تهران-09 جولاءِ (اي پي پي) ايران چيو آهي ته اسرائيل جي حملي جي صورت ۾ هو لبنان کي مدد فراهم ڪندو. تاس مطابق ايراني پرڏيهي وزارت جي ترجمان ناصر ڪنعاني ايران جي نئين صدر جي چونڊ بعد پهرين پريس ڪانفرنس دوران چيو ته لبنان خلاف ڪنهن به قسم جي جارحيت خطي ۾ عدم استحڪام ۽ ڇڪتاڻ ۾ واڌ جو سبب بڻجندي. جنهن جو مطلب اسرائيل جو حملو سڄي دنيا ۽ خطي کي متاثر ڪري سگهي ٿو. لبنان جي حمايت ايران جي پرڏيهي پاليسي جو اهم نقطو آهي. هن ايران جي روحاني پيشوا آيت الله علي خامنه اي جي صلاحڪار ۽ ايران جي پرڏيهي معاملن بابت اسٽريٽجڪ ڪائونسل جي سربراهه ڪمال خرازي جي 2 جولاءِ جي بيان جو حوالو ڏنو جنهن ۾ هن چيو هو ته جيڪڏهن اسرائيل لبنان خلاف مڪمل جنگ شروع ڪري ٿو ته ايران حزب الله تحريڪ جي پوري طاقت سان حمايت ڪندو.
