اسلام آباد – 30 – نومبر (اي پي پي) وفاقي ڪابينا کي ٻڌايو ويو آهي ته ڪورونا جي نئين قسم اوميڪرون جي ڦهلاءُ جي شرح تمام تيز آهي، هفتيوار مهانگائي جي شرح ۾ گهٽتائي آئي آهي، پنجاب ۾ ذخيره اندوزن جي خلاف ڪارروائي کانپوءِ يوريا ڀاڻ جي قيمت ۾ 400 رپيا في ٻوري گهٽتائي آئي آهي، وفاقي ڪابينا تڪ اين اي 133 ۾ ضمني چونڊن دوران ووٽن کي پئسن سان خريد ڪرڻ جي مبينا وڊيو منظرعام تي اچڻ ۽ سنڌ ۾ ضرورت جي شين جي قيمتن ۾ اضافي تي ڳڻتي ظاهر ڪئي آهي. اجلاس ۾ افغانستان جي لاءِ 50 هزار ٽن ڪڻڪ جي امداد ۽ افغانستان جي صورتحال تي او آءِ سي ملڪن جي پرڏيهي وزيرن جو خصوصي اجلاس پاڪستان ۾ منعقد ڪرڻ جي منظوري ڏني وئي. وزيراعظم آفيس جي ميڊيا ونگ پاران جاري بيان موجب وزيراعظم عمران خان جي صدارت ۾ وفاقي ڪابينا جو اجلاس ٿيو. اجلاس ۾ منصوبابندي، ترقي ۽ سڌارن واري وفاقي وزير اسد عمر ڪورونا جي نئين قسم اوميڪرون جي حوالي سان ڪابينا کي بريف ڪيو. اجلاس کي ٻڌايو ويو ته اهو قسم ڏکڻ آفريقا کان شروع ٿيو آهي. شروعاتي اطلاعن جي بنياد تي ان جي ڦهلاءُ جي شرح تمام تيز آهي. ڪابينا عوام جي تحفظ جي لاءِ ماسڪ جي استعمال، سماجي فاصلي ۽ ويڪسي نيشن جي ترغيب ڏني. اجلاس ۾ اليڪٽرانڪ ووٽنگ مشين متعارف ڪرائڻ ۽ ٻاهرئين ملڪ پاڪستانين کي ووٽ جو اختيار ڏيڻ جي حوالي سان بريفنگ ڏني وئي. سائنس ۽ ٽيڪنالاجي واري وفاقي وزير سينيٽر شبلي فراز ووٽنگ مشينون حاصل ڪرڻ، عملي جي ٽريننگ، لاڳاپيل ادارن جي ذميوارين، عوامي آگاهي مهم ۽ مقرر وقت ۾ پهچ جي حوالي سان بريفنگ ڏني. ڪابينا تڪ اين اي 133 ۾ ضمني چونڊن دوران ووٽن کي پئسن سان خريد ڪرڻ جي مبينا وڊيو منظرعام تي اچڻ تي سخت ڳڻتي جو اظهار ڪيو. ڪابينا چيو ته اهڙي قسم جا غيرقانوني قدم جمهوريت جي منافي آهن. شفافيت کي نظر ۾ رکندي ڪابينا ڪورونا وبا جي لاءِ پئڪيج تي آڊٽ رپورٽ جي حوالي سان لاڳاپيل کاتن کي وضاحت ڏيڻ جي هدايت ڪئي. ناڻي واري صلاحڪار وفاقي ڪابينا کي ضرورت جي شين جي قيمتن جو تقابلي جائزو پيش ڪيو. هفتيوار مهانگائي جي شرح ۾ 0.67 سيڪڙو گهٽتائي آئي، 05 شين جي قيمتن ۾ گهٽتائي آئي آهي. ڪابينا کي ٻڌايو ويو ته خطي ۾ گيهه ۽ چانهه جي پتي جي قيمتن کانسواءِ ٻين سمورين گهريلو استعمال جي شين جون قيمتون پاڪستان ۾ گهٽ آهن. انهن شين ۾ اٽو، چڻا، دال ماش، دال مڱ، ٽماٽا، بصر، چڪن ۽ پيٽرول شامل آهي. ڪابينا کي ٻڌايو ويو ته اٽو، کنڊ، دال مڱ ۽ چڻن جي دال جي قيمت سنڌ ۾ ٻين صوبن جي مقابلي ۾ ڪافي وڌيڪ آهي. ڪابينا سنڌ ۾ ضرورت جي شين جي وڌندڙ قيمتن تي سخت ڳڻتي جو اظهار ڪيو. پيٽروليم ڊويزن ڪابينا کي ذيلي ادارن م ايم ڊي ۽ سي اي او جي خالي جاين جي حوالي سان بريفنگ ڏني. ڪابينا کي آگاهه ڪيو ويو ته هن وقت 4 جايون خالي آهن جن تي مقررين جو عمل جاري آهي. هوابازي واري وزارت جي سفارش تي ڪابينا ميسرز سرينا ايئر، ميسر ايئر بليو، ميسرز پي آءِ اي سي ايل ۽ ميسرز پرنڪلي جيٽس کي قومي هوابازي پاليسي 2019ع تحت هوابازي لائيسنس جي تجديد جي منظوري ڏني. ڪابينا هوابازي واري وزارت جي سفارش تي سول ايوي ايشن اٿارٽي رولز تحت هوائي اڏن جي ڀرپاسي ۾ قائم ڊگهين عمارتن جي حد مقرر ڪرڻ جي منظوري ڏني. اسلام آباد بليو ايريا ۾ عمارتن جي بلندي جي حد 1000 فٽ مقرر ڪئي وئي آهي. ان فيصلي سان شهرن جي حدن جي اجائي ڦهلاءُ کي روڪڻ، سرسبز کي بچائڻ ۽ زرعي زمين کي برقرار رکڻ ۾ پڻ مدد ملندي. ڪامرس واري وزارت جي سفارش تي ڪابينا تهران ۾ پاڪستاني سفارتخاني ۾ مقرر عملي کي هارڊشپ پاليسي تحت وطن واپسي تي ذاتي استعمال جون گاڏيون درآمد ڪرڻ جي اجازت ڏني. گهرو وزارت جي سفارش تي ڪابينا ٻاهرئين ملڪ مان تبليغي جماعت جي پاڪستان ايندڙ ماڻهن جي لاءِ ويزا جو مدو 120 ڏينهن مان وڌائي 150 ڏينهن ڪرڻ جي منظوري ڏني. ويزا آن لائين پورٽل ذريعي حاصل ڪري سگهبو. ڪابينا ايمپلائيز اولڊ ايج بينيفٽس انسٽيٽيوشن (اي او بي آئي) جي چيئرمين جي مقرري جي لاءِ طريقيڪار جي منظوري ڏني. اها مقرري چٽاڀيٽي عمل تحت مئنيجمينٽ پوزيشن اسڪيل پاليسي 2020ع تحت ڪئي ويندي. سمنڊ پار پاڪستانين واري وزارت جي سفارش تي ڪابينا اوورسيز ايمپلائمينٽ پروموٽر لائيسنسز جاري ڪرڻ جي منظوري ملتوي ڪري ڇڏي. ڪابينا هدايت ڪئي ته انهن پروموٽرز جي ڪم جو جائزو وٺڻ لاءِ طريقيڪار هڪ هفتي جي مدي ۾ ٺاهيو وڃي. ان ڳالهه جو خاص خيال رکيو وڃي ته پروموٽرز پاران ٻاهر ويندڙ ماڻهن کان ناجائز طور تي اضافي رقم وصول نه پئي ڪئي وڃي. ڪابينا اداراجاتي سڌارن باتب ڪميٽي جي 12 نومبر 2021ع تي ٿيل اجلاس ۾ ڪيل فيصلن جي توثيق ڪئي. اجلاس ۾ پاڪستان جيمز ۽ جيولري ڊيولپمينٽ ڪمپني جي نئين سر تنظيم سازي ڪرڻ جي سفارش ڪئي هئي. ڪابينا توانائي بابت ڪميٽي جي 18 نومبر 2021ع تي ٿيندڙ اجلاس ۾ ڪيل فيصلن جي توثيق ڪئي. توانائي بابت ڪميٽي گئس لوڊ مئنيجمينٽ پلان سردي جي موسم 22 – 2021ع ۽ ڪيماڙي ڪراچي ۾ تيل ڊپو قائم ڪرڻ جي سفارش ڪئي هئي. ملڪ ۾ نڪرندڙ گئس کي گهريلو صارفين جي لاءِ ئي مخصوص رکيو ويندو ڇو ته ان جي قيمت گهٽ هوندي آهي. سي اين جي سيڪٽر کي پهرين ڊسمبر 2021ع کان 15 فيبروري 2022ع تائين بند رکيو ويندو. آئي پي پيز ۽ ڀاڻ فيڪٽرين کي گئس جي فراهمي جاري رهندي. ايڪسپورٽ سيڪٽر جي صنعتن کي گئس جي فراهمي جاري رهندي. ايل اين جي تي هلندڙ پاور پلانٽس کي 5 سيڪڙو اضافي گئس فراهم ڪئي ويندي. سردين ۾ گهريلو صارفين جي لاءِ جون قيمتون گهٽ ڪيون ويون آهن ته جيئن گئس جي کوٽ کي پورو ڪري سگهجي. سي اين جي، سيمنٽ ۽ ڪيپيسٽو پاور کان بچندڙ گئس کي گهريلو صارفين جي لاءِ استعمال ڪيو ويندو. گئس بچت جي لاءِ عوامي آگاهي مهم هلائي پئي وڃي. اطلاعات ۽ نشريات واري وزارت جي سفارش تي ڪابينا آءِ ٽي اين اي جي چيئرمين ۽ پريس ڪائونسل آف پاڪستان جي چيئرمين جي مقررين جي لاءِ سليڪشن بورڊ قائم ڪرڻ جي منظوري ڏني. آءِ ٽي اين اي جي چيئرمين جي لاءِ سليڪشن بورڊ اطلاعات واري وزير، اطلاعات واري سيڪريٽري، اطلاعات واري ايڊيشنل سيڪريٽري، گريڊ 21 جي اسٽيبلشمينٽ ڊويزن ۽ قانون واري وزارت جي نمائندن تي ٻڌل هوندو. پريس ڪائونسل آف پاڪستان جي چيئرمين جي لاءِ سليڪشن بورڊ اطلاعات واري وزير، اطلاعات واري سيڪريٽري، اطلاعات واري ايڊيشنل سيڪريٽري، گريڊ 21 جي اسٽيبلشمينٽ ڊويزن ۽ قانون واري وزارت جي نمائندن تي ٻڌل هوندو. ڪابينا محمد سليم کي نجڪاري ڪميشن جو چيئرمين مقرر ڪرڻ جي منظوري ڏني. صنعت ۽ پيداوار واري وفاقي وزير ڪابينا کي ملڪ ۾ ڀاڻ جي موجوده اسٽاڪ ۽ قيمتن جي حوالي سان تفصيلي بريفنگ ڏني. اجلاس کي آگاهه ڪيو ويو ته گذريل سال جي ڀيٽ ۾ هن سال ڀان ڪمپنين سنڌ جي ڊيلرز کي 53 سيڪڙو وڌيڪ ڀاڻ جاري ڪئي جنهن جي ڪري پنجاب ۽ باقي علائقن ۾ يوريا جي کوٽ ٿي ۽ قيمت وڌي وئي هئي. جڏهن ته وزيراعظم جي هدايت تي ان فرق کي گهٽ ڪرڻ جي لاءِ ۽ ذخيره اندوزن جي خلاف خلاف کنيا ويا جنهن جي ڪري سراسري طور في ٻوري جي قيمت ۾ 400 رپين جي گهٽتائي ٿي اهي. هن وقت گوجرانوالا ۾ ڀاڻ جي ٻوري 1850 رپين ۾ ملي رهي آهي. ملڪي ضرورتن کان 2 لک ٽن وڌيڪ ڀاڻ موجود آهي. ڪابينا کي آگاهه ڪيو ويو ته ڀاڻ جي سپلائي کي مانيٽر ڪرڻ جي لاءِ آن لائين پورٽل ٺاهيو ويو آهي جنهن سان وفاقي حڪومت، صوبا ۽ سموري ضلعي انتظاميا ڀاڻ جي چرپر ۽ اسٽاڪ کي مانيٽر ڪري سگهن ٿا. پنجاب 13 نومبر کان هيستائين ڀاڻ جي ذخيره اندوزي کي روڪڻ جي لاءِ ڪيترائي قدم کنيا آهن. انهن ۾ 347 ايف آءِ آر، 244 گرفتاريون، 21111 انسپيڪشنز، 480 گودام سيل ۽ 2.79 ڪروڙ جا ڏنڊ هنيا ويا. ان کانسواءِ هر ضلعي ۾ ڪنٽرول روم ٺاهيا ويا آهن جتي ڀاڻ جي کوت، ذخيره اندوزي ۽ منافعي خوري بابت شڪايتون داخل ڪرائي سگهجن ٿيون. صوبن جي وچ ۾ سرحدن تي اسمگلنگ روڪڻ جي لاءِ چيڪ پوسٽون قائم ڪيون ويون آهن. ذخيره اندوزي ۽ منافعي خوري جي خلاف لاڳاپيل قانونن ۾ ترميم ڪئي پئي وڃي جنهن ۾ اطلاع فراهم ڪندڙن کي ضبط ٿيل مال جي حساب سان انعام ڏنو ويندو. ڪابينا اقتصادي رابطا ڪميٽي جي 29 نومبر 2021ع تي ٿيندڙ اجلاس ۾ ڪيل فيصلن جي توثيق ڪئي. اجلاس ۾ افغانستان جي صورتحال تي او آءِ سي ملڪن جي پرڏيهي وزيرن جو خصوصي اجلاس پاڪستان ۾ منعقد ڪرڻ جي منظوري ۽ افغانستان جي لاءِ 50 هزار ٽن ڪڻڪ جي امداد جي منظوري ڏني وئي.
