سنڌ جي وڏي وزير پاران سنڌ جي پهرين گوگل جيمينائي ڪارنر جو افتتاح

ڪراچي-01 جولاءِ (اي پي پي) سنڌ جي وڏي وزير سيد مراد علي شاهه، سنڌ جي پهرين گوگل جيمينائي ڪارنر کي مستقبل جو هڪ دروازو ۽ سنڌ جي شاگردن کي آرٽيفيشل انٽيليجنس جي دور لاءِ تيار ڪرڻ طرف هڪ وڏو قدم قرار ڏيندي چيو آھي ته اسان رڳو هڪ ڪمري يا سهولت جو افتتاح ناهيون ڪري رهيا، اسان مستقبل جو هڪ دروازو کولي رهيا آهيون. سنڌ جي پهرين گوگل جيمينائي فار ايجوڪيشن ڪارنر جو افتتاح اسان جي ان عزم جي عڪاسي ڪري ٿو ته سنڌ جا نوجوان آرٽيفيشل انٽيليجنس جي تيزي سان بدلجندڙ دنيا لاءِ تيار آهن. اهڙو اظهار هن اين اي ڊي يونيورسٽي آف انجنيئرنگ اينڊ ٽيڪنالاجي ۾ سنڌ جي پهرين گوگل جيمينائي فار ايجوڪيشن ڪارنر جو افتتاح  ڪرڻ جي موقعي تي ڪيو. هن چيو ته صوبي جي ڊجيٽل تبديلي کي تيز ڪرڻ جي مقصد سان ٽن تاريخي اڳڀرائي وارن قدمن جي اڳواڻي ڪئي جنهن ۾ ڪابينا جي ميمبرن ۽ سينئر آفيسرن لاءِ گوگل جيمينائي آرٽيفيشل انٽيليجنس ٽريننگ پروگرام، وزيراعليٰ هائوس ۾ يونيورسٽي جي شاگردن لاءِ 20,000 گوگل ڪيريئر سرٽيفڪيٽ اسڪالرشپ جي شروعات شامل آهن ۽ اين اي ڊي يونيورسٽي آف انجنيئرنگ اينڊ ٽيڪنالاجي ۾ سنڌ جي پهرين گوگل جيمينائي فار ايجوڪيشن ڪارنر جو افتتاح  ڪيو. اهي قدم جيڪي گوگل ۽ ٽيڪ ويلي پاڪستان جي تعاون سان کنيا ويا آهن، سنڌ حڪومت جي ان عزم جي عڪاسي ڪن ٿا ته اڀرندڙ ٽيڪنالاجيز کي گورننس ۾ شامل ڪيو وڃي جڏهن ته نوجوانن کي تيزي سان وڌندڙ ڊجيٽل معيشت ۾ گهربل عالمي طور تي مڃيل ڊجيٽل مهارتن سان ليس ڪيو وڃي.وڏي وزير مراد علي شاهه ڪابينا جي ميمبرن ۽ سينيئر سرڪاري آفيسرن لاءِ گوگل جيمينائي اي آءِ تي هڪ اوريئنٽيشن ۽ ٽريننگ سيشن جي صدارت ڪئي. تقريب جي شروعات انفارميشن ٽيڪنالاجي کاتي ۽ ٽيڪ ويلي پاڪستان پاران تعارف سان ٿي جنهن کانپوءِ وڏي وزير ۽ ٽيڪ ويلي پاڪستان جي سي اي او خطاب ڪيا. ان کانپوءِ گوگل سان تصديق ٿيل ماسٽر ٽرينرن گوگل جيمنائي جي استعمال ۽ گورننس ۾ ان جي ايپليڪيشنن تي عملي مظاهرا ڪيا. خطاب ڪندي وڏي وزير آرٽيفيشل انٽيليجنس کي جديد دور جي سڀ کان وڌيڪ تبديل ڪندڙ ٽيڪنالاجيز مان هڪ قرار ڏنو ۽ سرڪاري ادارن کي مستقبل لاءِ تيار ڪرڻ جي اهميت تي زور ڀريو. هن چيو ته سڄي دنيا ۾ حڪومتون فيصلي سازي کي بهتر بڻائڻ، عوامي خدمتن جي فراهمي کي وڌائڻ ۽ گورننس کي وڌيڪ ڪارائتو، شفاف ۽ جوابده بڻائڻ لاءِ اي آءِ کي تيزي سان اپنائي رهيون آهن. هن چيو اڄ، اسان سنڌ حڪومت کي مستقبل لاءِ تيار ڪرڻ جي طرف هڪ اهم قدم کڻي رهيا آهيون. سنڌ کي ان تبديلي جو حصو ٿيڻ گهرجي. مراد علي شاهه چيو ته اي آءِ ۾ انتظامي عملن کي سادو بڻائڻ، وڏي مقدار ۾ معلومات جو تجزيو ڪرڻ، پاليسي سازي کي مضبوط ڪرڻ ۽ صحت، تعليم، زراعت، شهري منصوبابندي، آفتن جي انتظام، ماليات ۽ قانون لاڳو ڪندڙ ادارن جهڙن شعبن ۾ خدمتن جي فراهمي کي بهتر بڻائڻ جي صلاحيت موجود آهي. هن ان ڳالهه تي زور ڀريو  ته اي آءِ کي انساني فيصلي کي تبديل ڪرڻ بدران ان جي مدد ڪندڙ هڪ اوزار طور ڏٺو وڃي، هن وڌيڪ چيو ته قيادت، جوابدهي ۽ عوامي اعتماد هميشه چونڊيل نمائندن ۽ عوامي ادارن جي ذميواري رهندي. وڏي وزير ڪابينا جي ميمبرن تي زور ڀريو ته اهي اڀرندڙ ٽيڪنالاجيز سان سرگرمي سان واڳيل رهن ۽ اهڙيون عملي ايپليڪيشنون سڃاڻن جيڪي گورننس ۽ عوامي خدمتن جي فراهمي کي بهتر بڻائي سگهن. هن چيو اسان جو خواب واضح آهي: هڪ جديد، جدت پسند ۽ ڊجيٽل طور تي بااختيار سنڌ جي اڏاوت جتي ٽيڪنالاجي گورننس کي وڌائي، شفافيت کي بهتر بڻائي ۽ هر شهري لاءِ بهتر نتيجا فراهم ڪري. اي آءِ ٽريننگ پروگرام کانپو وڏي وزير گوگل ڪيريئر سرٽيفڪيشن پروگرام 2026ع جو آغاز ڪيو ۽ سائنس اينڊ انفارميشن ٽيڪنالاجي کاتي، سنڌ هائير ايجوڪيشن ڪميشن ۽ ٽيڪ ويلي پاڪستان جي وچ ۾ مفاهمت جي ياداشت تي صحيحين جي تقريب جو مشاهدو ڪيو. هن پروگرام تحت سنڌ جي سمورن سرڪاري يونيورسٽين ۾ داخلا ورتل شاگردن کي 20 هزار گوگل ڪيريئر سرٽيفڪيٽ اسڪالرشپون ڏنيون وينديون، جيڪي کين وڏي گهرج وارن ڊجيٽل شعبن ۾ عالمي طور تي مڃيل سرٽيفڪيشن حاصل ڪرڻ جي قابل بڻائينديون. تقريب کي خطاب ڪندي مراد علي شاهه ان قدم کي سنڌ جي نوجوانن جي مستقبل ۽ صوبي جي ڊجيٽل معيشت ۾ هڪ وڏي تبديلي آڻيندڙ سيڙپڪاري قرار ڏنو. هن چيو اڄ رڳو هڪ ٻئي تعليمي قدم جو آغاز ناهي؛ هي هڪ اهڙي تبديلي واري سفر جي شروعات آهي جيڪو اسان جي نوجوانن کي تيزي سان وڌندڙ ڊجيٽل معيشت جي موقعن ۽ چيلينجن لاءِ تيار ڪندو. وڏي وزير ياد ڏياريو ته ٽيڪنالاجي جي ترقي سڄي دنيا ۾ صنعتن کي نئون روپ ڏئي رهي آهي ۽ روزگار جي موقعن کي ٻيهر بيان ڪري رهي آهي، جنهن ڪري مستقبل جي ڪاميابي لاءِ ڊجيٽل مهارتون وڌيڪ اهم ٿي رهيون آهن. پروگرام جي ذريعي، شاگردن کي آرٽيفيشل انٽيليجنس، سائبر سيڪيورٽي، ڊيٽا اينالائيٽڪس، پراجيڪٽ مينيجمينٽ، يوزر ايسپيرئنس ڊيزائن، ڊجيٽل مارڪيٽنگ، اي-ڪامرس، آئي ٽي سپورٽ ۽ ٻين اڀرندڙ ٽيڪنالاجيز ۾ پروفيشنل سرٽيفڪيشن تائين رسائي حاصل هوندي. وڏي وزير چيو  اهي سرٽيفڪيشن عالمي طور تي مڃيل سندون آهن جيڪي بامعنيٰ ڪيريئر، انٽرپرينئرشپ (ڪاروبار) ۽ ڊجيٽل معيشت ۾ شموليت جا دروازا کولين ٿيون. وڏي وزير ان ڳالهه تي اطمينان جو اظهار ڪيو ته پروگرام کي وڌائي سنڌ جي سمورن سرڪاري يونيورسٽين تائين ڦهلايو ويو آهي، جنهن سان سڄي صوبي ۾ باصلاحيت شاگردن لاءِ موقعن تائين برابري جي بنياد تي رسائي يقيني بڻائي وئي آهي. وڏي وزير پروگرام ۾ عورتن، معذور ماڻهن ۽ گهٽ سهولتن وارن علائقن جي شاگردن تي ڌيان ڏيڻ تي پڻ زور ڀريو ۽ چيو ته ڊجيٽل تعليم ۾ روايتي رڪاوٽن کي ختم ڪرڻ ۽ سڀني لاءِ برابر موقعا پيدا ڪرڻ جي طاقت آهي. تقريب جي پڄاڻي وڏي وزير جي موجودگي ۾ سيڪريٽري سائنس اينڊ انفارميشن ٽيڪنالاجي کاتي، چيئرمين سنڌ هائير ايجوڪيشن ڪميشن ۽ ٽيڪ ويلي پاڪستان جي چيف ايگزيڪيوٽو آفيسر پاران مفاهمت جي ياداشت تي باضابطه صحيحين سان ٿيو. اين اي ڊي يونيورسٽي ۾ سنڌ جي پهرين گوگل جيمينائي فار ايجوڪيشن ڪارنر جو افتتاح بعد ۾ وڏي وزير اين اي ڊي يونيورسٽي آف انجنيئرنگ اينڊ ٽيڪنالاجي جو دورو ڪيو جتي هن اين اي ڊي يونيورسٽي، گوگل ۽ ٽيڪ ويلي پاڪستان جي شراڪت سان قائم ڪيل سنڌ جي پهرين گوگل جيمينائي فار ايجوڪيشن ڪارنر جو افتتاح ڪيو. تقريب ۾ اين اي ڊي يونيورسٽي جي وائيس چانسلر پروفيسر ڊاڪٽر محمد طفيل پاران ڀليڪار جا لفظ ۽ هائير ايجوڪيشن ڪميشن جي چيئرمين پروفيسر طارق رفي، گوگل، ٽيڪ ويلي پاڪستان ۽ صوبائي انفارميشن ٽيڪنالاجي جي قيادت پاران خطاب شامل هئا. تقريب کي خاص مهمان جي حيثيت سان خطاب ڪندي وڏي وزير جيمينائي ڪارنر کي مستقبل جو هڪ دروازو ۽ سنڌ جي شاگردن کي آرٽيفيشل انٽيليجنس جي دور لاءِ تيار ڪرڻ طرف هڪ وڏو قدم قرار ڏنو. پروگرام ۾ صوبائي وزيرن، صلاحڪارن، خاص مددگارن، ترجمانن، چيف سيڪريٽري آصف حيدر شاهه، وڏي وزير جو انفارميشن ٽيڪنالاجي بابت خاص مددگار محمد علي راشد، سيڪريٽري آئي ٽي ذولفقار علي نظاماڻي، سنڌ هائير ايجوڪيشن ڪميشن جي چيئرمين ڊاڪٽر طارق رفيع، ٽيڪ ويلي پاڪستان جي چيف ايگزیڪيوٽو آفيسر عمر فاروق، گوگل فار ايجوڪيشن جي سربراهه ڊاڪٽر مازن عبدالله، مس ايلڪس گيلنڊ اي پي اي سي ڊجيٽل ايڊوائيزر – گوگل پاڪستان ۽ گوگل ۽ ٽيڪ ويلي جي نمائندن، سينئر سرڪاري آفيسرن، يونيورسٽي جي قيادت، فيڪلٽي ميمبرن ۽ شاگردن شرڪت ڪئي.