اسلام آباد – 10 اپريل (اي پي پي) اطلاعات، نشريات ۽ قومي ورثي واري مملڪتي وزير مريم اورنگزيب چيو آهي ته آڊٽ بيورو آف سرڪيوليشن جي نظام کي ڪمپيوٽرائيزڊ ڪرڻ ۽ آٽوميشن جو نظام متعارف ڪرائڻ سان اخباري صنعت ۾ بهتري اچڻ سان گڏوگڏ شفافيت ۽ گڊ گورننس کي يقيني بڻائڻ ۾ پڻ مدد ملندي. اهڙن خيالن جو اظهار هن صحافي تنظيمن سميت وفاقي ۽ صوبائي اطلاعات کاتن جي آفيسرن تي ٻڌل مشاورتي اجلاس کي خطاب ڪندي ڪيو. هن چيو ته آڊٽ بيورو آف سرڪيوليشن جي ڪمپيوٽرائيزيشن ۽ آٽوميشن جو عمل سمورين ڌرين جي مفاد ۾ هوندو. هن چيو ته جديد ٽيڪنالاجي جي ثمرن سان علائقائي ۽ مقامي اخبارون پڻ فائدو کڻي سگهن ٿيون. مملڪتي وزير چيو ته آٽوميشن جو بنيادي مقصد اخبارن جي سرڪيوليشن جي انگن اکرن کي آن لائن ڪرڻ آهي جنهن سان نه رڳو ميڊيا جي صنعت ۾ بهتري ايندي پر ان سان شفافيت ۽ گڊ گورننس کي پڻ يقيني بڻائڻ ۾ مدد ملندي.
