بورڊ آف انويسٽمينٽ واري وفاقي وزير قيصر احمد شيخ جو پيوان اڪنامڪ پاليسي چئلينج 2026ع کي خطاب، علم کي عملي حل ۾ تبديل ڪرڻ تي زور

اسلام آباد-09 سيپٽمبر (اي پي پي) بورڊ آف انويسٽمينٽ واري وفاقي وزير قيصر احمد شيخ، پاڪستان جي معاشي ترقي لاءِ علم، تحقيق ۽ پاليسي تجويزن کي عملي ۽ عمل جوڳي حل ۾ تبديل ڪرڻ جي اهميت تي زور ڀريو آهي. وفاقي وزير اسلام آباد ۾ منعقد پيوان اڪنامڪ پاليسي چئلنج 2026ع جي پڄاڻي واري تقريب کي خطاب ڪندي انتظاميه جو شڪريو ادا ڪيو ته انهن کيس ان اهم موقعي تي خيالن جي اظهار جي دعوت ڏني. هن مختلف تعليمي ۽ پيشيواراڻي پس منظر رکندڙ نوجوان ماهرن ۽ اڳوڻن شاگردن کي هڪ پليٽ فارم تي گڏ ڪرڻ تي ميزبان ادارن کي ساراهيو. تقريب آمريڪي سفارتخاني، يونائيٽڊ سٽيٽس ايجوڪيشنل فائونڊيشن ان پاڪستان(يوسف)، پاڪستان – آمريڪا اڳوڻي شاگرد نيٽ ورڪ(پيوان) ۽ اڪائونٽيبلٽي ليب پاڪستان جي سهڪار سان منعقد ڪئي وئي. وفاقي وزير چيو ته علم جو هجڻ اهم آهي، پر علم جو اصل قدر ان وقت سامهون ايندو آهي جڏهن اسان عملي مسئلي تي لاڳو ٿيندي مناسب حل تلاش ڪرڻ جي قابل هجون. هن وڌيڪ چيو ته جيڪڏهن توهان وٽ علم آهي ۽ توهان صورتحال جو درست جائزو وٺندا آهيو ته توهان مناسب حل پيش ڪري سگهو ٿا. ڪراچي چيمبر آف ڪامرس اينڊ انڊسٽري جي اڳوڻي صدر جي حيثيت سان پنهنجي تجربي ۽ حڪومت ۾ موجوده ذميوارين جو حوالو ڏيندي وفاقي وزير چيو ته معاشي ۽ ڪاروباري مسئلن جو درست ۽ جامع جائزو موثر پاليسي سازي لاءِ بنيادي اهميت رکي ٿو. هن چيو ته شرڪت ڪندڙ پنهنجي تعليمي ۽ پيشيواراڻي زندگي دوران جيڪو علم ۽ تجربو حاصل ڪيو آهي، ان کي هاڻي حقيقي دنيا جي مسئلن جي حل، پاليسي سازي ۽ ملڪي معاشي ترقي ۾ استعمال ۾ آڻڻ گهرجي. وفاقي وزير پاڪستان لاءِ آمريڪا جي تعاون کي ساراهيندي ٻنهي ملڪن وچ ۾ عوامي، تعليمي ۽ پيشيواراڻي رابطن جي ڊگهي تاريخ کي اجاگر ڪيو. گذريل 2 سالن دوران حڪومت طرفان خاص طور تي عالمي مالياتي فنڊ(آءِ ايم ايف) جي تعاون سان ڪيل معاشي سڌارن جي قدمن کي پاڪستان جي معاشي بنيادن کي مضبوط بڻائڻ طرف اهم اڳڀرائي قرار ڏنو ويو. چيو ويو ته وزيراعظم محمد شهباز شريف جي قيادت ۾ حڪومت معاشي استحڪام کي هٿي وٺرائڻ، ڪاروبار ۽ سيڙپڪاري لاءِ سازگار ماحول پيدا ڪرڻ لاءِ مختلف قدم کڻي رهي آهي. وفاقي وزير چيو ته بورڊ آف انويسٽمينٽ ڪاروباري ادارن ۽ سيڙپڪارن کي سهولت فراهم ڪرڻ لاءِ قاعدن ۽ ضابطن ۾ سڌارن تي فعال طور تي ڪم ڪري رهيو آهي. قاعدن ۽ ضابطن ۾ سڌارن لاءِ آمريڪي ماهرن طرفان فراهم ڪيل معاونت ۽ مهارت کي به ساراهيو ويو. وفاقي وزير پاڪستان ۽ آمريڪا وچ ۾ معاشي لاڳاپن جي اهميت کي اجاگر ڪندي چيو ته آمريڪا پاڪستان جي روانگي واپار جي سڀ کان وڏي منڊي آهي ۽ ٻنهي ملڪن وچ ۾ ٻطرفو واپار اٽڪل 10 ارب ڊالر آهي. واپار، سيڙپڪاري، ٽيڪنالاجي، ڪاروباري سرگرمين، تعليم ۽ هنرمندي کي هٿي وٺرائڻ سميت مختلف شعبن ۾ وڌيڪ تعاون جي وسيع امڪانن کي اجاگر ڪيو ويو. ملڪ جي پرڏيهي معاشي صورتحال جو حوالو ڏيندي وفاقي وزير چيو ته پاڪستان جي مٽا سٽا وارن ناڻي جا ذخيرا اٽڪل 18 ارب ڊالر تائين پهچي چڪا آهن جڏهن ته خطي ۽ سڄي دنيا ۾ جاري جنگين ۽ جاگرافيائي سياسي ڇڪتاڻ سبب معاشي سرگرميون به متاثر ٿي رهيون آهن. چيو ويو ته تڪرارن جي نتيجن ۾ وڌندڙ لاڳت ۽ غير يقيني صورتحال سيڙپڪاري، واپار ۽ مجموعي معاشي سرگرمين تي اثرانداز ٿي رهي آهي. پاڪستان طرفان آمريڪا ۽ ايران ٻنهي سان مثبت ۽ تعميري لاڳاپا برقرار رکڻ جي عزم جو ورجاءُ ڪيو ويو ۽ چيو ته پاڪستان پنهنجي قومي ۽ معاشي مفادن جي تحفظ لاءِ سفارتڪاري، ڳالهين ۽ پرامن رابطن کي اهميت ڏئي ٿو. وفاقي وزير، فيلڊ مارشل سيد عاصم منير جي سفارتي صلاحيتن کي به ساراهيو. پنهنجي هاڻوڪي برطانيه جي دوري جو حوالو ڏيندي هن ٻڌايو ته هتي پاڪستان جي ڪردار ۽ سفارتي ڪوششن کي خاصي پذيرائي حاصل ٿي. علائقائي ۽ عالمي چئلنجز کي منهن ڏيڻ لاءِ وزيراعظم محمد شهباز شريف ۽ فيلڊ مارشل سيد عاصم منير جي قيادت ۽ ڪردار کي به ساراهيو ويو.