”رب ذوالجلال جو احسان“ پاڪستان تقريب ۽ اطلاعات ۽ نشريات واري وزارت جي اهتمام هيٺ نيشنل يوٿ/ علماءِ ڪنوينشن 28 مارچ تي ٿيندو

اسلام آباد – 27 – مارچ (اي پي پي) ”رب ذوالجلال جو احسان – پاڪستان“ جي پروقار تقريب ۽ اطلاعات ۽ نشريات واري وزارت جي اهتمام هيٺ نيشنل يوٿ/ علماءِ ڪنوينشن سڀاڻي (جمعي ڏينهن) جناح ڪنوينشن سينٽر اسلام آباد ۾ منعقد ٿيندو. تقريب جو انعقاد جمعته الوداع خاص طور تي 27 رمضان المبارڪ جي مناسبت سان ڪيو پيو وڃي. وزيراعظم آفيس جي ميڊيا ونگ پاران جاري بيان موجب پاڪستان جو قيام ليلته القدر، جمعته الوداع، رمضان المبارڪ جي مهيني 1336هه بمطابق 14 آگسٽ 1947ع تي وجود ۾ آيو. وزيراعظم محمد شهباز شريف تقريب ۾ خاص مهمان جي حيثيت سان شرڪت ڪندو ۽ نوجوانن کي خطاب ڪندو. وزيراعظم پاڪستان جي ترقي ۾ نوجوانن جي ڪردار، حڪومت جي نوجوانن جي لاءِ سڌاراجاتي قدمن ۽ مستقبل جي حڪمت عملي تي روشني وجهندو. وزيراعظم پنهنجي خطاب ۾ پاڪستان قائم ٿيڻ جي بنيادي نظريي، ان جي جاگرافيائي، دفاعي ۽ معاشي اهميت تي پڻ خيالن جو اظهار ڪندو. هو ان حقيقت کي اجاگر ڪندو ته پاڪستان 27 رمضان المبارڪ (شب قدر) تي هڪ اسلامي نظرياتي رياست جي طور تي وجود ۾ آيو جنهن جو بنياد ”پاڪستان جو مطلب ڇا؟ لااله اله الله“ جي اصول تي رکيو ويو. پاڪستان دنيا جي واحد اسلامي ائٽمي طاقت هجڻ جي ناطي عالمي سطح تي هڪ منفرد مقام رکي ٿو. ملڪ جي پاڪ فوج نه رڳو اسلامي دنيا جي مضبوط ترين عسڪريت قوت آهي پر پيشيواراڻي مهارت جي لحاظ کان به دنيا جي بهترين فوجن ۾ شامل ٿئي ٿي. نيشنل يوٿ ڪنوينشن ۾ نوجوانن کي قومي ترقي ۾ موثر ڪردار ادا ڪرڻ جي ترغيب ڏني ويندي. تقريب ۾ نوجوانن سميت سڄي پاڪستان مان سمورن مڪتبه فڪر سان تعلق رکندڙ ماڻهو شرڪت ڪندا. حڪومت پاران تعليم، روزگار، ڊيجيٽل معيشت ۽ ڪاروباري موقعن ۾ نوجوانن جي لاءِ جاري مختلف منصوبن تي روشني وڌي ويندي. پاڪستان جي جاگرافيائي بيهڪ ان کي عالمي سطح تي هڪ اهم ملڪ بڻائي ٿي. ماهرن موجب ڏکڻ ايشيا ۾ پاڪستان جي پوزيشن ان کي مستقبل جي عالمي معاشي ۽ جيو پوليٽيڪل منظرنامي ۾ اهم ڪردار ادا ڪرڻ جو موقعو فراهم ڪري ٿي. هي ڪنوينشن نوجوانن کي نه رڳو قومي ترقي ۾ حصو وٺڻ جي لاءِ حوصلا افزائي ڪندو پر انهن کي جديد دنيا جي گهرجن سان هم آهنگ ڪرڻ ۾ پڻ مددگار ثابت ٿيندو.