پاڪستان جي آءِ ٽي روانگي واپار ۾ مسلسل واڌارو ٿي رهيو آهي: شزه فاطمه خواجه

اسلام آباد-14 مئي (اي پي پي) آءِ ٽي ۽ـ ٽيلي ڪميونيڪيشن واري وفاقي وزير شزه فاطمه خواجه چيو آهي ته حڪومت جي سرپرستيءَ ۾ هلندڙ سڌارا، ڊجيٽل اسڪلز پروگرام ۽ پاليسي سپورٽ عيوض پاڪستان جي آءِ ٽي روانگي واپار ۾ مسلسل اضافو ٿي رهيو آهي جيڪو ملڪ جي ٽيڪنالاجي جي شعبي کي مضبوط بنائڻ لاءِ اهم آهي. ڪالهه قومي اسيمبليءَ ۾ سوالن جي وقفي دوران مختلف ميمبرن جي سوالن جا جواب ڏيندي هن چيو ته گذريل ڪيترن ئي سالن کان پاڪستان جي آءِ ٽي روانگي واپار ساليانو تقريبن 20 سيڪڙو جي شرح سان وڌي رهي آهي. هن ايوان کي ٻُڌايو ته موجوده حڪومت جو اقتدار سنڀالڻ وقت آءِ ٽي روانگي واپار تقريبن 2.4 ارب ڊالر هو ۽ موجوده مالي سال ۾ اها روانگي واپار 4.5 ارب ڊالرن کان وڌي وڃڻ جو امڪان آهي. شزه فاطمه خواجه ان ترقيءَ جو ڪريڊٽ وزيراعظم شهباز شريف جي اڳواڻيءَ ۾ حڪومت کي ڏنو ۽ چيو ته ان حڪومت آءِ ٽي سيڪٽر کي ترجيح ڏني ۽ پاليسي رعايتن ذريعي روانگي واپار ڪندڙن کي سهولتون فراهم ڪيون. وفاقي وزير چيو ته آءِ ٽي سيڪٽر واحد روانگي واپار تي ٻَڌل انڊسٽري آهي جيڪا فائنل ٽيڪس رجيم تحت ڪم ڪري رهي آهي. پاڪستان سافٽ ويئر ايڪسپورٽ بورڊ سان رجسٽرڊ ڪمپنين تي روانگي واپار تي صرف 0.5 سيڪڙو ٽيڪس لڳي ٿو جڏهن ته غير رجسٽرڊ ادارا هڪ سيڪڙو ٽيڪس ادا ڪن ٿا. هن چيو ته حڪومت ساليانو 50 هزار کان وڌيڪ نوجوانن کي ڊجيٽل ۽ هاءِ ٽيڪ اسڪلز جي تربيت ڏئي رهي آهي ۽ ملڪ جي وڌندڙ انساني وسيلن جي صلاحيت آءِ ٽي روانگي واپار ۾ واڌ جو مُک سبب آهي. هن چيو ته تربيتي پروگرامن ۾ به سڌارا آندا ويا آهن. هن چيو ته تربيتي قدمن لاءِ انٽرنيشنل سرٽيفڪيشنز ۽ ٿرڊ پارٽي ايويليويشنز کي لازمي قرار ڏنو ويو آهي جنهن جي نتيجي ۾ بهتر نتيجا سامهون اچي رهيا آهن. ايڊوانسڊ ٽريننگ پروگرام جي ٿرڊ پارٽي ايويليويشن مان خبر پوي ٿي ته ان جي مناسبت سان حاصل ٿيندڙ روزگار جي اهليت جي شرح 82 سيڪڙو آهي جيڪو هن عالمي معيار کان وڌيڪ قرار ڏنو. آءِ ٽي انڊسٽريءَ لاءِ سهولتن جي قدمن تي روشني وجهندي هن چيو ته حڪومت پي ايس اي بي ذريعي 7/24 فيسيليٽيشن سينٽر قائم ڪيا آهن ۽ ڪاروباري رجسٽريشن جي طريقيڪار کي آسان بڻايو آهي. هن چيو ته پي ايس اي بي رجسٽريشن لاءِ گهربل وقت 90 کان گهٽ ڪري صرف 9 منٽ ڪيو ويو آهي. وفاقي وزير ٻُڌايو ته آءِ ٽي ڪمپنين کي اسپيشل فارن ڪرنسي اڪائونٽس ۾ 50 سيڪڙو ڊالر ريٽينشن جي اجازت ڏني وئي آهي، جڏهن ته اسٽيٽ بئنڪ فارم اِي بابت ڪيتريون ئي ريگيوليٽري رڪاوٽون ختم ڪري ڇڏيون آهن. هن چيو ته وزيراعظم جي هدايت تي ڪمپنين کي روشن ڊجيٽل اڪائونٽس ذريعي سيڙپڪاري ڪرڻ جي به اجازت ڏني وئي آهي. هن ٻُڌايو ته گذريل ٻن سالن ۾ 250 کان وڌيڪ آءِ ٽي ڪمپنين عالمي روڊ شوز ۾ حصو ورتو، جڏهن ته سڄي ملڪ ۾ 10 اسپيشل ٽيڪنالاجي پارڪس ۽ 50 اِي روزگار سينٽرز قائم ڪيا ويا آهن. هن چيو ته آزاد ڄمون ڪشمير ۾ عورتن لاءِ مخصوص ٽيڪنالاجي پارڪس به قائم ڪيا ويا آهن ته جيئن ڊجيٽل معيشت ۾ عورتن جي شرڪت کي هٿي ڏئي سگهجي. انٽرنيٽ سروسز بابت سوال جي جواب ۾ وفاقي وزير چيو ته هاڻوڪن سالن ۾ 3 سب ميرين ڪيبل جي لينڊنگ سان پاڪستان جي انٽرنيشنل ڪنيڪٽوٽي بهتر ٿي آهي. فائبر آپٽڪ ڪنيڪٽوٽي سڄي ملڪ ۾ نمايان طور پکڙجي وئي آهي ۽ فائبر تي ٻَڌل گهريلو ڪنيڪشن 2024ع ۾ 1.9 ملين کان وڌي ٻن سالن ۾ 5.1 ملين ٿي ويا آهن. وفاقي وزير ٻُڌايو ته حڪومت نيشنل فائبرائزيشن پاليسيءَ تي عمل ڪري رهي آهي ۽ براڊ بينڊ انفراسٽرڪچر جي ترقيءَ کي تيز ڪرڻ لاءِ رائٽ آف وي چارجز ختم ڪري ڇڏيا آهن. هن ايوان کي وڌيڪ ٻُڌايو ته فائيو جي سروسز رول آئوٽ جي مرحلي ۾ داخل ٿي چڪي آهي ۽ اسلام آباد جي وڏن علائقن ۾ پائلٽ سروسز دستياب آهن. شزه فاطمه خواجه چيو ته ڊجيٽل ڊيوائيڊ کي گهٽ ڪرڻ لاءِ شهري ۽ ٻهراڙيءَ جي علائقن لاءِ ڌار ڌار انٽرنيٽ ڪوائلٽي مانيٽرنگ سسٽمز به متعارف ڪرايا پيا وڃن. وفاقي وزير ٻُڌايو ته حڪومت آءِ ٽي روانگي واپار ۾ 15 ارب ڊالر ۽ ڊجيٽل ٽرانفارميشن ذريعي واڌو 10 ارب ڊالرن جو هدف مقرر ڪيو آهي. هن چيو ته سيڪٽر جي سالياني اؤسر واري شرح کي 20 سيڪڙو کان وڌائي 30 سيڪڙو ڪرڻ لاءِ غير معمولي قدم کنيا پيا وڃن، جن ۾ مصنوعي ذهانت (آرٽيفيشل انٽيليجنس) جي تيز رفتار ترقي ۽ نيشنل اي آءِ پاليسي لاڳو ڪرڻ شامل آهي.