پاڪستان جي زرعي شين جي لاءِ عالمي منڊين تائين پهچ وڌائڻ ۽ نيون منڊيون ڳولڻ لاءِ جامع قدم کنيا وڃن: وزيراعظم شهباز شريف

اسلام آباد- 11 سيپٽمبر (اي پي پي) وزيراعظم شهباز شريف في ايڪڙ زرعي پيداوار ۾ اضافي، زراعت ۾ جدت آڻڻ، لائيو اسٽاڪ جي شعبي جي ترقي ۽ زرعي برآمدات جي فروغ جي لاءِ وفاق ۽ صوبن جي وچ ۾ موثر رابطي ۽ ڀائيواري جي ضرورت تي زور ڏيندي چيو آهي ته پاڪستان جي زرعي شين جي لاءِ عالمي منڊين تائين پهچ وڌائڻ ۽ نيون منڊيون ڳولڻ لاءِ جامع قدم کنيا وڃن. جمعي ڏينهن وزيراعظم آفيس جي پريس ونگ پاران جاري ڪيل بيان موجب، وزيراعظم محمد شهباز شريف جي صدارت ۾ زرعي شعبي ۽ زرعي برآمدات جي فروغ جي حوالي سان اعليٰ سطحي اجلاس منعقد ٿيو. اجلاس کي خطاب ڪندي وزيراعظم چيو ته زرعي شعبي جو پاڪستان جي معيشت جي ترقي ۽ استحڪام ۾ اهم ڪردار آهي. في ايڪڙ زرعي پيداوار ۾ اضافي، زراعت ۾ جدت آڻڻ، لائيو اسٽاڪ جي شعبي جي ترقي ۽ زرعي برآمدات جي فروغ لاءِ وفاق ۽ صوبن جي وچ ۾ موثر رابطو ۽ ڀائيواري ضروري آهي. وزيراعظم زرعي برآمدات جي فروغ لاءِ پاڪستان جي پرڏيهي ملڪن ۾ مشنز ۾ مقرر ڪمرشل آفيسرن کي موثر ڪردار ادا ڪرڻ جي هدايت ڪئي. وزيراعظم آبادگارن کي فصلن جي نگراني لاءِ موجود موبائل ايپ جي حوالي سان آگاهي وڌائڻ جي لاءِ موثر ميڊيا مهم هلائڻ جي به هدايت ڪئي. هن چيو ته زرعي شعبي جي برآمدات وڌائڻ لاءِ زرعي شين ۾ ويليو ايڊيشن تمام گهڻي ضروري آهي. اجلاس ۾ زرعي شعبي جي فروغ ۽ زرعي برآمدات وڌائڻ لاءِ تجويزون پيش ڪيون ويون. اجلاس کي بريفنگ ۾ ٻُڌايو ويو ته گذريل مالي سال ۾ پاڪستان جي زرعي شعبي جو روانگي واپار 5.18 ارب ڊالر رهيو. چانور، مڇي، حلال گوشت، پٽاٽا، تِل، تماڪ، انب ۽ مڪئي پاڪستان جون نمايان زرعي برآمدات رهيُون. اجلاس ۾ زرعي برآمدات ۾ اضافي جي لاءِ ويليو چين جوڙڻ جي تجويز ڏني وئي ۽ ٻڌايو ويو ته چين، سعودي عرب، ايران ۽ نار ملڪ پاڪستان جي زرعي برآمدات جي حوالي سان اهم ملڪ آهن. نيشنل اگريڪلچر اينڊ فُوڊ سيڪيورٽي ڪائونسل کي فعال ڪيو ويندو. اجلاس کي ٻڌايو ويو ته نيشنل اگريڪلچر اينڊ فُوڊ سيڪيورٽي ڪائونسل ۾ وڏا وزير پنهنجي پنهنجي صوبن جي نمائندگي ڪندا. اجلاس ۾ ڊجيٽل فارمرز ڊائري-ايگري اسٽيڪ جوڙڻ جي پُڻ تجويز ڏني وئي جنهن تحت سڄي ملڪ جي آبادگارن ۽ زرعي زمين جي رڪارڊ کي ڊجيٽائز ڪيو ويندو. ڊجيٽل فارمرز ڊائري-ايگري اسٽيڪ تحت، زمين ۽ پاڻي جي جانچ جا رڪارڊ ڊجيٽائز ڪيا ويندا، بهتر نتيجن وارن زرعي طريقن جي فروغ لاءِ پاڪ-گيپ (پاڪستان-گڊ ايگريڪلچر پريڪٽسز) نظام جوڙيو ويندو. بريفنگ ۾ وڌيڪ ٻڌايو ويو ته زرعي شعبي جي روانگي واپارين کي فروغ ڏيڻ لاءِ زرعي فنانسنگ جي حوالي سان سهولتون فراهم ڪيون وينديون. اجلاس ۾ منصوبابندي واري وفاقي وزير احسن اقبال، قومي خوراڪ جي تحفظ واري وفاقي وزير راڻا تنوير حسين، اقتصادي معاملن واري وفاقي وزير احد خان چيما، موسمياتي تبديلي واري وفاقي وزير مصدق ملڪ، واپار واري وفاقي وزير ڄام ڪمال خان، اطلاعات ۽ نشريات واري وفاقي وزير عطاءُ الله تارڙ، انفارميشن ٽيڪنالاجي ۽ ٽيليڪام واري وفاقي وزير شزه فاطمه، صنعتن ۽ پيداوار واري صلاحڪار هارون اختر، ناڻي ۽ ريلوي واري مملڪتي وزير بلال اظهر ڪياني، قومي خوراڪ جي تحفظ واري مملڪتي وزير ملڪ رشيد احمد ۽ لاڳاپيل اعليٰ سرڪاري عملدارن شرڪت ڪئي.