اسلام آباد – پهرين ڊسمبر (اي پي پي) اطلاعات ۽ نشريات واري مملڪتي وزير مريم اورنگزيب پشاور ۾ زرعي ڊائريڪٽوريٽ تي دهشتگرداڻي حملي جي شديد مذمت ڪندي چيو آهي ته شاگردن کي نشانو بڻائيندڙ اسان جي نوجوان نسل کي ڊيڄارڻ چاهين ٿا پر دهشتگرد ڄاڻي وٺن ته انهن کي ان جي ناپاڪ ارادن ۾ شڪست ڏينداسين. جمعي ڏينهن هتي جاري بيان ۾ مملڪتي وزير چيو ته پوري قوم دهشتگردي جي خلاف متحد ۽ ان ناسور کي پاڙ کان پٽي اڇلڻ جي لاءِ پرعزم آهي. هن چيو ته پاڪستان جي هٿياربند فوج، پوليس ۽ قانون لاڳو ڪندڙ ادارن کي خراج تحسين پيش ڪريون ٿا جنهن جرئت ۽ بهادري جو مظاهرو ڪندي دهشتگردن جو خاتمو ڪيو ۽ يرغمال ماڻهن کي بازياب ڪرايو. مملڪتي وزير قيمتي انساني جانين جي ضايع ٿيڻ تي گهري ڏک ۽ افسوس جو اظهار ڪيو، هن متاثر خاندانن سان دلي همدردي، شهيدن جي بلند درجن ۽ زخمين جي جلد صحتيابي جي دعا ڪئي
