گڏيل قومون-06 آگسٽ (اي پي پي) گڏيل قومن خبردار ڪيو آهي ته جيڪڏهن اسرائيل پنهنجي فوجي ڪاررواين جو دائرو غزه جي پوري پٽي تائين وڌايو ته ان جا خطرناڪ نتيجا نڪرندا. ميڊيا رپورٽن موجب گڏيل قومن جي يورپ مرڪزي ايشيا ۽ آمريڪا جي اسسٽنٽ سيڪريٽري جنرل سلامتي ڪائونسل کي بريفنگ ڏيندي چيو ته اسرائيل جو نئون قدم لکين فلسطينين لاءِ تباهي آڻڻ سميت غزه ۾ موجود باقي اسرائيلي يرغمالين جي زندگين کي وڌيڪ خطري ۾ وجهي سگهي ٿو. هن عالمي قانونن جو حوالو ڏيندي چيو ته غزه مستقبل جي فسلطيني رياست جو ورهاست نه ٿيڻ جوڳو حصو آهي ۽ اهو ئي عالمي قانونن جو واضح موقف آهي. هن انصاف جي عالمي عدالت جولاءِ 2024ع جي فيصلي جو ذڪر ڪندي چيو ته اسرائيل تي اها ذميواري لاڳو ٿئي ٿي ته هو نئين آبادڪارين کي فوري طور تي بند ڪري ۽ والاريل فلسطيني علائقن مان پنهنجي آبادڪارن کي ڪڍڻ ۽ اتي غير قانوني طور تي پنهنجي موجودگي جو جلد کان جلد خاتمو ڪري. هن وڌيڪ چيو ته غزه ۾ صورتحال انتهائي خراب آهي ۽ فلسطيني روزاني غير انساني ۽ بدترين حالتن کي منهن ڏئي رهيا آهن. هن اسرائيل کان مطالبو ڪيو ته هو انساني امداد جي فوري، تيز ۽ بنا ڪنهن رڪاوٽ جي داخلا جي اجازت ڏي ته جيئن وڌيڪ فوتگين ۽ تڪليفن کي روڪي سگهجي.
