سامونڊي سڌارن بابت وزيراعظم ٽاسڪ فورس تحت پاڪستان جو بندرگاهي نظام جديد سڌارن ۽ ڊيجيٽلائيزيشن جي نئين دور ۾ داخل

اسلام آباد – 04 سيپٽمبر (اي پي پي)سامونڊي سڌارن بابت وزيراعظم ٽاسڪ فورس تحت پاڪستان جي بندرگاهي نظام ۾ جديد سڌارن، ڊيجيٽلائيزيشن ۽ ٽيڪنالاجي جي استعمال ذريعي واپار کي آسان، شفاف ۽ اثرائتو بڻائڻ لاءِ اهم قدم جاري آهن. بندرگاهي شعبي جي ترقي لاءِ پاڪستان جي تاريخ ۾ پهريون ڀيرو نيشنل پورٽس ماسٽر پلان تيار ڪيو ويو آهي، جنهن ذريعي ملڪ جي بندرگاهي نظام لاءِ هڪ جامع ۽ مربوط حڪمت عملي جوڙي وئي آهي. ان حڪمت عملي جو مقصد بندرگاهن جي صلاحيتن ۾ اضافو، آپريشنل ڪارڪردگي بهتر بڻائڻ ۽ عالمي واپاري رابطن کي وڌيڪ مستحڪم ڪرڻ آهي. ان ئي سلسلي ۾ بندرگاهي سرگرمين ۾ هڪ جهڙائي ۽ شفافيت کي هٿي ڏيڻ لاءِ برابر پورٽ ٽيرف نظام لاڳو ڪيو ويو آهي، جڏهن ته ڪراچي پورٽس تي جديد ڪارگو مينيجمينٽ سسٽم متعارف ڪرايو پيو وڃي ته جيئن ڪارگو هينڊلنگ جي صلاحيت ۽ پيداواري صلاحيت ۾ اضافو ڪري سگهجي. حڪومت پاران پاڪستان سنگل ونڊو ۽ فيس ليس ڪسٽمز سسٽمز اسيسمينٽ لاڳو ڪرڻ سان واپاري عمل ۾ نمايان بهتري آئي آهي. جديد نظام سبب ڪارگو ڪليئرنس جو وقت 53 ڪلاڪن کان گهٽجي اٽڪل 18 ڪلاڪ رهجي ويو آهي، جنهن سبب آمدني ۽ روانگي واپار ڪندڙن لاءِ وقت ۽ خرچ ٻنهي ۾ گهٽتائي ٿي آهي. فيس ليس ڪسٽمز اسيسمينٽ ذريعي اسيسمينٽ آفيسرن کي هڪ محفوظ ۽ شفاف ڊجيٽل ماحول فراهم ڪيو ويو آهي جڏهن ته ڪسٽمز، بئنڪن ۽ پورٽس آپريٽرز کي گڏيل ڊجيٽل پليٽ فارم سان ڳنڍيو پيو وڃي. ان قدم سان دستاويزي ڪارروائي ۾ گهٽتائي، شفافيت ۾ اضافي ۽ ڪاروباري عمل کي وڌيڪ تيز ۽ آسان بڻائڻ ۾ مدد ملي رهي آهي. سامونڊي سڌارن بابت وزيراعظم ٽاسڪ فورس تحت ٿيل سڌارن جي نتيجي ۾ ڪارگو هينڊلنگ، واپاري سهولتڪاري ۽ بندرگاهي آپريشنز جي مجموعي ڪارڪردگي ۾ بهتري اچي رهي آهي. جديد ٽيڪنالاجي تي ٻڌل بندرگاهي نظام نه رڳو پاڪستان جي عالمي واپاري مقابلي کي بهتر بڻائي رهيو آهي پر سيڙپڪاري جا نوان موقعا پيدا ڪرڻ ۽ ملڪي معيشت کي وڌيڪ مضبوط بڻائڻ ۾ به مددگار ثابت ٿي رهيو آهي. حڪومت جو مقصد بندرگاهي شعبي کي جديد ۽ عالمي معيار مطابق بڻائيندي پاڪستان کي خطي ۾ هڪ اثرائتي واپاري ۽ لاجسٽڪس مرڪز طور وڌيڪ مستحڪم ڪرڻ آهي.