ڪراچي- 13 جنوري (اي پي پي) سنڌ جي سينيئر وزير شرجيل انعام ميمڻ چيو آهي ته نئون سال 2025 سنڌ حڪومت جي ترقي جو سال آهي. ڪراچي سميت سڄي سنڌ ۾ وڏا وڏا ترقياتي منصوبا جاري آهن. پاڪستان پيپلز پارٽي چيئرمين بلاول ڀٽو زرداري پاران افتتاح کان پوءِ شاهراهه ڀٽو جو پهريون مرحلو عوام لاءِ کوليو ويو آهي. ييلو لائن بي آر ٽي تي به ڪم جاري آهي ۽ رات ڏينهن ڪم جو سلسلو هلي رهيو آهي. اميد آهي ته ييلو لائن بي آر ٽي جي مختلف حصن تي ڪم مقرر وقت کان اڳ مڪمل ڪيو ويندو. سنڌ اسيمبلي ميڊيا ڪارنر ۾ صحافين سان ڳالهائيندي شرجيل انعام ميمڻ چيو ته ٽرانسپورٽ کاتي پاران بس ڊپوءَ تي به ڪم جاري آهي. سنڌ حڪومت ڪراچي جي شهرين لاءِ هن سال ڊبل ڊيڪر بسون به آڻي رهي آهي. نوجوانن لاءِ اي وي ٽيڪسي سروس پڻ شروع ڪرڻ جي تياري ڪئي پئي وڃي، جتان ماڻهن کي آسان قسطن تي ٽيڪسيون فراهم ڪيون وينديون. هن وڌيڪ چيو ته سنڌ حڪومت صوبي ۾ وڏي پيماني تي رستن جي ڪم کي تيز رفتاري سان جاري رکي رهي آهي. صحت جي شعبي ۾ سنڌ حڪومت جيڪو ڪم ڪري رهي آهي، اهو پاڪستان جي ڪنهن به ٻي حصي ۾ نه ٿي رهيو آهي. ڪراچي ۾ پاڻي جي مسئلي جي حل لاءِ حب ڪئنال تي به تيزي سان ڪم جاري آهي. سينيئر وزير شرجيل انعام ميمڻ چيو ته جيئن پنجاب، خيبرپختونخواهه ۽ اسلام آباد جي صحافين کي سنڌ حڪومت جي منصوبن جي دوري تي وٺي ويا، ساڳي طرح سنڌ جي صحافين کي به دورا ڪرائڻ جا ارادا آهن. سنڌ حڪومت جي سڀني کاتن ۾ تيزي سان ڪم هلي رهيو آهي. توانائي جي شعبي ۾ سيد ناصر حسين شاهه بهترين ڪم ڪري رهيا آهن. وڏي وزير واضح ڪيو آهي ته ڊي سيلينيشن پلانٽ تي ڪم جاري آهي، جنهن تحت سامونڊي پاڻي کي صاف ڪري عوام تائين پهچايو ويندو. بلاول ڀٽو زرداري سڀني وزيرن کي هدايت ڪئي آهي ته چونڊ مهم ۾ عوام سان ڪيل واعدن مطابق سڀني سهولتن جي فراهمي کي يقيني بڻايو وڃي. هڪ سوال جي جواب ۾ سينيئر وزير چيو ته وڏي وزير بزنس ڪميونٽي کي همٿايو آهي ته اهي اڳتي اچن ۽ مختلف شعبن ۾ سيڙپ ڪن. سنڌ حڪومت مختلف ڪمپنين سان ڳالهيون ڪري رهي آهي ته اهي پاڪستان ۾ سيڙپ ڪن. آءِ ايم ايف جي شرط سبب في الحال وڌيڪ صنعتي زون نه ٺهي سگهندا. ملڪي ۽ پرڏيهي سيڙپڪارن ۽ ڪاروباري ماڻهن لاءِ ڌاٻيجي اسپيشل اڪنامڪ زون بهترين موقعو آهي، جتي چيني سيڙپڪارن به دلچسپي ظاهر ڪئي آهي. هڪ ٻئي سوال جي جواب ۾ هن چيو ته هر کاتي لاءِ الڳ ترجمان هجي ته اها بهتر ڳالهه آهي. هي ڪا نئين روايت ناهي. شرجيل انعام ميمڻ چيو ته پيپلز پارٽي جي قيادت واضح ڪري چڪي آهي ته سنڌو درياءَ تي اهڙي قسم جي ڪئنالن کي قبول نه ڪيو ويندو. پي ٽي آءِ باني بابت هن چيو ته سندس خلاف ڪيس غلط نه آهن، هن گهڙي ورتي ۽ وڪڻي ڪوڙو بيان ڏنو. جڏهن کيس گرفتار ڪرڻ جي ڪوشش ٿي ته پوليس تي پيٽرول بم سان حملو ڪيو ويو. سرڪار واضح ڪيس به اڃا داخل نه ڪيا آهن. پيپلز پارٽي ڳالهين جي حق ۾ آهي پر اهو مطلب ناهي ته 9 مئي جهڙن ڏوهن کان ڇوٽڪارو ملي سگهي. حڪومت يا نواز ليگ مُخالف ڌُر سان ڳالهائيندي ته ان کي ساراهيون ٿا.
