروعات ڪئي آهي ته جيئن ڪوئلي جي پيداواري صلاحيت کي 76 لک ٽن ساليانو مان وڌائي هڪ ڪروڙ 14 لک ٽن ڪري سگهجي، جنهن سان روزانو 45 لک گهراڻن کي توانائي ملي سگهندي.