ڪراچي-16 اپريل (اي پي پي) سنڌ جي وڏي وزير سيد مراد علي شاهه ڌاٻيجي اسپيشل اڪنامڪ زون جي اسٽريٽجيڪ اهميت تي زور ڏيندي چيو آهي ته هي سنڌ کي عالمي سيڙپڪارن لاءِ هڪ اهم مرڪز طور مقام ڏيڻ ۾ مددگار ثابت ٿيندو. هن چيو ته ڌاٻيجي اسپيشل اڪنامڪ زون جيڪو سي پيڪ جو ترجيحي منصوبو آهي، 2-3 ارب ڊالر جي سيڙپڪاري آڻيندو ۽ هڪ لک سڌي ريت ۽ اڻ سڌي طرح نوڪريون پيدا ڪندو، ان سان گڏوگڏ هن خطي جي سماجي ۽ اقتصادي حالتن کي بھتر ڪندو. اهڙو اظهار هن ڪالهه ڌاٻيجي اسپيشل اقتصادي زون جي اڳڀرائي جو جائزو وٺڻ لاءِ هڪ اعليٰ سطحي اجلاس جي صدارت دوران ڪيو. هن چيو ته سنڌ کي ان موقعي مان فائدو حاصل ڪرڻ گهرجي ته جيئن غير ملڪي صنعتون خاص ڪري چيني ڪمپنيون، جيڪي مستحڪم، ڪاروبار دوست ماحول جي ڳولا ۾ آهن، کي ڌيان وٺرائي سگهجي. هن لاڳاپيل کاتن کي زور ڀريو ته اهي بنيادي اسٽرڪچر جي ترقي کي تيز ڪن ۽ سيڙپڪارن جي سهولتن جي نظام کي عالمي معيار مطابق يقيني بڻائين. ان موقعي تي اجلاس کي ٻڌايو ويو ته اسپيشل اڪنامڪ زون ۾ تعميراتي ڪم اٽڪل 12 سيڪڙو تائين پهچي چڪو آهي جڏهن ته بجلي جو ڪم، 10 ايم جي ڊي پاڻي جي پائپ لائن پچھائڻ ۽ گيس جو بنيادي ڪم اٽڪل مڪمل آهي. اجلاس ۾ وڏي وزير تعميراتي ڪم جي رفتار کي تيز ڪرڻ ۽ پروجيڪٽ جي سڀني اهم حصن بابت باقاعده اپڊيٽس مهيا ڪرڻ جي هدايت ڪئي. اجلاس ۾ وڏي وزير جو خاص مددگار سيد قاسم نويد قمر، چيف سيڪريٽري سيد آصف حيدر شاهه، چيئرمن پلاننگ اينڊ ڊولپمينٽ نجم احمد شاهه، ڊي جي پي پي پي يونٽ ۽ سي اي او عبدالعظيم عقيلي شرڪت ڪئي.
