ڪراچي- 08 سيپٽمبر (اي پي پي) ڪراچي جي ميئر بئريسٽر مرتضيٰ وهاب چيو آهي ته ميئر آفيس ۾ باهه لڳڻ واري واقعي ۾ ڪو به جاني نقصان نه ٿيو آهي، سندس اسٽاف ۽ عملو محفوظ رهيو، جڏهن ته باهه سبب جيڪو مالي نقصان ٿيو آهي، ان جو جلد ازالو ڪيو ويندو.ميئر ڪراچي بئريسٽر مرتضيٰ وهاب ميڊيا سان ڳالهائيندي فائر بريگيڊ جي ٽيم کي خراج تحسين پيش ڪندي چيو ته فائر …
ڪراچي جي ميئر جي آفيس ۾ باهه لڳي وئي، ڪو جاني نقصان نه ٿيو، جاچ کانپوءِ تفصيل سامهون آندا ويندا: مرتضيٰ وهاب
ڪراچي- 08 سيپٽمبر (اي پي پي) ڪراچي جي ميئر بئريسٽر مرتضيٰ وهاب چيو آهي ته ميئر آفيس ۾ باهه لڳڻ واري واقعي ۾ ڪو به جاني نقصان نه ٿيو آهي، سندس اسٽاف ۽ عملو محفوظ رهيو، جڏهن ته باهه سبب جيڪو مالي نقصان ٿيو آهي، ان جو جلد ازالو ڪيو ويندو.ميئر ڪراچي بئريسٽر مرتضيٰ وهاب ميڊيا سان ڳالهائيندي فائر بريگيڊ جي ٽيم کي خراج تحسين پيش ڪندي چيو ته فائر ٽيم بهادري ۽ جرئت سان باهه تي ضابطو آندو. فائر بريگيڊ پاران واقعي واري هنڌ جو مڪمل معائنو ۽ سروي ڪيو ويندو، جنهن کانپوءِ باهه لڳڻ جا سبب ۽ ٻيا تفصيل ميڊيا سان شيئر ڪيا ويندا. هن چيو ته گذريل چئن پنجن ڏينهن دوران ڪراچي ۾ وڏيون سرگرميون ۽ تقريبون منعقد ٿيون، هو مسلسل دعا ڪري رهيو هو ته الله تعاليٰ هن شهر کي بُري نظر کان محفوظ رکي ۽ ڪراچي جي شهرين جون خوشيون قائم رکي. هن چيو ته اڄ صبح شايد شهر کي ٿوري نظر لڳي ۽ ميئر جي ڪمري ۾ باهه لڳي، تنهن هوندي به ڪو جاني نقصان نه ٿيو.هن چيو ته قانون سان لاڳاپيل معاملن بابت هو هميشه احتياط سان ڳالهائيندو آهي ۽ حتمي ڳالهه فائر بريگيڊ جي جاچ مڪمل ٿيڻ کانپوءِ ئي سامهون ايندي.ميئر ڪراچي چيو ته سندس ڪمرو مڪمل طور سڙي ويو آهي ۽ اتي موجود فرنيچر تباهه ٿي ويو آهي، جڏهن ته سندس ڪمري ۾ ڪو به سرڪاري رڪارڊ موجود نه هوندو آهي. هن ٻڌايو ته جيڪي فائلون صحيحين لاءِ اينديون آهن، انهن تي صحيحون ۽ حڪم جاري ڪرڻ کانپوءِ لاڳاپيل کاتن ڏانهن واپس موڪليون وينديون آهن، تنهن ڪري ميئر جي ڪمري ۾ ڪنهن اهم سرڪاري رڪارڊ جي موجودگي جو تصور درست ناهي.هن چيو ته ابتدائي طور تي اها ڳالهه سامهون آئي آهي ته ممڪن طور ميئر جي ڪمري جي اي سي ۾ ڪا خرابي ٿي ۽ ان جو آئوٽر يونٽ ڪچن جي طرف لڳل آهي، تنهن هوندي به اصل سبب فائر بريگيڊ پاران مڪمل معائني کانپوءِ ئي معلوم ٿي سگهندو.ميئر ڪراچي بئريسٽر مرتضيٰ وهاب چيو ته باهه لڳڻ واري واقعي باوجود هو پنهنجا سرڪاري فرض انجام ڏيندو رهندو ۽ آفيس جي ٻئي ڪمري مان ڪم ڪندو، جڏهن ته شهر جا دورا ۽ ٻيون معمول جون سرگرميون پڻ جاري رهنديون.هن چيو ته ترقياتي منصوبن بابت مقرر ڪيل پريس ڪانفرنس هن واقعي سبب ملتوي ڪئي وئي. ميئر ڪراچي وڌيڪ چيو ته واقعي جو اندروني سطح تي پڻ جائزو ورتو ويندو ۽ سي سي ٽي وي ڪيمرائن سميت سمورين شاهدين ۽ ثبوتن جو جائزو ورتو ويندو. چيف فائر آفيسر کي واقعي جي جاچ ۽ معائني جي ذميواري ڏني وئي آهي. هنڌ ڪليئر ٿيڻ کانپوءِ جاچ جو عمل شروع ڪيو ويندو ۽ رپورٽ سامهون اچڻ تي ميڊيا کي آگاهه ڪيو ويندو.فائر سيفٽي جي سامان بابت ميئر ڪراچي چيو ته فائر ايڪسٽنگوئشرز ۽ ٻيا حفاظتي اوزار ڪنهن به هنگامي صورتحال کي منهن ڏيڻ لاءِ رکيا ويندا آهن ۽ اڄ به شروعاتي ردعمل دوران انهن ئي فائر ايڪسٽنگوئشرز ذريعي باهه تي ضابطو آڻڻ جي ڪوشش ڪئي وئي.
