بحرين جو پرڏيهي وزير ڊاڪٽر عبداللطيف بن راشد الزياني 7 کان 8 آڪٽوبر تائين پاڪستان جو سرڪاري دورو ڪندو

اسلام آباد- 07 آڪٽوبر (اي پي پي) بحرين جو پرڏيهي وزير ڊاڪٽر عبداللطيف بن راشد الزياني 7 کان 8 آڪٽوبر تائين پاڪستان جو سرڪاري دورو ڪندو. اربع ڏينهن پرڏيهي آفيس پاران جاري ڪيل بيان موجب، بحرين جو پرڏيهي وزير نائب وزيراعظم ۽ پرڏيهي وزير سينيٽر محمد اسحاق ڊار جي دعوت تي هي دورو ڪري رهيو آهي. دوري دوران، نائب وزيراعظم ۽ پرڏيهي وزير سينيٽر محمد اسحاق ڊار ۽ پرڏيهي وزير ڊاڪٽر عبداللطيف بن راشد الزياني پاڪستان-بحرين گڏيل وزارتي ڪميشن جي ٽئين اجلاس جي گڏيل صدارت ڪندا. ٻطرفن لاڳاپن جي سڀني رُخن جو جائزو ورتو ويندو ۽ گڏيل دلچسپي جي مختلف شعبن واپار، سيڙپڪاري، اقتصادي تعاون، دفاع ۽ سلامتي، محنت ۽ افرادي قوت ۽ ثقافتي مٽاسٽا ۾ تعاون کي وڌيڪ مستحڪم ڪرڻ جي طريقن تي خيالن جي ڏي وٺ ڪئي ويندي. ٻئي اڳواڻ علائقائي ۽ عالمي اڳڀرائي ۽ گهڻ طرفن فورمن تي تعاون جي حوالي سان پُڻ خيالن جي ڏي وٺ ڪندا. پاڪستان ۽ بحرين گڏيل عقيدي، گڏيل قدرن، گڏيل احترام ۽ پراڻن عوامي رابطن تي ٻڌل ويجهن ۽ ڀائراڻن لاڳاپن سان ڳنڍيل آهن. ٻنهي ملڪن جي وچ ۾ مختلف شعبن ۾ اعليٰ سطح جا باقاعده دورا ۽ ويجهو تعاون جاري آهي. هي دورو پاڪستان ۽ بحرين جي لاڳاپن ۾ مضبوط اڳڀرائي جي عڪاسي ڪري ٿو ۽ ٻطرفي تعاون کي وڌيڪ وڌائڻ ۽ گڏيل مفادن تي ٻڌل لاڳاپن کي اڳتي وڌائڻ جي لاءِ ٻنهي ملڪن جي گڏيل عزم جو اظهار آهي.