پنهنجي عزيز ڀاءُ صدر شوڪت مرزيايوف سان انتهائي ڪارائتي ۽ نتيجاخيز ملاقات ٿي: وزيراعظم محمد شهباز شريف

بشڪيڪ – 31 آگسٽ (اي پي پي) وزيراعظم محمد شهباز شريف چيو آهي ته سندس بشڪيڪ ۾ شنگهائي تعاون تنظيم جي سربراهي اجلاس جي موقعي تي پنهنجي عزيز ڀاءُ صدر شوڪت مرزيايوف سان انتهائي ڪارائتي ۽ نتيجاخيز ملاقات ٿي. سومر ڏينهن سماجي رابطي جي ويب سائيٽ ايڪس تي هڪ بيان ۾ وزيراعظم چيو ته هن صدر شوڪت مرزيايوف ۽ ازبڪستان جي ڀائر عوام کي انهن جي 35هين آزادي جي ڏهاڙي جي موقعي تي دلي مبارڪباد ڏني. وزيراعظم چيو ته ملاقات دوران ٻنهي ملڪن جي وچ ۾ اسٽريٽجڪ حصيداري ۾ جاري مضبوط اڳڀرائي جو جائزو ورتو ويو ۽ واپار، سيڙپڪاري ۽ رابطن جي شعبن ۾ ڪيل فيصلن تي عملدرآمد کي تيز ڪرڻ تي اتفاق ڪيو ويو. ٻنهي اڳواڻن 2029ع تائين گڏيل واپار جو ڪاٿو 2 ارب آمريڪي ڊالر تائين وڌائڻ جي گڏيل هدف جي عزم جو پڻ ورجاءُ ڪيو. وزيراعظم چيو ته علائقائي رابطن کي گڏيل ترجيح قرار ڏيندي هن ازبڪستان، افغانستان ۽ پاڪستان ريلوي منصوبي جي انقلابي صلاحيت کي اجاگر ڪيو جيڪو وچ ۽ ڏکڻ ايشيا کي گڏيل طور تي ٺوس بڻائڻ ۽ ازبڪستان کي پاڪستان جي سامونڊي بندرگاهن تائين پهچ فراهم ڪرڻ ۾ اهم ڪردار ادا ڪري سگهي ٿو.