وفاقي وزير قيصر احمد شيخ جي صدارت ۾ ريگيوليٽري سڌارن بابت ڪابينه ڪميٽيءَ جو اجلاس

اسلام آباد- 12 مئي (اي پي پي) سيڙپڪاري بورڊ واري وفاقي وزير قيصر احمد شيخ جي صدارت هيٺ ريگيوليٽري سڌارن بابت ڪابينا ڪميٽيءَ جو سَتون اجلاس منعقد ٿيو، جنهن ۾ پاڪستان ۾ ڪاروبار ۾ آساني کي هٿي وٺرائڻ لاءِ وسيع پيماني تي ريگيوليٽري سڌارن تي عملدرآمد جي اڳڀرائيءَ جو جائزو پيش ڪيو ويو. اجلاس ۾ لاڳاپيل وزارتن ۽ کاتن جي سينيئر آفيسرن شرڪت ڪئي، جنهن ۾ ايڊيشنل سيڪريٽري بورڊ آف انويسٽمينٽ ذوالفقار علي ۽ بورڊ آف انويسٽمينٽ جي ٻين اعليٰ عملدارن شرڪت ڪئي. اجلاس جي بنيادي ايجنڊا سڌارن تي عملدرآمد جي موجوده صورتحال جو جائزو وٺڻ ۽ اهڙن شعبن جي نشاندهي ڪرڻ هو جتي فوري ڌيان گهربل آهي. ڪميٽيءَ کي آگاهه ڪيو ويو ته هاڻي تائين مجموعي طور تي 410 سڌارن جي منظوري ڏني وئي آهي، جن تي وڏي انگ تي عملدرآمد ٿي چڪو آهي. 264 سڌارا درست رُخ ۾ جاري آهن جڏهن ته 67 سڌارن کي سست رويءَ جو شڪار قرار ڏيندي ان جو تفصيلي جائزو ورتو ويو. اجلاس جي شروعات ۾ ڪجهه اڳوڻن تڪراري فيصلن تي به غور ڪيو ويو ۽ انهن جي موجوده صورتحال جو جائزو ورتو ويو. ان موقعي تي ٻُڌايو ويو ته مجموعي اڳڀرائي همٿائيندڙ آهي، جڏهن ته ڪجهه سڌارن تي وقت سر عملدرآمد لاءِ وڌيڪ ڌيان گهربل آهي. اجلاس دوران اهم سڌارن وارن شعبن تي به غور ڪيو ويو، جن ۾ ريگيوليٽري ساده ڪاري، ڊجيٽلائزيشن ۽ غير ضروري طريقيڪار جو خاتمو شامل آهي. ان ڳالهه تي زور ڀريو ويو ته غير ضروري اجازت نامن خاص ڪري روانگي واپار بابت اجازت نامن کي گهٽ کان گهٽ ڪيو وڃي ته جيئن ڪاروباري سرگرمين کي سهولت ملي، جڏهن ته آمدني واپار ڪندڙ ملڪن جي معيار کي برقرار رکيو وڃي. ڪميٽي وسيع ريگيوليٽري شعبن ۾ سڌارن جو به جائزو ورتو، جنهن ۾ طريقيڪار کي آسان بنائڻ ۽ اداره جاتي ڪارڪردگيءَ کي بهتر بنائڻ تي ڌيان ڏنو ويو. مڪاني سطح تي واپاري لائسنس جي خاتمي بابت سڌارن تي به غور ڪيو ويو، جڏهن ته پاڪستان ٽوبيڪو بورڊ بابت ڪجهه سڌارن تي به بحث ڪيو ويو. اجلاس ۾ اسٽيٽ بئنڪ آف پاڪستان بابت ڄاڻايل ترميمن تي به غور ڪيو ويو جتي وضاحت ۽ اثرائتي عملدرآمد کي يقيني بنائڻ لاءِ ترميمن جي زبان تي نظرثاني ڪئي وئي. پنهنجي برطانيه جي تازي دؤري جو حوالو ڏيندي وفاقي وزير چيو ته عالمي ڀائيوارن پاڪستان جي سڌارن واري اڳڀرائيءَ کي ساراهيو ۽ ملڪ جي بهتر ٿيندڙ ڪاروباري ماحول تي اعتماد جو اظهار ڪيو. هن چيو ته پاڪستان جو عالمي تاثر نمايان طور تي بهتر ٿيو آهي ۽ عالمي سيڙپڪارن سان گڏوگڏ مقامي ڪاروباري برادري به حڪومت طرفان غير ضروري رڪاوٽن جي خاتمي جي ڪوششن کي تسليم ڪري رهي آهي. وفاقي وزير چيو ته وزيراعظم جي قيادت ۾ حڪومت جامع سڌارن ذريعي ڪاروبار ۾ آساني کي هٿي ڏئي رهي آهي. هن هاڻ تائين جي اڳڀرائيءَ کي ساراهيندي سمورن ادارن کي ان ئي جذبي ۽ عزم سان ڪم جاري رکڻ جي تلقين ڪئي. اجلاس کي اسمارٽ پراجيڪٽ طرفان اڳڀرائيءَ تي تفصيلي بريفنگ، جيڪا هڪ منظم نگراني جي نظام ذريعي سڌارن جي عملدرآمد جي نگراني ۽ معاونت ۾ اهم ڪردار ادا ڪري رهي آهي. سيڙپڪاري بورڊ سمورن لاڳاپيل ڌُرين سان ويجهي سهڪار ذريعي ريگيوليٽري سڌارن جي ايجنڊا کي اڳتي وڌائڻ جي عزم جو ورجاءُ ڪيو ته جيئن پاڪستان ۾ پائيدار معاشي ترقي ۽ بهتر ڪاروباري ماحول کي يقيني بڻائي سگهجي. سيڙپڪاري بورڊ واري وفاقي وزير جي قيادت ۾ سيڙپڪارن جي سهولت ۽ ملڪ ۾ ڪاروبار ۾ آساني کي هٿي ڏيڻ لاءِ پُرعزم آهي.