اسلام آباد - 23 آڪٽوبر (اي پي پي) وزيراعظم محمد شهباز شريف لائيو اسٽاڪ ۽ ڊيري ڊيولپمينٽ بورڊ جي نئين سر جوڙجڪ جي منظوري ڏيندي هدايت ڪئي آهي ته لائيو اسٽاڪ اينڊ ڊيري ڊيولپمينٽ بورڊ جي چيئرمين ۽ ميمبرن جي چونڊ شفاف ۽ ميرٽ جي بنياد تي ڪئي وڃي، بورڊ ۾ نجي شعبي جي قابل ۽ تجربيڪار ماهرن کي شامل ڪري ان کي موثر ۽ فعال ادارو بڻايو وڃي. جمعي …
وزيراعظم لائيو اسٽاڪ ۽ ڊيري ڊيولپمينٽ بورڊ جي نئين سر جوڙجڪ جي منظوري ڏيئي ڇڏي
اسلام آباد – 23 آڪٽوبر (اي پي پي) وزيراعظم محمد شهباز شريف لائيو اسٽاڪ ۽ ڊيري ڊيولپمينٽ بورڊ جي نئين سر جوڙجڪ جي منظوري ڏيندي هدايت ڪئي آهي ته لائيو اسٽاڪ اينڊ ڊيري ڊيولپمينٽ بورڊ جي چيئرمين ۽ ميمبرن جي چونڊ شفاف ۽ ميرٽ جي بنياد تي ڪئي وڃي، بورڊ ۾ نجي شعبي جي قابل ۽ تجربيڪار ماهرن کي شامل ڪري ان کي موثر ۽ فعال ادارو بڻايو وڃي. جمعي ڏينهن وزيراعظم آفيس جي ميڊيا ونگ پاران جاري پڌرائي موجب وزيراعظم محمد شهباز شريف جي صدارت ۾ لائيو اسٽاڪ جي شعبي ۾ سڌارن، لائيو اسٽاڪ اينڊ ڊيري ڊيولپمينٽ بورڊ جي نئين سر جوڙجڪ ۽ سمهاڙي جي بيماري جي خاتمي جي لاءِ قدمن جو جائزه اجلاس هتي منعقد ٿيو. وزيراعظم بورڊ جي نئين سر تنظيم سازي جي لاءِ شفاف ۽ ميرٽ تي ٻڌل طريقيڪار اختيار ڪرڻ، نجي شعبي جي ماهرن کي شامل ڪرڻ ۽ سمهاڙي جي بيماري جي خاتمي لاءِ واضح هدفن، قابل پيمائش نتيجن ۽ مقرر مدي تي ٻڌل ايڪشن پلان پيش ڪرڻ جي هدايت ڪئي. وزيراعظم چيو ته لائيو اسٽاڪ ۽ ڊيري جي شعبي جي ترقي جي لاءِ عالمي معيار جي ڪنسلٽنٽس جون خدمتون حاصل ڪيون وڃن ۽ ان شعبي ۾ مهارت رکندڙ ملڪن سان حصيداري کي فروغ ڏنو وڃي. هن زور ڀريو ته جانورن جي صحت، نسل جي واڌ، پيداوار ۽ ويليو چين ۾ بهتري جي ذريعي پاڪستان جي برآمدي صلاحيت مان ڀرپور فائدو کنيو وڃي جنهن سان ڳوٺاڻي معيشت ۽ روزگار جي موقعن کي پڻ هٿي ملندي. وزيراعظم چيو ته سمهاڙي جي بيماري جي مڪمل خاتمي جي لاءِ واضح هدف ۽ مقرر مدي تي ٻڌل جامع ايڪشن پلان پيش ڪيو وڃي، وفاقي حڪومت پنهنجي وسيلن سان چوپائي مال جي لاءِ جديد ۽ موثر ويڪسين جي پيداوار جو پلانٽ اسلام آباد ۾ قائم ڪري رهي آهي، لائيو اسٽاڪ ۽ ڊيري جي شعبي جي ترقي جي لاءِ عالمي معيار جي ڪنسلٽنٽس جون خدمتون حاصل ڪيون وڃن ۽ لاڳاپيل ملڪن جي تجربن مان فائدو کنيو وڃي. وزيراعظم چيو ته پاڪستان ۾ لائيو اسٽاڪ جي شعبي ۾ وسيع صلاحيت موجود آهي، ان کي روانگي واپار ۽ معاشي ترقي جي لاءِ استعمال ۾ آندو وڃي. اجلاس ۾ بورڊ جي نئين سر تنظيم سازي، جانورن جي بيمارين جي نگراني، ويڪسينيشن، جانورن جي سڃاڻپ ۽ ٽريس ايبلٽي ۽ گوشت ۽ ڊيري مصنوعات جي روانگي واپار وڌائڻ جي قدمن تي بريفنگ ڏني وئي. اجلاس ۾ وفاقي وزيرن اعظم نذير تارر، احد خان چيما، راڻا تنوير حسين، ڊاڪٽر مصدق ملڪ، عطاءُ الله تارڙ، مملڪتي وزير بلال اظهر ڪياني ۽ لاڳاپيل ادارن جي اعلى عملدارن شرڪت ڪئي.
