لاڙڪاڻي ۾ ايندڙ پوليو بوسٽر ڊوز مهم جي حوالي سان آگاهي سيمينار

لاڙڪاڻو-24 جولاءِ (اي پي پي) لاڙڪاڻي ۾ ايندڙ پوليو بوسٽر ڊوز (ايف آءِ پي وي) مهم کان اڳ صحت جي ماهرن ۽ انتظامي آفيسرن جي شرڪت سان ضلعي صحت آفيس لاڙڪاڻي ۾ آگاهي سيمينار منعقد ڪيو ويو. پوليو بوسٽر ڊوز مهم 6 آگسٽ کان 13 آگسٽ 2026ع تائين جاري رهندي. سيمينار جي صدارت ڊسٽرڪٽ هيلٿ آفيسر لاڙڪاڻو ڊاڪٽر شوڪت علي ابڙو ڪئي، جڏهن ته ميڊيڪل سپرنٽنڊنٽس، ٻارن جي بيمارين جا ماهر، ضلعي انتظاميا، يونين ڪائونسل سطح جا آفيسر ۽ صحت کاتي سان لاڳاپيل ٻين عملدارن شرڪت ڪئي.سيمينار ۾ ڊاڪٽر احمد علي شيخ، پروونشل ٽيڪنيڪل سپورٽ آفيسر، ڊاڪٽر مختيار احمد چنا، ڊاڪٽر راول، اين اسٽاپ آفيسر، ڊاڪٽر لياقت علي نوناري، ڊاڪٽر عبدالحميد، ڊاڪٽر عبدالحفيظ ابڙو، ڊاڪٽر الطاف حسين راڄڙ سميت ضلعي ۽ يونين ڪائونسل سطح جا صحت ۽ انتظامي آفيسر پڻ موجود هئا. سيمينار کي خطاب ڪندي ڊسٽرڪٽ هيلٿ آفيسر لاڙڪاڻي ڊاڪٽر شوڪت علي ابڙو چيو ته (ايف آءِ پي وي) پوليو بوسٽر ڊوز مهم ٻارن کي پوليو وائرس کان محفوظ رکڻ لاءِ انتهائي اهم آهي. هن صحت جي ماهرن، لاڳاپيل آفيسرن ۽ فيلڊ ٽيمن تي زور ڀريو ته هو مڪمل ذميواري، بهترين رابطي ۽ گڏيل سهڪار سان مهم کي ڪامياب بڻائين ۽ هر اهل ٻار تائين پوليو ويڪسين جي رسائي يقيني بڻائين.سيمينار دوران ايندڙ مهم جي مختلف پهلوئن جو تفصيلي جائزو ورتو ويو، جن ۾ مهم جا مقصد، آپريشنل تياريون، فيلڊ ٽيمن جون ذميواريون، عوامي آگاهي، والدين جي شموليت ۽ هر اهل ٻار کي پوليو بوسٽر ڊوز فراهم ڪرڻ شامل هئا. شرڪت ڪندڙن مهم دوران پيش ايندڙ ممڪن چئلينجن ۽ انهن جي مؤثر حل بابت پڻ خيالن جي ڏي وٺ ڪئي.ان موقعي تي صحت جي ماهرن ۽ لاڳاپيل اختيارين ان عزم جو اظهار ڪيو ته (ايف آءِ پي وي)مهم کي ڪامياب بڻائڻ لاءِ سمورا دستياب وسيلا ڪتب آندا ويندا، فيلڊ ٽيمن جي مؤثر نگراني ڪئي ويندي ۽ عوام ۾ پوليو کان بچاءَ بابت ڀرپور آگاهي پيدا ڪئي ويندي.سيمينار جي پڄاڻي تي شرڪت ڪندڙن ان عزم جو ورجاءُ ڪيو ته گڏيل ڪوششن، بهتر رابطي، معياري طريقيڪار تي عملدرآمد ۽ عوامي سهڪار ذريعي پوليو بوسٽر ڊوز مهم کي ڪامياب بڻايو ويندو ۽ پاڪستان کي پوليو کان پاڪ بڻائڻ جي قومي مقصد ۾ ڀرپور ڪردار ادا ڪيو ويندو.