سوچي – پهرين ڊسمبر (اي پي پي) وزيراعظم شاهد خاقان عباسي چيو آهي ته شنگهائي تعاون تنظيم امن، استحڪام، گڏيل رابطن ۽ پائيدار ترقي لاءِ ڪم ڪري رهي آهي، جنهن جي مڪمل ميمبرشپ پاڪستان لاءِ اعزاز جي ڳالهه آهي، شنگهائي تعاون تنظيم جي حڪومتي سربراهن جي ڪائونسل جي اجلاس کي خطاب ڪندي هن چيو ته ايس سي او هڪ اهڙي تنظيم آهي جيڪا گڏيل رابطن، واپار، توانائي ۽ اقتصادي ترقي جي حوالي سان ڪم جي وسيع تر صلاحيت رکندڙ آهي. هن چيو ته هي تنظيم پوري خطي جي ترقي ۽ خوشحالي لاءِ مددگار ثابت ٿي سگهي ٿي ۽ پاڪستان تنظيم کي وڌيڪ فعال بڻائڻ ۾ پنهنجو ڪردار ادا ڪندو. وزيراعظم شاهد خاقان عباسي چيو ته پاڪستان جي صارف مارڪيٽ جو ماپو 20 ڪروڙ کان وڌيڪ ماڻهن تي مشتمل آهي جتي وسيع ڪاروباري موقعن ۽ جديد ترين بنيادي ڍانچي جون سهولتون به دستياب آهن. هن چيو ته پاڪستان ايس سي او جي ميمبر جي طور تي گڏيل رابطن ۽ تعاون جي فروغ لاءِ پنهنجو ڪردار ادا ڪندو رهندو.
