پاڪستان ۽ آذربائيجان جا لاڳاپا صرف سياسي نوعيت جا ناهن، ٻئي ملڪ مذهبي، ثقافتي، تاريخي ۽ عوامي رشتن ۾ ٻَڌل آهن: سيد يوسف رضا گيلاني

اسلام آباد-14 مئي (اي پي پي) سينيٽ چيئرمين سيد يوسف رضا گيلاني چيو آهي ته پاڪستان ۽ آذربائيجان وچ ۾ لاڳاپا صرف سياسي نوعيت جا ناهن پر ٻئي ملڪ مذهبي، ثقافتي، تاريخي ۽ عوامي رشتن ۾ ٻَڌل ڀائر ملڪ آهن. اهڙو اظهار هن آذربائيجان جي آزاديءَ واري ڏهاڙي جي حوالي سان اسلام آباد جي مقامي هوٽل ۾ رٿيل تقريب کي خطاب ڪندي ڪيو. تقريب ۾ آذربائيجان جو سفير، سندس گهر واري ۽ مواصلات وارو وفاقي وزير عبدالعليم خان، قومي اسيمبليءَ جو ڊپٽي اسپيڪر ۽ ٻيا شامل هئا. سينيٽ چيئرمين آذربائيجان جي عوام ۽ قيادت کي آزاديءَ جي ڏهاڙي جون مبارڪون ڏيندي چيو ته آذربائيجان ۽ پاڪستان هڪٻئي جي ڏُک سُک جا حقيقي شريڪ آهن. هن چيو ته جڏهن پاڪستان کي ڀارتي اڳرائيءَ خلاف ڪاميابي حاصل ٿي ته آذربائيجان جي عوام ان جوش ۽ جذبي سان جشن ملهايو جهڙوڪ سندن فتح ٿي هجي. هن چيو ته کيس آذربائيجان جي صدر ۽ پارلياماني قيادت سان ڪيترين ئي ملاقاتن جو موقعو مليو جن ۾ ٻن طرفن لاڳاپن، پارلياماني رابطن ۽ عالمي فورمز تي گڏيل تعاون تي خيالن جي ڏي وٺ ڪئي وئي. هن چيو ته آءِ پي يو ۽ ايشين پارليامينٽري اسيمبلي جهڙن عالمي فورمز تي ٻنهي ملڪن وچ ۾ هم آهنگي ۽ گڏيل قدر نمايان آهن. هن چيو ته پاڪستان ان ڳالهه تي خوش آهي ته آذربائيجان اسلام آباد ۾ جديد فن وارو ترقياتي ويزن متعارف ڪرائي رهيو آهي. هن آذربائيجان جي صدر طرفان موجوده سال کي فن جي تعمير جو سال قرار ڏيڻ جي قدمن کي ساراهيو. هن چيو ته پاڪستان آذربائيجان سان عوامي ۽ واپاري رابطن کي هٿي ڏيڻ چاهي ٿو. سينيٽ چيئرمين ٻُڌايو ته آذربائيجان جي صدر کيس آگاهه ڪيو ته پاڪستان لاءِ هفتيوار 11 اُڏامون شروع ڪيون ويون آهن جيڪي اسلام آباد ۽ لاهور لاءِ دستياب آهن، جڏهن ته انهن جو ڪِرايو ٻين ملڪن جي ڀيٽ ۾ گهٽ رکيو ويو آهي ته جيئن پاڪستاني شهرين کي سهولت ميسر اچي سگهي. هن وڌيڪ چيو ته پاڪستان سان آذربائيجان جو سفر 3 ڪلاڪن کان به گهٽ وقت ۾ طئي ٿئي ٿو ۽ مستقبل ۾ اُڏامن جي انگ ۾ واڌارو ڪيو ويندو ته جيئن سياحت ۽ عوامي رابطن کي هٿي ملي سگهي. سينيٽ چيئرمين چيو ته آذربائيجان جي صدر کيس باڪو ۾ موجود تاريخي ملتاني ڪارروان سراءِ جي باري ۾ به ٻُڌايو جنهن جي تاريخ 700 سالن تي ٻَڌل آهي. هن چيو ته هي ماڳ ان تاريخي حقيقت جي علامت آهي ته ننڍو کنڊ خاص ڪري ملتان سان تعلق رکندڙ واپاري سلڪ روٽ ذريعي آذربائيجان ايندا هئا. ان تاريخي ورثي کي نظر ۾ رکندي يونيسڪو به ان مقام کي خاص اهميت ڏني آهي ۽ ان جو نالو اڄ تائين تبديل نه ڪيو ويو. سينيٽ چيئرمين پاڪستان آذربائيجان دوستي زندهه باد جو نعرو لڳائيندي ٻنهي ملڪن وچ ۾ لاڳاپن کي وڌيڪ مستحڪم بنائڻ جي عزم کي ورجايو.