بيروت-01 جولاءِ (اي پي پي) سعودي عرب جي اختيارين لبنان ۾ رهندڙ پنهنجن شهرين کي چيو آهي ته ڏکڻ واري علائقي جي صورتحال کي نظر ۾ رکندي لبنان کي ڇڏي ڏين. ايس پي اي بيروت ۾ سعودي سفارت خاني مان جاري ڪيل بيان جي حوالي سان ٻڌايو ته مملڪت ڏکڻ لبنان جي حالتن تي نظر رکي آهي. سعودي شهري علائقي جو سفر ڪرڻ کان پاسو ڪن ۽ جيڪي اتي موجود آهن جلدي اتان نڪري وڃن. بيان ۾ چيو ويو آهي ته شهري ضرورت ۽ ڪنهن هنگامي صورت حال ۾ سفارتخاني سان رابطو ڪري سگهن ٿا. واضح رهي ته غزه ۾ جنگ شروع ٿيڻ کان پوءِ ڌرين وچ ۾ روزانو فائرنگ جي ڏي وٺ ٿي رهي آهي. ٻئي پاسي اسرائيلي فوج جو چوڻ آهي ته لبنان تي حملي جي منصوبي جي منظوري ۽ توثيق ٿي چڪي آهي.
