ميٽرڪ جي سالياني امتحان 2026ع ۾ نمايان ڪاميابي حاصل ڪندڙ شاگرد قوم جو قيمتي سرمايو ۽ پاڪستان جي روشن مستقبل جي ضمانت آهن: بئريسٽر دانيال چوڌري

راولپنڊي – 06  آگسٽ (اي پي پي) اطلاعات ۽ نشريات واري وفاقي پارلياماني سيڪريٽري بئريسٽر دانيال چوڌري چيو آهي ته ميٽرڪ جي سالياني امتحان 2026ع ۾ نمايان ڪاميابي حاصل ڪندڙ شاگرد قوم جو قيمتي سرمايو ۽ پاڪستان جي روشن مستقبل جي ضمانت آهن. اهڙن خيالن جو اظهار هن راولپنڊي بورڊ آف انٽرميڊيئٽ اينڊ سيڪنڊري ايجوڪيسن جي اهتمام هيٺ فاطمه جناح وومين يونيورسٽي ۾ ميٽرڪ سالياني امتحان 2026ع جي پوزيشن هولڊر شاگردياڻين جي اعزاز ۾ منعقد انعام ورهائڻ واري تقريب کي خطاب ڪندي ڪيو. ان موقعي تي قومي اسيمبلي ميمبر ملڪ ابرار احمد، صوبائي اسيمبلي ميمبر اسما عباسي، تعليمي بورڊ راولپنڊي جو چيئرمين پروفيسر ڊاڪٽر اقبال محمود، ڪنٽرولر امتحان تنوير اصغر اعواڻ، استاد، والدين، شاگرد ۽ زندگي جي مختلف شعبن سان تعلق رکندڙ ماڻهو موجود هئا. بئريسٽر دانيال چوڌري پوزيشن هولڊر شاگردياڻي، سندس والدين ۽ استادن کي دلي مبارڪباد ڏيندي چيو ته اڄ جو ڏينهن محنت، لڳاءُ، حوصلي ۽ عزم جا ثمر سهيڙڻ جو ڏينهن آهي. هن چيو ته نوجوان نسل پاڪستان جو روشن مستقبل آهي، ان لاءِ انهن کي پنهنجي صلاحيتن کي ملڪ ۽ قوم جي ترقي، خوشحالي ۽ استحڪام جي لاءِ استعمال ۾ آڻڻ گهرجي. وفاقي پارلياماني سيڪريٽري شاگردياڻي تي زور ڀريو ته هوءَ ڪاميابي کي پنهنجي منزل نه پر وڌيڪ محنت، مسلسل جدوجهد ۽ اعلى مقصد حاصل ڪرڻ جي شروعات سمجهي. هن چيو ته تعليم ئي اها قوت آهي جيڪا قومن جي تقدير بدلائي ٿي، تنهن ڪري شاگرد علم حاصل ڪرڻ سان گڏ اعلى اخلاق، ديانت، نظم ۽ ضبط ۽ قومي قدرن کي پڻ پنهنجي زندگي جو حصو بڻائين. بئريسٽر دانيال چوڌري والدين، خاص طور تي مائرن کي خراج تحسين پيش ڪندي چيو ته ٻارن جي تعليم، تربيت ۽ ڪردار سازي ۾ والده جو ڪردار سڀ کان نمايان هوندو آهي. مائرن جون دعائون، رهنمائي، شفقت ۽ مسلسل حوصلا افزائي ٻارن کي ڪاميابي جي منزل تائين پهچائڻ ۾ اهم ڪردار ادا ڪري ٿي.