بدين ۾ ڏھين محرم جي موقعي تي سيڪيورٽي جا سخت انتظام، ايس ايس پي پاران سيڪيورٽي ادارن سان گڏ شھر جو دورو

بدين – 26 جون (اي پي پي) بدين ۾ ڏھين محرم الحرام جي موقعي تي ايس ايس پي بدين قمر رضا جسڪاڻي، ڪمانڊر ٿر رينجرز برگيڊيئر اصغر حسين، ونگ ڪمانڊر ٿر رينجرز 32 ونگ ليفٽيننٽ ڪرنل عبدالجبار ۽ ڊپٽي ڪمشنر بدين ياسر ڀٽي سان گڏ بدين شهر ۾ مرڪزي عاشورا جلوس جي سيڪيورٽي انتظامن جو تفصيلي جائزو ورتو. وفد شاھنواز چوڪ پهچي جلوس جي رستن، سيڪيورٽي پوائنٽن، داخلا ۽ نڪرڻ وارن رستن، نگراني جي انتظامن ۽ ٻين حفاظتي قدمن جو معائنو ڪيو. ان موقعي تي جلوس جي منتظمين سان پڻ ملاقات ڪئي وئي، جتي سيڪيورٽي، گڏيل سهڪار ۽ جلوس جي پرامن انعقاد بابت مختلف معاملن تي خيالن جي ڏي وٺ ڪئي وئي. ايس ايس پي بدين قمر رضا جسڪاڻي، ڪمانڊر ٿر رينجرز برگيڊيئر اصغر حسين کي مرڪزي جلوس جي سيڪيورٽي لاءِ ڪيل انتظامن، پوليس، رينجرز ۽ ٻين قانون لاڳو ڪندڙ ادارن جي گڏيل رابطي، مقرر ڪيل نفري، هنگامي صورتحال کي منهن ڏيڻ جي تيارين ۽ مجموعي سيڪيورٽي پلان بابت تفصيلي بريفنگ ڏني. ان موقعي تي ان عزم جو اظهار ڪيو ويو ته ضلعي بدين ۾ امن امان هر صورت ۾ برقرار رکيو ويندو ۽ عزادارن کي مڪمل تحفظ فراهم ڪرڻ لاءِ سمورا موجود وسيلا استعمال ڪيا ويندا. ان دوران، 10 محرم الحرام جي موقعي تي ضلعي بدين ۾ نڪرندڙ سمورا ماتمي جلوس پنهنجن روايتي رستن تي پرامن انداز ۾ روان دوان آهن. عزادارن جي جان ۽ مال جي تحفظ، مذهبي هم آهنگي ۽ امن امان قائم ڪرڻ لاءِ پوليس، رينجرز ۽ ٻين لاڳاپيل ادارن پاران فول پروف ۽ سخت سيڪيورٽي انتظام ڪيا ويا آهن. شهرين جي سهولت ۽ ٽريفڪ جي بنا رڪاوٽ روانگي کي يقيني بڻائڻ لاءِ متبادل ٽريفڪ رستا پڻ مقرر ڪيا ويا آهن، جتي ٽريفڪ پوليس جا آفيسر ۽ اهلڪار پنهنجون ذميواريون سرانجام ڏئي رهيا آهن ته جيئن عوام کي ڪنهن به قسم جي تڪليف پيش نه اچي. ان موقعي تي ايڊيشنل ڊپٽي ڪمشنر – 02 بدين راجيش دلپت، ڊي ايس پي بدين پير شبير حيدر، مختيارڪار بدين سميت پوليس، رينجرز ۽ ضلعي انتظاميا جا ٻيا آفيسر پڻ موجود هئا.