سامونڊي خوراڪ جو روانگي واپار رڪارڊ 568 ملين ڊالر جي سطح تائين پهچي چڪو آهي: خرم شهزاد

اسلام آباد- 08 سيپٽمبر (اي پي پي) ناڻي واري وفاقي وزير جي صلاحڪار خرم شهزاد چيو آهي ته سامونڊي خوراڪ جو روانگي واپار568 ملين ڊالر جي رڪارڊ سطح تي پهچي ويو آهي، بهتر معيار، نئين مارڪيٽن تائين پهچ، وڌيڪ ويليو ايڊيشن ۽ برآمدي مارڪيٽن ۾ تنوع ذريعي پاڪستان پنهنجي بليو اڪانومي کي روانگي واپار ۽ اقتصادي ترقي جو هڪ اهم محرڪ بڻائي سگهي ٿو. ”ايڪس“ تي پنهنجي پيغام ۾ هن چيو ته گذريل مالي سال دوران پاڪستان جي سامونڊي خوراڪ جو روانگي واپار تاريخ جي بلند ترين سطح تي پهچي ويو ۽ پهريون ڀيرو سامونڊي خوراڪ جي روانگي واپار جو ڪاٿو 500 ملين ڊالر جي حد کي پار ڪندي 568 ملين ڊالر رڪارڊ ڪيو ويو آهي. هن چيو ته مالي سال 24-2023ع ۾ پاڪستان جي سامونڊي خوراڪ جو روانگي واپار 406 ملين ڊالر هو، جيڪو مالي سال 25-2024ع ۾ 489 ملين ڊالر ۽ مالي سال 26-2025ع ۾ ان ۾ نمايان اضافو ٿيو ۽ روانگي واپار 568 ملين ڊالر تائين پهچي ويو. ٻن سالن ۾ سامونڊي خوراڪ جي روانگي واپار ۾ اٽڪل 40 سيڪڙو اضافو ٿيو آهي. هن چيو ته سامونڊي خوراڪ جي روانگي واپار ۾ مختلف قسم جون سامونڊي مصنوعات شامل آهن. گذريل مالي سال دوران منجمد مڇيءَ جو روانگي واپار 105.1 ملين ڊالر، اسڪويڊ ۽ ڪٽل فش 103.7 ملين ڊالر، فش ميل83.1 ملين ڊالر، جھينگو 62.1 ملين ڊالر، جڏهن ته ڪيڪڙي جو روانگي واپار 36.9 ملين ڊالر رهيو. هن چيو ته پاڪستاني سي فوڊ چين، ڏکڻ اوڀر ايشيا، نار ملڪن، جاپان، ڏکڻ ڪوريا ۽ آمريڪا سميت مختلف عالمي مارڪيٽن ۾ روانگي واپار ڪيو پيو وڃي. معيار ۾ بهتري ۽ نئين مارڪيٽن تائين پهچ سبب پاڪستاني سامونڊي خوراڪ لاءِ روانگي واپار جا موقعا پڻ وڌيا آهن. روس جي مارڪيٽ تائين به پاڪستاني سي فوڊ جي پهچ وڌي آهي ۽ 16 پاڪستاني سي فوڊ پروسيسنگ پلانٽس کي روسي مارڪيٽ لاءِ منظور ڪيو ويو آهي. خرم شهزاد چيو ته پاڪستان لاءِ بليو اڪانومي ۾ روانگي واپار وڌائڻ جا وسيع امڪان موجود آهن،جڏهن ته ان مان ڀرپور فائدو کڻڻ لاءِ جديد پروسيسنگ سهولتن، ويليو ايڊيشن، ايڪو ڪلچر، ڪولڊ چين جي بنيادي ڍانچي، عالمي معيار جي صحت جي حفاظت جي گهُرجن کي پورو ڪرڻ ۽ نئين عالمي مارڪيٽن تائين پهچ تي وڌيڪ ڌيان ڏيڻو پوندو. سامونڊي خوراڪ جي روانگي واپار ۾ لڳاتار اضافو نه رڳو پاڪستان لاءِ قيمتي پرڏيهي مٽا سٽا وارو ناڻو ڪمائڻ جو ذريعو ٿي سگهي ٿو پر ان شعبي ۾ سيڙپڪاري، روزگار جا موقعا ۽ سامونڊي معيشت جي ترقي ۾ پڻ اهم ڪردار ادا ڪري سگهي ٿو.