واپار وارو وفاقي وزير ڄام ڪمال خان برطانيه جي اهم سرڪاري دوري تي روانو

اسلام آباد- 13 جولاءِ (اي پي پي) واپار وارو وفاقي وزير ڄام ڪمال خان 6 ڏينهن جي سرڪاري دوري تي برطانيه روانو ٿي ويو. واپار وارو سيڪريٽري جواد پال به ساڻس گڏ آهي. واپار واري  وزارت طرفان جاري ڪيل پڌرائي مطابق واپار وارو وفاقي وزير ڄام ڪمال خان برطانيه جي 6 ڏينهن جي سرڪاري دوري تي برطانيه روانو ٿي ويو، هن جو دورو 14 جولاءِ کان 20 جولاءِ تائين رهندو، جنهن جو مقصد ٻطرفي واپاري لاڳاپن کي هٿي ڏيڻ، اداره جاتي فريم ورڪ کي مضبوط بڻائڻ ۽ پاڪستان ۽ برطانيه وچ ۾ واپار ۽ سيڙپڪاري لاءِ نيون راهون کولڻ آهي. دوري دوران پاڪستان ۽ برطانيه واپاري ڳالهين لاءِ ٽرمز آف ريفرنس(ٽي او آرز) تي صحيحون ٿينديون، جيڪي ٻطرفي واپاري سهڪار کي اداره جاتي بڻائڻ، ٻنهي ملڪن وچ ۾ اقتصادي لاڳاپن ۾ اضافو ۽ شفافيت طرف هڪ اهم قدم آهن. دوري دوران وفاقي وزير آل پارٽيز پارلياماني گروپ(اي پي پي جي) جي ميمبرن سان به ملاقات ڪندو ۽ واپار ۽ سيڙپڪاري کي وڌائڻ ۾ مضبوط سياسي حمايت جي وڪالت ڪندو. انهن ملاقاتن جو مقصد پارلياماني ڪوششن کي پاڪستان جي وسيع تر اقتصادي سفارتڪاري جي هدفن سان هم آهنگ ڪرڻ ۽ ڊگهي مدي واري حصيداري کي مضبوط بڻائڻ آهي. دوري دوران وزير ٿارت لنڊن ۽ برمنگهم ۾ چيمبرز آف ڪامرس سان ملاقاتون ڪندو، ٻطرفي واپار کي وڌائڻ  ۾ نجي اسٽيڪ هولڊرز جي فعال ڪردار کي اجاگر ڪندو. ان کانسواءِ ڄام ڪمال خان فوڊ پروسيسنگ، انفارميشن ٽيڪنالاجي، انجينئرنگ، فن ٽيڪ ۽ ڪيپٽل انويسٽمنٽ سميت ٻين اهم شعبن سان لاڳاپيل برطانيه ۾ قائم ملٽي ملين ڊالر ڪمپينن سان ڳالهه ٻولهه ڪندو. انهن ملاقاتن جو مقصد پاڪستان جي اقتصادي صلاحيت کي اجاگر ڪرڻ ۽ اعليٰ ترقي جي صنعتن ۾ سيڙپڪاري کي راغب ڪرڻ آهي. ان دوري ۾ يو ڪي پاڪستان بزنس ڪائونسل، پاڪستان برٽين بزنس ڪائونسل ۽ يو ڪي پاڪستان چيمبر آف ڪامرس اينڊ انڊسٽري سان اهم ملاقاتون به شامل آهن. اهي ملاقاتون اداره جاتي واپاري رابطن کي مضبوط بڻائڻ ۽ يو ڪي جي مارڪيٽ ۾ واپاري ڳاڻيٽي کي وڌائڻ لاءِ ڪاروباري برادري جي قيادت ۾ قدمن مان فائدو کڻڻ تي ٻڌل آهن. اهو دورو پاڪستان جي اقتصادي سفارتڪاري کي هٿي ڏيڻ، روانگي واپاري مارڪيٽن کي جديد بڻائڻ ۽ برطانيه جهڙي عالمي مارڪيٽ ۾ پنهنجي واپاري قدمن کي مضبوط ڪرڻ جي ڪوششن ۾ هڪ نئين جوهر جي نشاندهي ڪرڻ آهي.