دبئي – 13 فيبروري (اي پي پي) ورلڊ گورنمينٽ سمٽ ۾ شريڪ مختلف ملڪن جي خابرو ادارن جي سربراهن 6 نقاطي پڌرنامي تي صحيحون ڪندي انسانيت جي خدمت ۽ ڀلائي، تيز تر ترقي ۽ جديد اقتصاديات جي جوڙجڪ ۾ معاونت جي لاءِ ميڊيا جي ميدان ۾ نئين ٽيڪنالاجيز جي فروغ ۽ جدت رکندڙ ذريعا استعمال ۾ آڻڻ جي ضرورت کي اجاگر ڪيو آهي. ورلڊ گورنمينٽ سمٽ ۾ مختلف ملڪن جي خابرو ادارن جي نمائندن شرڪت ڪئي جيڪا دبئي، گڏيل عرب امارات ۾ 11 کان 13 فيبروري تي ٿي. قومي خابرو اداري ايسوسيئيٽيڊ پريس آف پاڪستان (اي پي پي) جي مئنيجنگ ڊائريڪٽر مسعود احمد ملڪ ڪانفرنس ۾ پاڪستان جي نمائندگي ڪئي ۽ اي پي پي پاران نيوز ايجنسين جي پڌرنامي تي صحيحون ڪيون. خابرو اداري جي نمائندن سربراهه ڪانفرنس جي بنيادي موضوعن جي اهميت ۽ عالمي افهام تفهيم جي فروغ جي ضرورت سان گڏوگڏ معاشري، ان جي ادارن، ميمبرن ۽ ميڊيا جي پيشي جي ذميوارين جي ادراڪ کي اجاگر ڪرڻ جي لاءِ ورلڊ گورنمينٽ سمٽ 2018ع ۾ شريڪ نيوز ايجنسين جي پڌرنامي تي صحيحون ڪرڻ جو فيصلو ڪيو.
