پاڪستان ٽن سالن جي مدي لاءِ گڏيل قومن جي انساني حقن واري ڪائونسل جو ميمبر چونڊيو آهي: پرڏيهي آفيس

اسلام آباد – 17 آڪٽوبر (اي پي پي) پرڏيهي آفيس جي ترجمان شفقت علي خان چيو آهي ته گڏيل قومن جي جنرل اسيمبلي پاڪستان کي ٽن سالن جي مدي لاءِ گڏيل قومن جي انساني حقن واري ڪائونسل جو ميمبر چونڊيو آهي، پاڪستان 178 ووٽن جي زبردست اڪثريت سان پنهنجي سيٽ حاصل ڪئي. پريس بريفنگ ۾ هن چيو ته پاڪستان پهرين جنوري 2026ع کان گڏيل قومن جي انساني حقن واري ڪائونسل جي سيٽ سنڀاليندو، 2006ع ۾ انساني حقن واري ڪائونسل قائم ٿيڻ کانپوءِ پاڪستان کي ڇهون ڀيرو ميمبر چونڊيو ويو آهي. ترجمان چيو ته اها چونڊ پاڪستان جي ملڪي ۽ عالمي سطح تي انساني حقن جي دفاع، فروغ ۽ تحفظ سان گڏوگڏ عالمي انساني حقن جي نظام کي مضبوط بڻائڻ جي لاءِ ان جي ڪردار تي اعتماد جي نشاندهي ڪري ٿي. هن چيو ته وڌيڪ اهو ته پاڪستان جا ثابت ٿيل ٽريڪ رڪارڊ ۽ انساني حقن واري ڪائونسل جي اتفاق راءِ پيدا ڪندڙ ملڪ جي طور تي مسلسل ڪوششن کي نمايان ڪري ٿو. ترجمان چيو ته پاڪستان انساني حقن واري ڪائونسل جي ميمبر جي طور تي پنهنجي ايندڙ مدي دوران انساني حقن جي سمورن رخن کي اڳتي وڌائڻ جي لاءِ گڏيل قومن ۽ سول سوسائٽي سان فعال طور تي مشغول رهندو. هن چيو ته پاڪستان انساني حقن واري ڪائونسل جي مينڊيٽ جي مڪمل حمايت پڻ ڪندو.