صدر آصف علي زرداري پاران پرنس رحيم آغا خان پنجين جو پاڪستان جي سرڪاري دوري تي پهچڻ تي استقبال، ايوان صدر ۾ آجياڻو ڏنو ويو

اسلام آباد – 20 مئي (اي پي پي) صدر آصف علي زرداري اربع ڏينهن پرنس رحيم آغا خان پنجين جو پاڪستان جي سرڪاري دوري تي نور خان ايئر بيس تي پهچڻ تي استقبال ڪيو جتي خاتون اول بي بي آصفه ڀٽو زرداري پڻ صدر سان گڏ هئي. ايوان صدر پاران جاري ڪيل پڌرائي ۾ چيو ويو آهي ته فيبروري 2025ع ۾ پنهنجي والد مرحوم پرنس ڪريم آغا خان چوٿين جي وفات کانپوءِ 50هين امام جي حيثيت سان شيعه اسماعيلي مسلم برادري جي قيادت سنڀالڻ کانپوءِ هي پرنس رحيم آغا خان جو پاڪستان جو پهريون دورو آهي. ايوان صدر پهچڻ تي مھمان کي پاڪ فوج، پاڪستان نيوي ۽ پاڪستان ايئر فورس تي ٻڌل دستن گارڊ آف آنر پيش ڪيو. صدر آصف علي زرداري، خاتون اول بي بي آصفه ڀٽو زرداري ۽ پي پي پي چيئرمين بلاول ڀٽو زرداري، پرنس رحيم آغا خان پنجين سان گڏجاڻي ڪئي، جنهن کانپوءِ وفدن جي سطح تي ڳالهيون ڪيون ويون.

جڏھن ته پرنس رحيم آغا خان پنجين جي مان ۾ آجياڻو ڏنو ويو، جنهن ۾ وزيراعظم محمد شهباز شريف، نائب وزيراعظم اسحاق ڊار، فيلڊ مارشل سيد عاصم منير، سي او اي ايس ۽ سي ڊي ايف، سينيٽ چيئرمين سيد يوسف رضا گيلاني، قومي اسيمبلي جي اسپيڪر سردار اياز صادق، سنڌ جي وڏي وزير سيد مراد علي شاهه، وفاقي وزيرن، پارليامينٽ جي ميمبرن ۽ سفارتي برادري جي ميمبرن شرڪت ڪئي. صدر آغا خان ڊولپمينٽ نيٽ ورڪ جي پاڪستان ۾ ڊگهي عرصي کان صحت جي سارسنڀال، تعليم، سماجي ترقي، موسمياتي مقابلي ۽ ورثي جي تحفظ ۾  جاري تعاون جي واکاڻ ڪئي. هن ڪمزور سماج جي ڀلائي ۽ ترقي لاءِ آغا خان ڊولپمينٽ نيٽ ورڪ سان تعاون کي وڌيڪ مضبوط ڪرڻ جي پاڪستان جي عزم کي ورجايو. صدر مرحوم پرنس ڪريم آغا خان چوٿين جي پاڪستان سان پائيدار وابستگي کي ياد ڪيو ۽ ملڪ ۾ آغا خان خاندان جي تاريخي تعاون جي واکاڻ ڪئي. پرنس رحيم آغا خان گرمجوشي سان استقبال تي صدر جا ٿورا ادا ڪيا ۽ پاڪستان ۾ ترقي ۽ انساني قدمن جي حمايت لاءِ آغا خان ڊيولپمينٽ نيٽ ورڪ جي مسلسل عزم جو اظهار ڪيو. پرنس رحيم جو پاڪستان جو آخري دورو 2024 ۾ هو، جڏهن صدر کيس آغا خان خاندان جي پاڪستان ۾ ڊگهي عرصي تائين ڪيل خدمتن جي اعتراف ۾ ملڪ جو سڀ کان وڏو سول ايوارڊ نشان پاڪستان عطا ڪيو ھو.

سلطان علي الانا، ڊائريڪٽر آغا خان فنڊ فار اڪنامڪ ڊولپمينٽ ۽ هيڊ آف فنانشل سروسز آغا خان ڊولپمينٽ نيٽ ورڪ، شفيق سچيدينا، هيڊ آف ڊپارٽمينٽ آف جماعتي انسٽيٽيوشنز،  نزار نور محمد ميوا والا، صدر اسماعيلي ڪائونسل فار پاڪستان ۽ اڪبر لدڪ، نائب صدر اسماعيلي ڪائونسل فار پاڪستان وفد جو حصو هئا. پاڪستان پيپلزپارٽي جي چيئرمين ۽ اڳوڻي پرڏيهي وزير بلاول ڀٽو زرداري، خاتون اول بي بي آصفه ڀٽو زرداري،  سينيٽر شيري رحمان، سينيٽر سليم مانڊوي والا، سيد نويد قمر، ڊاڪٽر عاصم حسين ۽ پرڏيهي سيڪريٽري پڻ اجلاس ۾ شرڪت ڪئي.