ملڪ جي وڏن هوائي اڏن تي حج کانپوءِ آپريشن ڪاميابيءَ سان جاري آهي: پاڪستان ايئرپورٽس اٿارٽي

ڪراچي- 01 جون (اي پي پي) پاڪستان ايئرپورٽس اٿارٽي سمورن لاڳاپيل ادارن جي سهڪار سان سڄي ملڪ جي هوائي اڏن تي حاجين جي وطن واپسيءَ لاءِ حج آپريشن 2026ع ڪاميابيءَ سان جاري رکندي پئي اچي. سومر ڏينهن پاڪستان ايئرپورٽس اٿارٽي جي ترجمان پاران جاري بيان موجب اسلام آباد انٽرنيشنل ايئرپورٽ تي سومر پهرين جون تي جده کان آيل پهرين سرڪاري واپسي حج اُڏام SV5724 ذريعي 400 حاجين کي وطن پهچايو. ان موقعي تي وفاقي وزير طارق فضل چوڌري، مذهبي معاملن واري وزارت، پاڪستان ايئرپورٽس اٿارٽي، اي ايس ايف ۽ ٻين لاڳاپيل ادارن جي عملدارن حاجين جي آجيان ڪئي. علامه اقبال انٽرنيشنل ايئرپورٽ لاهور تي پهرين واپسي حج اُڏام SV5734 پهتي. پنجاب جي صوبائي وزير خواجه سلمان رفيق، لاهور جي ايئرپورٽ مئنيجر ۽ ٻين عملدارن حاجين جي آجيان ڪئي. ملتان انٽرنيشنل ايئرپورٽ تي پهرين حج اُڏام ايئر بليو جي اُڏام پي اي 873، 151 حاجين کي کڻي جده کان هتي پهتي. پڄاڻي تقريب ۾ قومي اسيمبلي ميمبر قاسم نون، هوائي اڏي جي عملدارن ۽ ٻين لاڳاپيل ادارن جي نمائندن شرڪت ڪئي. جناح انٽرنيشنل ايئرپورٽ ڪراچي تي ايئر سيال جي اُڏام پي ايف 723 جيڪا ڪراچيءَ لاءِ پهرين، حج کان پوءِ اُڏام ٿي، 159 حاجين کي کڻي جده کان پهتي. راندين وارو صوبائي وزير، صوبائي وزير سيد ناصر حسين شاهه، ايئرپورٽ مئنيجر ۽ ٻين اعليٰ عملدارن حاجين جي آجيان ڪئي. اها ڳالهه ذڪر جوڳي آهي ته 30 مئي 2026ع تي اسلام آباد پهچندڙ اُڏام هڪ شيڊولز ڪمرشل اُڏام هئي، جنهن ذريعي نجي حج اسڪيم جي 114 حاجين کي وطن آندو ويو، جڏهن ته پهرين جون تي ايندڙ اُڏام SV5724 حج کانپوءِ آپريشن 2026ع تحت پهرين سرڪاري واپسي حج اُڏام هئي. پاڪستان ايئرپورٽس اٿارٽي وطن ايندڙ سمورن حاجين کي دل جي گهرائين سان ڀليڪار ڪيو ويو ۽ سندن حج جي سعادت جي قبوليت لاءِ دُعا ڪئي.