سنڌ جي وڏي وزير جي صدارت هيٺ صوبي ۾ امن امان جي مجموعي صورتحال جو جائزو وٺڻ بابت اجلاس منعقد

ڪراچي- 20 جولاءِ (اي پي پي) سنڌ جي وڏي وزير سيد مراد علي شاهه چيو آهي ته عوام جي جان ۽ مال جو تحفظ حڪومت جي اولين ذميواري آهي، اسان ڏوهارين، دهشتگردن، منشيات جو ڪاروبار ڪندڙن ۽ ڀتا خورن خلاف ڪنهن به قسم جي غفلت جا متحمل نٿا ٿي سگهون. اھڙو اظهار هن صوبي ۾ امن امان جي مجموعي صورتحال جو جائزو وٺڻ واري اجلاس جي صدارت ڪندي ڪيو. وڏي وزير پوليس ۽ انٽيليجنس ادارن کي هدايت ڪئي ته اهي انٽيليجنس تي ٻڌل آپريشنز کي وڌيڪ تيز ڪن، جديد ٽيڪنالاجي ذريعي نگراني کي بهتر بڻائين، بين الصوبائي سرحدن تي مانيٽرنگ کي مضبوط ڪن ۽ موبائل فون ڦرڻ ۽ اسٽريٽ ڪرائم جي هاٽ اسپاٽس خلاف اثرائتي ڪارروائي ڪن. وڏي وزير منظم ڏوهاري گينگس، منشيات وڪرو ڪندڙن ۽ دهشتگردي جي سهولتڪارن خلاف سخت ڪارروائي جو پڻ حڪم ڏنو، جنهن دوران قانون لاڳو ڪندڙ ادارن ۾ وڌيڪ ڪميونٽي شموليت ۽ عوامي اعتماد جي ضرورت تي زور ڏنو. مراد علي شاهه آفيسرن کي وڌيڪ هدايت ڪئي ته چيني شهرين، پرڏيهي مشنز، حساس ٺڪاڻن ۽ مذهبي گڏجاڻين لاءِ فول پروف سيڪيورٽي کي يقيني بڻايو وڃي، ۽ و سڄي سنڌ ۾ امن ۽ استحڪام کي برقرار رکڻ لاءِ سمورن ادارن کي گڏجي ويجهي رابطي ۾ ڪم ڪرڻ گهرجي. وڏي وزير چيو هر ضلعي کي هوشيار رهڻ گهرجي. اجلاس ۾ وڏي وزير کي آگاهه ڪيو ويو ته انٽيليجنس تي ٻڌل پوليسنگ، ادارن وچ ۾ بهتر رابطي، ڏوهارين خلاف ٽارگيٽيڊ آپريشنز ۽ سرحدي سيڪيورٽي جي قدمن کي مضبوط ڪرڻ جي ڪري 2026ع جي پهرين ڇهن مهينن دوران وڏن ڏوهن، دهشتگردي سان لاڳاپيل واقعن ۽ اسٽريٽ ڪرائم ۾ نمايان گهٽتائي آئي آهي. اجلاس ۾ صوبي جي سطح تي سيڪيورٽي ماحول، ڏوهن جي لاڙن، دهشتگردي جي انتظام واري آپريشنز، منشيات مخالف مهمن، ڪچي جي علائقن جي آپريشنز ۽ جديد نگراني وارن نظامن جي ڪارڪردگي جو جائزو ورتو ويو، جنهن ۾ سيف سٽي پروجيڪٽ ۽ سنڌ سمارٽ سرويلنس سسٽم شامل آهن. وزيراعليٰ هائوس ۾ ٿيل اجلاس ۾ صوبائي گهرو وزير ضياءُ الحسن لنجار، گهرو سيڪريٽري اقبال ميمڻ، انسپيڪٽر جنرل آف پوليس جاويد عالم اوڍو، ايڊيشنل آءِ جي پوليس ڪراچي آزاد خان ۽ ٻين لاڳاپيل اختيارين شرڪت ڪئي. بريفنگ دوران گهرو وزير ضياءُ الحسن لنجار وڏي وزير کي ٻڌايو ته سنڌ پوليس انٽيليجنس تي ٻڌل پوليسنگ، بين الصوبائي سرحدن تي سيڪيورٽي مضبوط ڪرڻ، حساس ٺڪاڻن، غير ملڪي مشنز، چيني شهرين، مذهبي ادارن، عوامي جڳهن ۽ اهم سرڪاري انفراسٽرڪچر جي تحفظ کي بهتر بڻائي سڄي صوبي ۾ هڪ مضبوط سيڪيورٽي ماحول برقرار رکيو آهي. اجلاس کي ٻڌايو ويو ته اڀرندڙ سيڪيورٽي خطرن کي منهن ڏيڻ لاءِ سنڌ پوليس، رينجرز، ڪائونٽر ٽيررازم ڊپارٽمينٽ (سي ٽي ڊي)، اسپيشل برانچ، انٽيليجنس ادارن ۽ ضلعي انتظاميا جي وچ ۾ ويجهو رابطو برقرار رکيو پيو وڃي. آءِ جي پوليس جاويد اوڍو وڏي وزير کي آگاهه ڪيو ته 2025ع جي ساڳئي عرصي جي ڀيٽ ۾ جنوري کان جون 2026ع جي موازني انگن اکرن موجب، قتلن ۾ 17.3 سيڪڙو، قتل سان گڏ ڦر ۾ 19.4 سيڪڙو، زخمين سان گڏ ڦر ۾ 25.4 سيڪڙو، ڌاڙن ۽ ڦرن ۾ 18.9 سيڪڙو، ڪار ڦرڻ ۾ 23.9 سيڪڙو، موٽرسائيڪل ڦرڻ ۾ 31.1 سيڪڙو ۽ موٽرسائيڪل چوري ۾ 22.1 سيڪڙو گهٽتائي آئي آهي. آءِ جي پوليس وڏي وزير کي ٻڌايو ته جيتوڻيڪ اڪثر ڏوهن جي قسمن ۾ گهٽتائي جو لاڙو نظر آيو آهي، پر موبائل فون ڦرڻ جي واقعن ۾ واڌ ٿي آهي جنهن لاءِ خاص توجهه واري عمل جي ضرورت آهي. ايڊيشنل آءِ جي ڪراچي آزاد خان وڏي وزير کي ٻڌايو ته گذريل سال جي ساڳئي عرصي جي ڀيٽ ۾ ڪراچي ۾ مجموعي طور اسٽريٽ ڪرائم ۾ 11.77 سيڪڙو گهٽتائي آئي آهي. ڦر جي واقعن دوران فوتگين ۾ 38.3 سيڪڙو، زخمين ۾ 39.1 سيڪڙو، گاڏين جي ڦر ۾ 24.3 سيڪڙو ۽ موٽرسائيڪل جي ڦر ۾ 27.8 سيڪڙو گهٽتائي آئي آهي. ايڊيشنل آءِ جي ڪراچي موجب سنڌ پوليس 2026ع جي پهرين ڇهن مهينن دوران 2184 مقابلا ڪيا، جڏهن ته گذريل سال جي ساڳئي عرصي ۾ 1574 مقابلا ڪيا ويا هئا. پوليس مختلف آپريشنز دوران 1087 ڏوهاري گينگس جو خاتمو ڪيو، 187 ڏوهارين کي ماريو ۽ هزارين شڪي ماڻهن کي گرفتار ڪيو. بريفنگ ۾ ڏوهاري عنصرن خلاف تيز ڪيل ڪريڪ ڊائون جي حصي طور غير قانوني هٿيارن، خاص ڪري پسٽلن، ريوالورن ۽ ٻين هٿيارن جي برآمدگي ۾ وڏي واڌ کي نمايان ڪيو ويو. منشيات مخالف مهم کي وڌايو ويو. گهرو وزير ضياءُ الحسن لنجار وڏي وزير کي ٻڌايو ته رپورٽنگ جي عرصي دوران پوليس منشيات فروشن خلاف 7027 ڇاپا هنيا، جنهن جي نتيجي ۾ 7468 ڪيس داخل ڪيا ويا ۽ 9096 جوابدارن کي گرفتار ڪيو ويو. هيرون، چرس، آئس ۽ شراب جي وڏي مقدار هٿ ڪئي وئي. وڏن منشيات سپلائرز، آن لائن منشيات وڪڻندڙن ۽ تعليمي ادارن ڀرسان ڪم ڪندڙ ڊيلرن خلاف پڻ خاص آپريشن ڪيا ويا. اجلاس ۾ ڪراچي ۾ سرگرم ڀتا خور گينگس خلاف اڳڀرائي جو جائزو ورتو ويو. ايڊيشنل آءِ جي آزاد خان رجسٽرڊ ٿيل ڀتي جي ڪيسن ۾ 81 سيڪڙو جي سڃاڻپ جي شرح رپورٽ ڪئي. ڪيترن ئي بدنام گينگس کي ختم ڪيو ويو، ڪيترن ئي جوابدارن کي گرفتار ڪيو ويو ۽ ٻاهرين ملڪن مان ڪم ڪندڙ مفرور جوابدارن خلاف چار ريڊ نوٽيس جاري ڪيا ويا. آءِ جي پوليس جاويد اوڍو وڏي وزير کي ٻڌايو ته گذريل سال جي ڀيٽ ۾ 2026ع دوران دهشتگردي سان لاڳاپيل واقعن ۾ 75 سيڪڙو گهٽتائي آئي آهي. سي ٽي ڊي 777 انٽيليجنس تي ٻڌل آپريشنز ڪيا ۽ تحريڪ طالبان پاڪستان، بلوچ ويڙهاڪ گروپن ۽ فرقيواراڻي تنظيمن سميت مختلف پابندي مڙهيل تنظيمن سان لاڳاپيل 355 دهشتگردن ۽ ڏوهارين کي گرفتار ڪيو. آءِ جي پوليس چيو ته آپريشنز دوران وڏي مقدار ۾ ڌماڪيدار مادو، هٿ سان ٺهيل بم (آءِ اي ڊيز)، ڊيٽونيٽر، هٿ بم ۽ ٻيو مواد هٿ ڪيو ويو، ڪچي جي علائقن جا آپريشن جاري آهن. گهرو وزير ضياءَ لنجار، وڏي وزير کي ٻڌايو ته دريائي ڪچي جي علائقن ۾ ”آپريشن نجاتِ مهران“ شاندار نتيجا ڏنا آهن. جنوري 2026ع کان پوليس 141 مقابلا ڪيا جنهن ۾ 275 ڌاڙيلن ۽ ڏوهارين کي ماريو ويو، سوين شڪي ماڻهن کي گرفتار ڪيو ويو، ڪيترن ئي ڏوهارين کان هٿيار ڦٽا ڪرايا ۽ مغوين ۽ غير قانوني هٿيارن کي بازياب ڪرايو. پوليس رپورٽ ڪيو ته ڪچي جي پٽيءَ ۾ سرگرم منظم ڏوهاري نيٽ ورڪس جي خاتمي لاءِ جاري مهم تحت مجموعي طور 550 ڌاڙيل يا ته گرفتار ڪيا ويا آهن يا وري هٿيار ڦٽا ڪيا اٿن. آءِ جي جاويد اوڍو وڏي وزير کي سيف سٽي ۽ سرويلنس سسٽم بابت بريفنگ ڏيندي چيو ته سيف سٽي پروجيڪٽ جي پهرين مرحلي تحت سڄي ڪراچي ۾ 1325 سرويلنس ڪيمرائون لڳايون ويون آهن، جيڪي اصل هدف کان وڌيڪ آهن. هن نظام ۾ چهري جي سڃاڻپ ڪندڙ ڪيمرائون، پاڻمرادي نمبر پليٽ سڃاڻپ واريون ڪيمرائون ۽ پي ٽي زيڊ ڪيمرائون شامل آهن. هن ٻڌايو ته سيف سٽي سسٽم شڪي ماڻهن کي گرفتار ڪرڻ، چوري ٿيل گاڏيون هٿ ڪرڻ ۽ ڏوهن جي جاچ ۾ اهم ثبوت فراهم ڪرڻ ۾ مدد ڪئي آهي. اهڙي ريت 1.4 ارب رپين جي لاڳت سان قائم ڪيل سنڌ سمارٽ سرويلنس سسٽم (S4) صوبي جي 40 ٽول پلازائن تي 381 ڪيمرائون لڳايون آهن. ان نظام جي نتيجي ۾ 496 ڏوهاري گرفتار ٿيا ۽ 349 گاڏيون ضبط ڪيون ويون. وڏي وزير کي ٻڌايو ويو ته سنڌ پوليس هاءِ وي پيٽرول، جيڪا 2150 ڪلوميٽرن کان وڌيڪ اهم هاءِ ويز کي ڪَور ڪري ٿي، سيڪيورٽي الرٽس تي تيزي سان جواب ڏئي رهي آهي، مسافرن کي مدد فراهم ڪري رهي آهي ۽ ڏوهارين کي روڪي رهي آهي. ٽرئفڪ ريگيوليشن اينڊ سائيٽيشن سسٽم 12 لک 40 هزار (1.24 ملين) کان وڌيڪ ڊجيٽل ٽرئفڪ ٽڪيٽون جاري ڪيون آهن ۽ ان جي ڪري ٽرئفڪ حادثن ۾ 44 سيڪڙو، فوتگين ۾ 19 سيڪڙو ۽ زخمين ۾ 27 سيڪڙو گهٽتائي آئي آهي. اجلاس ۾ اهم بين الصوبائي ۽ عبوري سرحدي پوائنٽن جي سيڪيورٽي انتظامن جو جائزو ورتو ويو، جن ۾ حب – ڪراچي، ڄامشورو – حب، دادو – خضدار، ڪشمور – ڊيرا بگٽي – راجن پور، گھوٽڪي – رحيم يار خان ۽ سامونڊي ڪناري وارا علائقا شامل آهن. گهرو وزير، وڏي وزير کي آگاهه ڪيو ته صوبي جي 139 ڪراسنگ پوائنٽس تي پوليس چيڪ پوسٽن، اسنيپ چيڪنگ، موبائل پيٽرولز ۽ موٽرسائيڪل پيٽرول يونٽس ذريعي سيڪيورٽي ڪوريج کي وڌايو ويو آهي. امن امان جي مجموعي صورتحال ۾ بهتري تي اطمينان جو اظهار ڪندي وڏي وزير سيد مراد علي شاهه قانون لاڳو ڪندڙ ادارن کي هدايت ڪئي ته هو ان تسلسل کي برقرار رکن ۽ احتياطي پوليسنگ کي وڌيڪ مضبوط ڪن. هن چيو ته اسان امن امان جي بهتريءَ ۾ اهم ڪاميابيون حاصل ڪيون آهن ۽ انهن حاصلات کي مسلسل ۽ گڏيل ڪوششن ذريعي مضبوط ڪيو وڃي.