اسلام آباد-06 آگسٽ (اي پي پي)سرڪاري ادارن بابت ڪابينه ڪميٽي جو اجلاس ناڻي واري وزارت ۾ منعقد ٿيو جنهن جي صدارت ناڻي ۽ محصولن واري وفاقي وزير سينيٽر محمد اورنگزيب آن لائن ڪئي. اجلاس ۾ هائوسنگ ۽ تعميرات واري وفاقي وزير رياض حسين پيرزاده، واپار واري وفاقي وزير ڄام ڪمال خان، ايس اي سي پي جي چيئرمين، وفاقي سيڪريٽرين ۽ لاڳاپيل وزارتن ۽ سرڪاري ادارن جي سينئر آفيسرن شرڪت ڪئي.اجلاس دوران ڪميٽي واپار واري وزارت طرفان ٽريڊنگ ڪارپوريشن آف پاڪستان (ٽي سي پي) جي بورڊ جي خالي آسامين کي ڀرڻ جي تجويز جو جائزو ورتو ۽ منظوري ڏني. ڪميٽي عاصم عزيز صديقي کي ٽي سي پي بورڊ جو چيئرمين، عائشه عزيز کي آزاد ڊائريڪٽر ۽ شعيب مير ميمڻ کي پاڪستان ري انشورنس ڪمپني لميٽيڊ (پي آر سي ايل) جي بورڊ جو چيئرمين نامزد ڪرڻ جي توثيق ڪئي. ڪميٽي لاڳاپيل وزارتن سميت ناڻي واري وزارت کي هدايت ڪئي ته سرڪاري ادارن جي بورڊز جي مقررين جي عمل جو جائزو ورتو وڃي ۽ ان ۾ بهتري آندي وڃي، مقرري جي عمل کي عهدو ڇڏڻ کان اڳ ئي وقت سر شروع ڪيو وڃي ته جيئن انتظامي خال کان بچي سگهجي ۽ تلسل کي يقيني بڻائي سگهجي. ان کانسواءِ ڪميٽي مواصلات واري وزارت جي تجويز تي پوسٽل لائف انشورنس ڪپمني لميٽيڊ جي بورڊ آف ڊائريڪٽرز ۾ 3 ايڪس آفيشيو (عهدي جي لحاظ کان) ميمبرن جي مقرري جي منظوري ڏني. ڪميٽي مواصلات واري وزارت کي هدايت ڪئي ته هو آزاد ڊائريڪٽرز مان ڪنهن هڪ کي چيئرمين نامزد ڪرڻ لاءِ سمري پيش ڪري ته جيئن بورڊ کي فعال بڻائي سگهجي ۽ ڪمپني جي نئين سر جوڙجڪ ۽ امڪاني خاتمي بابت فيصلن ۾ اڳڀرائي ٿي سگهي، ڇاڪاڻ ته هي ادارو هاڻي به نجڪاري جي فهرست ۾ شامل آهي. اجلاس دوران ڪميٽي صنعت ۽ پيداوار واري وزارت طرفان سمال اينڊ ميڊيم انٽرپرائيز ڊولپمينٽ اٿارٽي(سميڊا) جي بورڊ جي ٻيهر جوڙجڪ جي تجويز جو به جائزو ورتو. ڪميٽي نجي شعبي کان 6 آزاد ڊائريڪٽرز جي مقرري جي منظوري ڏني جن ۾ سيف علي رستگار (پنجاب) مشهود خان (سنڌ)، عثمان سيف اله خان (خيبرپختونخوا)، اسرار خان ڪاڪڙ (بلوچستان) آسيه ساحل خان (عورتن جي نمائندگي) ۽ ڊاڪٽر سيد ظهور حسن (ترقي وارو شعبو) شامل آهن. اجلاس ۾ سائنس ۽ ٽيڪنالاجي واري وزارت طرفان سائنٽيفڪ اينڊ ٽيڪنالاجيڪل ڊولپمينٽ ڪارپوريشن آف پاڪستان جي نئين سر جوڙجڪ ۽ ان جو نئون نالو ”مقامي تحقيق ۽ ترقي بابت ادارو“ (آءِ آر اي ڊي اي) رکڻ جي باري ۾ بريفنگ سان ٿيو جيڪو ڪميٽي جي پهرين ئي ڪيل فيصلي جي روشني ۾ ڪيو ويو هو. ڪميٽي جي چيئرمين انهن سڌارن وارن قدمن کي ساراهيندي چيو ته ان جو مقصد اداري جي ڪارڪردگي کي بهتر بڻائڻ آهي. هن اميد ظاهر ڪئي ته آءِ آر اي ڊي اي پنهنجي مقرر ڪيل مينڊيٽ کي ڀرپور انداز ۾ پورو ڪندو ۽ قومي جدت جي نظام ۾ موثر ڪردار ادا ڪندو.
