وزيراعظم ليپ ٽاپ اسڪيم نوجوانن کي جديد ٽيڪنالاجي سان هم آهنگ ڪرڻ ۽ کين قومي ترقي ۾ اثرائتو ڪردار ادا ڪرڻ جي لائق بنائڻ جو هڪ اهم وسيلو آهي: سيد محمد نهال هاشمي

ڪراچي- 03 آگسٽ (اي پي پي) سنڌ جي گورنر سيد محمد نهال هاشمي چيو آهي ته وزيراعظم ليپ ٽاپ اسڪيم نوجوانن کي جديد ٽيڪنالاجي سان هم آهنگ ڪرڻ ۽ کين قومي ترقي ۾ اثرائتو ڪردار ادا ڪرڻ جي لائق بنائڻ جو هڪ اهم وسيلو آهي. وفاقي حڪومت 2030ع تائين پاڪستان جي آءِ ٽي روانگي واپار کي 25 ارب ڊالر تائين کڻي وڃڻ لاءِ ڀرپور قدم کڻي رهي آهي، جنهن ۾ نوجوانن جو ڪردار اهم حيثيت رکي ٿو. انهن خيالن جو اظهار هن گورنر هائوس ڪراچي ۾ وزيراعظم ليپ ٽاپ اسڪيم تحت نوجوانن ۾ ليپ ٽاپ ورهائڻ واري تقريب کي خاص مهمان طور خطاب ڪندي ڪيو. گورنر چيو ته وزيراعظم ليپ ٽاپ اسڪيم جي شروعات 2014ع ۾ ڪئي وئي هئي ۽ اها رٿا اڄ به ڪاميابي سان جاري آهي. هن چيو ته ان اسڪيم تحت هاڻي تائين لکين شاگردن ۽ شاگردياڻين کي ليپ ٽاپ فراهم ڪيا ويا آهن، جن مان هو تعليم، تحقيق ۽ جديد ٽيڪنالاجي جي ميدان ۾ ڀرپور فائدو کڻي رهيا آهن. هن چيو ته پاڪستان جا نوجوان پنهنجن صلاحيتن وسيلي سڄي دنيا ۾ ملڪ جي هاڪاري سڃاڻپ اجاگر ڪري رهيا آهن ۽ اهي ئي نوجوان پاڪستان جو روشن مستقبل آهن. هن چيو ته پاڪستان هڪ مضبوط ايٽمي طاقت آهي ۽ هن ملڪ سياست، معيشت، سائنس، ٽيڪنالاجي ۽ دفاع سميت مختلف شعبن ۾ عالمي سطح جون شخصيتون پيدا ڪيو آهن. تقريب جي آخر ۾ گورنر سيد محمد نهال هاشمي سنڌ انسٽيٽيوٽ آف فزيڪل ميڊيسن اينڊ ري هيبليٽيشن (ايس آءِ پي ايم اينڊ آر) جي ذهين شاگردن ۽ شاگردياڻين ۾ وزيراعظم ليپ ٽاپ اسڪيم تحت ليپ ٽاپ ورهايا. ان موقعي تي شاگردن حڪومت جي ان قدم جي واکاڻ ڪندي چيو ته جديد ٽيڪنالاجي تائين پهچ سان سندن تعليمي، تحقيقي ۽ پيشيوراڻين صلاحيتن ۾ وڌيڪ اضافو ٿيندو.