اسلام آباد -20 مئي (اي پي پي) صنعت ۽ پيداوار بابت وزيراعظم جي خاص معاون هارون اختر خان سان مشهور برطانوي ماهر اقتصاديات پروفيسر اسٽيفن ڊرڪون ملاقات ڪئي. اسلام آباد ۾ ٿيل ان ملاقات ۾ پاڪستان جي معيشت کي درپيش چئلينجز، موقعن ۽ صنعتي ترقي جي امڪانن تي ڳالهيون ڪيون. ملاقات دوران ميڪرو اڪنامڪس، مٽاسٽا جي ناڻي جي ذخيرن، روانگي واپار ۽ آمدني واپار ۽ صنعتي پاليسي جهڙن اهم معاملن تي بحث ٿيو. هارون اختر خان چيو ته ماضي ۾ ٽيڪس جي شرح ۽ مهانگي بجلي صنعتي شعبي کي سخت نقصان پهچايا، جڏهن ته وزيراعظم جي خصوصي هدايتن تي ڪمزور صنعتن جي بحالي لاءِ جامع قدم کنيا وڃن. پروفيسر اسٽيفن ڊرڪون چيو ته پاڪستان کي اهڙي صنعتي پاليسي جوڙڻ گهرجي جيڪا هڪ طرف صنعتن کي تحفظ فراهم ڪري ۽ ٻئي پاسي پيداواري سرگرمين کي هٿي وٺائڻ لاءِ ترغيبون به ڏئي. هن چيو ته علائقائي مقابلي جي فضا ۾ پاڪستاني صنعتن کي برقرار رکڻ لاءِ هڪ مستقل ۽ ڏور رس پاليسي ضروري آهي. هارون اختر چيو ته ملڪي ترقي ۽ روزگار جا موقعا پيدا ڪرڻ لاءِ صنعتي شعبي ۾ سيڙپڪاري اڻٽر آهي ۽ حڪومت ان مقصد لاءِ هر ممڪن قدم کڻي رهي آهي.
