معرڪه حق جي فتح سان آزادي جو جشن منفرد ۽ ٻيڻو ٿي ويو آهي: عطاءُ الله تارڙ

اسلام آباد – 13 آگسٽ (اي پي پي) اطلاعات ۽ نشريات واري وفاقي وزير عطاءُ الله تارڙ چيو آهي ته معرڪه حق جي فتح سان آزادي جو جشن منفرد ۽ ٻيڻو ٿي ويو آهي. پارليامينٽ هائوس ۾ صحافين سان ڳالهائيندي اطلاعات واري وفاقي وزير چيو ته قوم هن وقت نه رڳو آزادي جي ڏهاڙي جو جشن ملهائي رهي آهي پر معرڪه حق جي فتح جو جشن پڻ پوري جوش سان ملهايو پيو وڃي. الله تعاليٰ اسان کي آزادي جي نعمت سان نوازيو ۽ آزاد فضائن ۾ ساهه کڻڻ جو شرف بخشيو. هڪ سوال جي جواب ۾ اطلاعات واري وفاقي وزير چيو ته ننڍن ٻارن کان وٺي بزرگن تائين هر پاڪستاني سائي جهنڊيءَ هيٺ گهرن کان ٻاهر نڪتل آهي، عوام پنهنجي گهرڀاتين سان گڏ پارليامينٽ هائوس سميت ٻين اهم عمارتن آڏو قومي جهنڊن جي ڇانوَ هيٺ خوشيون ملهائي رهي آهي. هن چيو ته هن وقت اسان سڀ پاڪستاني آهيون، بحيثيت پاڪستاني قوم اسان آزادي جو جشن ملهائي رهيا آهيون. هن چيو ته هي جشن ڀارت جي لاءِ به هڪ واضح پيغام آهي ته زندهه قومون پنهنجي آزادي جو جشن ۽ فتح جي خوشي ڪهڙي انداز سان ملهائين ٿيون. هن ٻڌايو ته 14 آگسٽ تي رات 12 وڳي اسلام آباد سميت ملڪ جي مختلف شهرن ۾ شاندار آتش بازي جو مظاهرو ڪيو ويندو جنهن کي ٽي وي اسڪرينز تي سڌوسنئون ڏيکاريو ويندو. اسلام آباد ۾ به هڪ وڏي تقريب منعقد ٿي رهي آهي، جشن آزادي جي تقريبن ۾ ملي نغما ۽ پريڊ پڻ شامل هوندي. عطاءُ الله تارڙ چيو ته سڀاڻي ملڪ جي مختلف جاين تي جهنڊي ڦڙڪائڻ جون تقريبون ٿينديون، شڪڙ پڙيان پريڊ گرائونڊ ۾ به خصوصي تقريب جو اهتمام ڪيو ويو آهي، ٽي وي اسڪرينز تي رات 8 کان 12 وڳي تائين جشن جون تقريبون سڌونسئون نشر ٿينديون، پوري قوم ۽ پوري دنيا ان کي ڏسندي. اطلاعات واري وفاقي وزير پوري قوم کي جشن آزادي ۽ معرڪه حق جي فتح جي مبارڪباد ڏيندي چيو ته هي تاريخي موقعو پاڪستان جي اتحاد، عزم ۽ حوصلي جي روشن علامت آهي. هڪ سوال جي جواب ۾ هن چيو ته مري ۾ ٿيندڙ اجلاس ۾ ضمني چونڊن جي حوالي سان مشاورت ٿي هئي، مريم اورنگزيب ملڪ کان ٻاهر هئي ۽ منهنجو هڪ ڀاءُ تڪ مان اميدوار آهي، ان لاءِ آئون اجلاس ۾ شريڪ نه ٿي سگهيس.