اسلام آباد – 03 مئي (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته حڪومت ميڊيا ورڪرز جي لاءِ محفوظ ۽ سازگار ماحول جوڙڻ ذريعي اظهار راءِ جي آزادي کي مستحڪم بڻائڻ جي لاءِ ڪوششون ڪري رهي آهي، صحافت جي عالمي ڏينهن جي موقعي تي پنهنجي پيغام ۾ مملڪتي وزير چيو ته صحافت جي عالمي ڏينهن کي اسان آزاد صحافت جي عزم سان ملهائي رهيا آهيون، اسان جو هي قومي يقين آهي ته آزاد ۽ متحرڪ ميڊيا نه رڳو معاشري ۾ امن ۽ انصاف جي لاءِ ضروري آهي پر هي گڏيل قومن طرفان پائيدار ترقي جا هدف حاصل ڪرڻ ۾ به مددگار آهي جيڪا دنيا ۾ هڪ ذميدار ملڪ جي حيثيت سان اسان جي ذميداري آهي.
