رياض-06 سيپٽمبر (اي پي پي) سعودي عرب ۽ ڀارت گڏيل فوجي سهڪار وڌائڻ تي خيالن جي ڏي وٺ ڪئي. پرڏيهي خابرو اداري موجب گادي واري هنڌ رياض ۾ منعقد دفاعي سهڪار ڪميٽي جي اجلاس ۾ ٻنهي ملڪن جي هٿيار بند فوج وچ ۾ تربيت ۽ تجربن، گڏيل فوجي مشقن ، دفاعي صنعتن ، تحقيق، ترقي ۽ ٻين شعبن ۾ گڏيل سهڪار کي وڌائڻ جي طريقن تي خيالن جي ڏي وٺ ڪئي وئي. ٻنهي ملڪن وچ ۾ اسٽريٽجڪ حصيداري کي مضبوط بڻائڻ جي اهميت تي زور ڀريو ويو ته سمورن شعبن ۾ تعلق کي اهڙي طرح ترقي ڏيڻ جو عمل جاري رکيو وڃي جيڪو ٻنهي ملڪن ۽ ان جي عوام جي گڏيل مفادن ۾ هجي. سعودي پارٽنر شپ ڪائونسل سعودي عرب جي ويزن 2030ع تحت ڀارت جي اهم قدمن ، ميڪ ان انڊيا، اسٽارٽ فرام انڊيا، ڪلين انڊيا ۽ ڊجيٽل انڊيا سميت هم آهنگي ذريعي ٻنهي ملڪن وچ ۾ سهڪار کي هٿي ڏني آهي. سعودي عرب ۽ ڀارت سمورن سياسي ۽ اقتصادي سطح ۽ سيڪيورٽي ۽ دفاع جي شعبن ۾ مضبوط تاريخي لاڳاپن ۽ گڏيل سهڪار جو ورجاءُ ڪن ٿا.
