باڪو – 14 آڪٽوبر (اي پي پي) وزيراعظم محمد نواز شريف آذربائيجان جي صدر الهام عليوف سان وسيع ٻه طرفي لاڳاپن جي باري ۾ خيالن جي ڏي وٺ ڪئي جنهن ۾ ٻنهي اڳواڻن ملڪ جي وچ ۾ مضبوط اقتصادي ۽ سيڙپڪاري رابطا هموار ڪرڻ تي زور ڏنو. وفدن جي سطح تي ڳالهين کان اڳ نويڪلائي ۾ ملاقات ۾ وزيراعظم پاڪستان ۽ آذربائيجان جي وچ ۾ دوستي ۽ تعاون جي موجوده رشتن کي واپار ۽ سيڙپڪاري جي نئين رابطن ۾ منتقل ڪرڻ جي خواهش جو اظهار ڪيو. هن آذربائيجان جي صدر کي پنهنجي حڪومت جي توانائي، بنيادي ڍانچي ۽ بجلي جي منصوبن جي باري ۾ آگاهه ڪيو جيڪو 46 ارب ڊالر لاڳت جي پاڪ چين اقتصادي راهداري تحت مڪمل ڪيا پيا وڃن ۽ ان سان وچ ايشيائي رياستن جي سيڙپڪارن جي لاءِ به سيڙپڪاري جا بي شمار موقعا موجود آهن.
