ڪراچي ۾ 13 ارب رپين جي لاڳت کان وڌيڪ جا منصوبا جاري آهن: سيد مراد علي شاهه

ڪراچي-05 جنوري (اي پي پي) سنڌ جي وڏي وزير سيد مراد علي شاهه چيو آهي ته ڪراچي ۾ پاڻي جي نيڪالِ ۽ روڊن جي بهتري جا 13 ارب رپين جي لاڳت کان وڌيڪ جا وڏا منصوبا جاري آهن. اهڙو اظهار هن ڪراچي ايڪسپو سينٽر ۾“ماءِ ڪراچي – اوئيسس آف هارموني” عالمي نمائش جي افتتاحي تقريب کي خطاب ڪندي ڪيو. وڏي وزير چيو ته اي-چالان سسٽم جي لاڳو ٿيڻ سان ٽريفڪ جي وهڪري ۾ بهتري جو ذڪر ڪندي شهرين تي زور ڀريو ته هو روڊ سيفٽي جي قاعدن تي سختي سان عمل ڪن. ايڪسپو سينٽر پهچڻ تي وڏي وزير جو صنعتن واري وزير ڄام اڪرام ڌاريجو، وزير ثقافت سيد ذوالفقار علي شاهه، عارف حبيب، زبير موتي والا، محمد ادريس ۽ ٻين منتظمين استقبال ڪيو. وڏي وزير منتظمين ۽ سفارتڪارن سان گڏ ربن ڪاٽي نمائش جو باقاعده افتتاح ڪيو. هن چيو ته هي نمائش ڪاروباري اعتماد، ثقافتي هم آهنگي ۽ گڏيل ترقي جي علامت آهي ۽ “ماءِ ڪراچي – اوئيسس آف هارموني” شهر ۽ ملڪ ٻنهي لاءِ ڪاروباري اعتماد، ثقافتي يڪجهتي ۽ گڏيل اڳڀرائي جو نشان آهي. افتتاحي تقريب کان پوءِ وڏي وزير نمايان خدمتون سرانجام ڏيندڙن ۽ نمائش ڪندڙن ۾ انعام پڻ ورهايا. نمائش کي خطاب ڪندي هن ڪاروباري برادري جي اڳوڻي اڳواڻ مرحوم سراج قاسم تيلي کي ڀرپور خراجِ عقيدت پيش ڪيو ۽ سندس ابدي آرام لاءِ دعا ڪئي. هن چيو ته “ماءِ ڪراچي” هاڻي ڪاروبار، ثقافت ۽ ڪميونٽي کي ڳنڍيندڙ هڪ اهم پليٽ فارم بڻجي چڪو آهي جيڪو هر سال قومي ۽ بين الاقوامي سطح تي ڌيان حاصل ڪري ٿو. سيد مراد علي شاهه پاڪستان جي معيشت ۾ ڪراچي جي مرڪزي ڪردار جو ٻيهر ذڪر ڪندي چيو ته شهر قومي پيداوار ۾ لڳ ڀڳ 25 سيڪڙو ۽ سنڌ جي معيشت ۾ تقريباً 90 سيڪڙو حصو ڏئي ٿو. هن وڌيڪ چيو ته ڪراچي پورٽ ۽ پورٽ قاسم شهر جي اسٽرٽيجڪ تجارتي اهميت کي وڌيڪ مضبوط ڪن ٿا. وڏي وزير چيو ته صوبائي حڪومت ۽ قانون لاڳو ڪندڙ ادارن جي مسلسل ڪوششن سبب ڪراچي وڌيڪ محفوظ ۽ مستحڪم ٿي چڪي آهي جنهن سان سيڙپڪارن جو اعتماد بحال ٿيو آهي ۽ نوان ترقياتي موقعا پيدا ٿيا آهن. هن چيو سيڪيورٽي هڪ جاري عمل آهي ۽ اسان ان وقت تائين آرام نه ڪنداسين جيستائين هر شهري ۽ سيڙپڪار پاڻ کي مڪمل طور محفوظ محسوس نه ڪري. مستقبل جي ترجيحن تي ڳالهائيندي هن چيو ته صوبائي حڪومت ڪراچي جي قومي ايڪسپورٽ ۾ حصو وڌائڻ، پيداوار جي صلاحيت ۾ اضافو ڪرڻ، ايڪسپورٽ مارڪيٽن ۾ واڌ آڻڻ ۽ ننڍن توڙي وڏن ڪاروبارن لاءِ ويليو چين مضبوط ڪرڻ جو ارادو رکي ٿي. هن زور ڀريو ته ڪراچي جي مستقبل جي تعمير ۾ ڪاروباري برادري جو بنيادي ڪردار آهي. توانائي جي شعبي بابت ڳالهائيندي وڏي وزير چيو ته سنڌ پاڪستان جي توانائي فراهمي جي ريڙهه جي هڏي آهي ۽ ملڪ جي لڳ ڀڳ 65 سيڪڙو قدرتي گئس پيدا ڪري ٿي تنهن هوندي به صنعتن کي گئس جي کوٽ آهي جيڪو پيداوار ۽ مقابلي جي صلاحيت کي متاثر ڪري ٿو. هن يقين ڏياريو ته سنڌ جي صنعتن لاءِ منصفاڻِي ۽ قابلِ اعتماد توانائي فراهم ڪرڻ لاءِ ڪوششون جاري رهنديون. گل پلازا ۾ پيش آيل افسوسناڪ باهه واري واقعي تي وڏي وزير ڏک جو اظهار ڪيو ۽ قيمتي انساني حياتين جي نقصان تي متاثر خاندانن لاءِ دعا ڪئي. هن اعلان ڪيو ته سنڌ حڪومت هر متاثر خاندان کي هڪ ڪروڙ رپيا معاوضو ڏئي رهي آهي جڏهن ته دڪاندارن کي فوري امداد طور پنج لک رپيا في دڪان ڏنا ويا آهن. هن چيو ته حڪومت ٻن مهينن اندر ڪاروبار بحال ڪرڻ چاهي ٿي ۽ گل پلازا جي عمارت کي وڌيڪ محفوظ ۽ بهتر نموني سان ساڳئي تعداد ۾ دڪانن سميت ٻن سالن اندر ٻيهر تعمير ڪيو ويندو. وڏي وزير هڪ ڀيرو ٻيهر ڪراچي ۾ جاري ترقياتي قدمن جو ذڪر ڪندي صنعتي اسٽيٽن جي فنڊنگ، 13 ارب رپين کان وڌيڪ نيڪال ۽ روڊن جي بهتري جي منصوبن ۽ هر ٽائون ۾ هڪ ارب رپين کان وڌيڪ منصوبن تي روشني وڌي. هن اي-چالان سسٽم سبب ٽريفڪ جي بهتري جو حوالو ڏيندي شهرين کي ٻيهر روڊ سيفٽي قاعدن تي عمل ڪرڻ جي اپيل ڪئي. ايمرجنسي ۽ ريسڪيو خدمتن بابت ڳالهائيندي هن فائر سيفٽي ۽ ريسڪيو ڪوآرڊينيشن ۾ انتظامي چئلينجن جو اعتراف ڪيو پر چيو ته سنڌ ريسڪيو 1122 شهر ۾ سرگرم نموني ڪم ڪري رهيو آهي. هن چيو جيڪڏهن ايمرجنسي حالتن ۾ ضايع ٿيندڙ وسيلن جو اڌ به فائر ۽ ريسڪيو خدمتن تي لڳايو وڃي ته اسان جو ريسپانس سسٽم گهڻو بهتر ٿي سگهي ٿو. پاڻي جي فراهمي بابت وڏي وزير چيو ته سنڌ حڪومت ورلڊ بينڪ سان گڏجي ڪي-فور واٽر منصوبي تي ڪم ڪري رهي آهي جنهن سان ڪراچي کي روزانو وڌيڪ 26 ڪروڙ گيلن پاڻي مهيا ڪرڻ جو هدف آهي. هن وڌيڪ چيو ته ڊگهي مدي وارن پاڻي جي ضرورتن لاءِ ڊي سيلينيشن منصوبن تي پڻ غور ڪيو پيو وڃي. پبلڪ پرائيويٽ پارٽنرشپ جي اهميت تي زور ڏيندي سيد مراد علي شاهه چيو ته عالمي ادارن سنڌ جي پي پي پي فريم ورڪ کي ساراهيو آهي. هن چيو حڪومتون ۽ ادارا فنڊ مهيا ڪري سگهن ٿا پر پائيدار ترقي لاءِ نجي شعبي جي ڀرپور شرڪت ضروري آهي ۽ وڌيڪ چيو ته جڏهن مقامي سيڙپڪار اعتماد ظاهر ڪندا ته پرڏيهي سيڙپڪاري پاڻمرادو ايندي. خطاب جي پڇاڙيءَ ۾ وڏي وزير چيو ته ڪراچي جي ترقي گڏيل ذميواري آهي. هن چيو حڪومت، نجي شعبي، سول سوسائٽي ۽ شهرين کي گڏجي اڳتي وڌڻو پوندو. مون کي پڪ آهي ته ڪاروباري برادري شهر، صوبي ۽ ملڪ جي ترقي ۾ پنهنجو ڪردار جاري رکندي ۽ آخر ۾ وڏي وزير نمائش ڪامياب منعقد ڪرٻ تي منتظمين، واپارين ۽ شرڪت ڪندڙن کي مبارڪون ڏنيون.