گڏيل قومون-06 آگسٽ (اي پي پي) پاڪستان غزه ۾ حالتون لڳاتار خراب ٿيڻ کانپوءِ گڏيل قومن جي سلامتي ڪائونسل کان مطالبو ڪيو آهي ته اها اسرائيل جي وحشياڻي جنگ ۽ فلسطيني عوام کي درپيش تڪليفن جي خاتمي لاءِ قدم کڻي. اها ڳالهه گڏيل قومن ۾ پاڪستان جي مستقل نمائندي عاصم افتخار احمد 15 رڪني سلامتي ڪائونسل ۾ وچ اوڀر جي صورتحال تي منعقد مباحثي ۾ خطاب ڪندي چئي. هن چيو ته سڄي دنيا بي يقيني جي عالم ۾ اهو سڀ ڪجهه ڏسي رهي آهي. هن چيو ته غزه ۾ جاري اسرائيلي جنگ سڀ کان وڌيڪ نقصان عام شهرين کي پهچايو آهي. انڌا ڌنڌ قتل عام، سموري آبادي کي بک مارڻ، غزه ۾ ڦاٿل ماڻهن کي اجتماعي سزا ڏيڻ جو ڪو به سبب پيش نٿو ڪري سگهجي. اهي قدم نه رڳو اخلاقي طور تي قبولڻ نه ڪرڻ جوڳو آهي پر جنيوا ڪنوينشنز سميت ٻين عالمي قانونن جي ڀڃڪڙي پڻ آهي. جڏهن ته انصاف جي عالمي عدالت جي واضح قدمن جي پڻ ڀڃڪڙي آهي. پاڪستاني نمائندي اسرائيلي يرغمالين کي آزادي جو مطالبو ڪندي چيو ته غزه ۾ جاري اسرائيلي جنگ ۾ 60 هزار فلسطيني شهيد ٿي چڪا آهن جن ۾ 18500 ٻار شامل آهن. جنگ شروع ٿيڻ کانپوءِ فلسطيني ۾ هڪ ڪلاڪ ۾ هڪ کان وڌيڪ جي شرح سان بي گناهه ماڻهن کي شهيد ڪيو پيو وڃي. هن ان ڳالهه جي نشاندهي ڪئي ته اٽڪل 9 هزار 500 فلسطيني جن ۾ سوين ٻار ۽ عورتون پڻ شامل آهن، هن وقت اسرائيلي قيد ۾ آهن. پاڪستاني نمائندي غزه جي اسرائيلي ناڪابندي جي خوفناڪ نتيجن ڏانهن سلامتي ڪائونسل جو ڌيان ڇڪائيندي چيو ته اسرائيلي گهيراءُ سبب 93 ٻارن سميت 175 فسلطيني بک سبب شهيد ٿي چڪا آهن. هن چيو ته مئي کان وٺي هن وقت تائين امداد حاصل ڪرڻ لاءِ گڏ ٿيندڙ فلسطينين تي اسرائيلي بمباري ۾ 12 سئو کان وڌيڪ ماڻهو شهيد ٿي چڪا آهن. پاڪستاني نمائندي چيو ته شهرين خلاف اها جنگ ختم ٿيڻ گهرجي. هن چيو ته پاڪستان فوري طور تي غير مشروط مستقل جنگ بندي ۽ مڪمل طور تي اسرائيل جو غزه مان نڪرڻ، يرغمالين جي آزادي سميت بنا ڪنهن رڪاوٽ جي انساني امداد جي رسائي جو مطالبو ڪيو آهي. هن چيو ته مصر، قطر ۽ آمريڪا جي ٽياڪڙي ۾ جنگ بندي جي معاهدي جي شروعاتي مرحلي جي نتيجي ۾ 33 يرغمالين کي آزاد ڪيو ويو جڏهن ته اسرائيل پاران هڪ طرفي طور تي جنگ بندي کي معطل ڪرڻ سبب وڌيڪ يرغمالي آزاد نه ٿي سگهيا. هن چيو ته اسان سلامتي ڪائونسل جي ٺهراءُ 2735 تي مڪمل طور تي عملدرآمد جو مطالبو ڪريون ٿا. پاڪستاني نمائندي عاصم افتخار پائيدار ۽ منصفاڻي سياسي حل تي زور ڀريندي چيو ته پائيدار امن لاءِ ضروري آهي ته عالمي قانونن جي بنياد تي 1967ع کان اڳ جي سرحدن تي ٻڌل هڪ خودمختياري، قابل عمل ۽ جاگرافيائي طور تي جامع فلسطيني رياست قائم ٿئي جنهن جي گادي وارو شهر القدس الشريف هجي. پاڪستاني نمائندي چيو ته عالمي ڪانفرنس جنهن ۾ ٻه رياستي حل جي حمايت ڪئي وئي رڳو هڪ شروعات آهي، اصل ضرورت هاڻي عمل قدم کڻڻ جي آهي ته جيئن سالن تي ٻڌل رتوڇاڻ ۽ تڪليفن جو خاتمو ٿئي ۽ وچ اوڀر ۾ پائيدار امن جو بنياد رکي سگهجي.
