قومي اسيمبليءَ اجلاس ۾ نُڪتن واري اعتراض تي مختلف عوامي ۽ انتظامي مسئلن تي بحث

اسلام آباد- 20 مئي (اي پي پي) قومي اسيمبليءَ ۾ اربع ڏينهن ميمبرن اعتراض وارن نُڪتن تي مختلف عوامي ۽ انتظامي مسئلا اجاگر ڪيا. عاليه ڪامران اعتراض واري نُڪتي تي ڪفايت شعاري جي قدمن جي مؤثريت تي سوال اُٿاريندي چيو ته ڪفايت شعاري وارن قدمن باوجود پيٽرول جو امپورٽ بل 500 ملين ڊالر وڌي ويو آهي، ان جو مطلب آهي ته کپت وڌيڪ ٿي وئي آهي ۽ قدمن مان فائدو ناهي ٿيو. هن چيو ته ايم ٽيگ باوجود چيڪ پوائنٽس بڻايا ويا جنهن سان شهرين کي پريشانيءَ کي مُنهن ڏيڻو پيو. هن چيو ته ڪفايت شعاري جي قدمن جي ٿرڊ پارٽي آڊٽ جو به اعلان ڪيو ويو هو، ان ۾ ڪيتري اڳڀرائي ٿي. هن ايس ڊي جيز تحت فنڊز فراهم ڪرڻ جو مطالبو پڻ ڪيو. ايم ڪيو ايم پاڪستان جي وسيم حسين چيو ته پاور ڊويزن طرفان 17 کان 21 گريڊ جي آفيسرن لاءِ بجلي جا مفت يونٽس ختم ڪيا ويا آهن، هي هڪ سٺو قدم آهي، اهو سلسلو جاري رکيو وڃي ۽ ان جي دائري کي هٿي ڏني وڃي. هن چيو ته وزارت طرفان ڪجهه ڊسڪوز جي نجڪاري جو چيو پيو وڃي، حيسڪو ۾ 48 فيڊرز لوڊشيڊنگ فري ٿي چڪا آهن، ان جو مطلب آهي ته ڪمپنيءَ جي حالت بهتر ٿي وئي آهي. ان صورت ۾ ان جي نجڪاري جي ضرورت ناهي. هن چيو ته جينڪوز جي نيڪالي ڏيندڙ ملازمن کي ڊسڪوز ۾ ايڊجسٽ ڪيو وڃي. ڊيرا اسماعيل خان سان تعلق رکندڙ قومي اسيمبليءَ ميمبر فتح الله خان چيو ته سندس تڪ ۾ پيئڻ جي صاف پاڻيءَ جو وڏو مسئلو آهي، آئينده مالي سال جي بجيٽ ۾ منهنجي تڪ لاءِ خاص پراجيڪٽ ڏنو وڃي. هن چيو ته ضلعي ۾ گيس جا وسيع ذخيرا دريافت ٿيا آهن پر مقامي ماڻهن کي گيس جي فراهميءَ لاءِ قدم نه کنيا ويا. هن چيو ته 2022ع جي ٻوڏ ۾ سندس تڪ ۾ فوت ٿيلن مان صرف 40 متاثرن کي معاوضو مليو آهي، پر جيڪي 38 هزار ماڻهو بي گهر ٿيا هئا انهن جي اڃا تائين مالي سهائتا ناهي ڪئي وئي. هن متاثرن جي حقن لاءِ بُک هڙتال ڪرڻ جو به اعلان ڪيو. شازيه صوبيه اسلم چيو ته پنو عاقل ۾ ڪلاڪن جي لوڊشيڊنگ جو سلسلو جاري آهي، ٽرانسفارمر سڙڻ تي شڪايتن جو ازالو نٿو ڪيو وڃي. پنو عاقل مان نيشنل هاءِ وي گذري رهيو آهي جنهن جي حالت خراب آهي ۽ ان جي مرمت هئڻ گهرجي.