حافظ آباد – 13 – مارچ (اي پي پي) وزيراعظم عمران خان چيو آهي ته ليڊر ڪڏهن ڪنهن جي اڳيان ناهي جهُڪندو، سياست ۾ پاڪستانين کي هڪ قوم بڻائڻ جي لاءِ آيو آهيان، پاڪستانين جي حقن جو تحفظ منهنجي سڀ کان وڏي ذميواري آهي، ٻين کي خوش ڪرڻ جي لاءِ ملڪ کي نقصان پهچائڻ جي اجازت ڪڏهن به نه ڏيندس، اسان هڪ آزاد ملڪ آهيون ڪنهن جا غلام نه آهيون، حڪومت ڪيرائڻ جي لاءِ چوري جي پئسي سان ضمير خريد ڪيا پيا وڃن پر مخالف ڌر کي پنهنجي مقصد ۾ ناڪامي ٿيندي، پاڪستان دنيا ۾ هر ملڪ سان سٺا لاڳاپا رکڻ چاهي ٿو، پاڪستان جي تاريخ ۾ ايتري ترقي نه ٿي هوندي جيتري هنن سالن ۾ ٿيندي، سڄي ملڪ ۽ خاص طور تي پنجاب ۾ اهي ڪم ڪري ڏيکارينداسين جيڪي ماضي ۾ نه ٿيا هوندا. اهڙن خيالن جو اظهار هن حافظ آباد ۾ عوامي جلسي کي خطاب ڪندي ڪيو. وزيراعظم جلسي جي ڪامياب انعقاد تي قومي اسيمبلي ميمبر شوڪت ڀٽي ۽ صوبائي اسيمبلي ميمبرن سميت مهدي حسن ڀٽي ۽ پي ٽي آءِ جي ڪارڪنن کي مبارڪباد ڏني. هن چيو ته شوڪت ڀٽي مطالبن جي ايتري وڏي لسٽ پيش ڪئي آهي جو ائين لڳي ٿو ته جيڪي ڪم 70 سالن ۾ نه ٿيا اهي هڪ سال ۾ ڪرائڻ چاهي ٿو. هن چيو ته منهنجو توهان سان واعدو آهي ته جڏهن حڪومت جا 5 سال مڪمل ٿيندا ته پاڪستان جي تاريخ ۾ ايتري ترقي نه ٿي هوندي جيتري هنن سالن ۾ ٿيندي. وزيراعظم چيو ته اسان سڄي ملڪ ۽ خاص طور تي پنجاب ۾ اهي ڪم ڪري ڏيکارينداسين جيڪي ماضي ۾ نه ٿيا هوندا. وزيراعظم جلسي جي شرڪت ڪندڙن کان سوال ڪيو ته توهان ٻڌايو مون کي 25 سال اڳ سياست ۾ اچڻ جي ڪهڙي ضرورت هئي، زندگي ۾ مون جيڪو چاهيو خدا ڏنو پر آئون علامه اقبال ۽ قائداعظم جي خواب جي تعبير چاهيندو هئس، ان لاءِ سياست ۾ آيس. هن چيو ته علامه اقبال جي خواب موجب پاڪستان جو مقصد هڪ قوم بڻجڻ هو. هن چيو ته ڪا به قوم ڪنهن هڪ نظريي تي بيهي ئي قوم بڻجي سگهي ٿي، باقي ماڻهن جو ميڙ هوندو آهي جنهن ۾ علائقائي نعرا لڳندا آهن. هن چيو ته جيستائين قوم کي پاڪستان ٺهڻ جو مقصد معلوم نه هجي اسان هڪ قوم نه ٿا بڻجي سگهون. عمران خان چيو ته الله تعاليٰ به نبي ڪريم ﷺ جي سنت تي عمل ڪرڻ جي تلقين ڪري ٿو، جيستائين مسلمان سنت نبوي ﷺ تي عمل پيرا رهيا ته صدين تائين دنيا تي حڪومت ڪئي پر جڏهن ان کان پٺتي هٽيا ته هيٺ اچي ويا. وزيراعظم عمران خان چيو ته مون پنهنجي قوم جي تربيت لاءِ رحمت للعالمين ﷺ اٿارٽي قائم ڪئي آهي جنهن جو مقصد ٻارن ۽ نوجوانن کي نبي ﷺ جي سيرت کان آگاهي فراهم ڪرڻ آهي. هن چيو ته اسان جو نبي ﷺ سڀني انسانن جي لاءِ رحمت بڻجي آيا هئا ۽ انهن مديني جي رياست ۾ سمورن انسانن کي گڏ ڪيو، نظريو عدل ۽ انصاف جو نظريو هو جنهن تحت سڀني جي لاءِ هڪ ئي قانون هو، مديني جي رياست جو ٻيو اصول هڪ فلاحي رياست هو ۽ هي دنيا جي پهرين فلاحي ۽ خوددار رياست هئي. هن چيو ته الله تعاليٰ امر باالمعروف و نهي عن المنڪر جو درس ڏنو آهي، عوام جي ذميواري آهي ته اها سٺائي جو ساٿ ڏي ۽ برائي جي خلاف جهاد ڪري. هن چيو ته خدا ان ڳالهه جي اجازت نه ٿو ڏي ته توهان برائي جي خلاف نه بيهو جيستائين اسان برائي جي خلاف نه بيهنداسين ته اڳتي نه ٿا وڌي سگهون. هن چيو ته جڏهن ڪا قوم ظلم جي خلاف نه ٿي بيهي ته ظلم وڌندو ويندو آهي، ڪرپشن جي خلاف نه اٿون ته ڪرپشن وڌي وڃي ٿي، معاشري ۾ ڏوهه وڌن ته معاشري کي ان جو مقابلو ڪرڻ گهرجي. وزيراعظم عمران خان چيو ته آئون گذريل 25 سالن کان پنهنجي قوم ۾ تبليغ ڪري رهيو آهيان ته جيڪڏهن عظيم قوم بڻجڻو آهي ته سٺائي جو ساٿ ڏيڻو پوندو. هن چيو ته حڪومت کي ڪيرائڻ جي لاءِ چوري جي پئسي سان ماڻهن جا ضمير خريد ڪرڻ تي رياست، عوام، عدليه ۽ اليڪشن ڪميشن جي ذميواري آهي ته اهي ان جي خلاف اٿي بيهن. هن چيو ته مون اولهه ۾ ڪافي وقت گذاريو اتي ڪنهن جي جرئت نه آهي ته ڪنهن پارليامينٽ ميمبر جو ضمير خريد ڪري سگهي، ان تي هو معاشري ۾ پنهنجي شڪل به نه ٿو ڏيکاري سگهي. هن آمريڪا جي هڪ امير ترين شخص جو مثال ڏيندي چيو ته جڏهن هو ڪرپشن ۾ پڪڙيو ويو ته ان جي وڏي پٽ خودڪشي ڪري ڇڏي، ٻيو گهر مان ئي نه نڪتو ۽ فوت ٿي ويو، گهرواريءَ طلاق وٺي ڇڏي، ڀيڻ ۽ مڙس خودڪشي ڪئي ڇو ته انهن کي خبر هئي ته معاشري ۾ انهن جي جڳهه ختم ٿي وئي آهي. هن چيو ته جڏهن قوم امر باالمعروف تي بيهي ٿي ته خدا جو خوف پيدا ٿئي ٿو. هن چيو ته رحمت للعالمين ﷺ اٿارٽي قائم ڪرڻ سان ٻارن جي تعليم ۽ تربيت ۽ عوام جي ڪردارسازي ۾ مدد ملندي. هن چيو ته مديني جي رياست ۾ به ماڻهن جي اخلاقيات تي ڌيان ڏنو ويو، انهي فلسفي تحت اٿارٽي هر ٻار جي تربيت ڪندي جنهن سان عوام ۾ شعور پيدا ٿيندو. هن چيو ته اسان کي علامه اقبال جي سوچ موجب هڪ مثالي ملڪ بڻجڻو آهي، آئون 25 سال اڳ ان لاءِ سياست ۾ آيو هئس ته پاڪستانين کي هڪ قوم بڻائي سگهان ڇو ته قائداعظم کانپوءِ اسان جي قوم جو وقار هيٺ ڪرندو ويو جنهن جو بنيادي سبب حڪمرانن جو پاڪستان جي تخليق کان اڻواقف هجڻ هو. هن چيو ته پاڪستان قائم ڪرڻ وقت پاڪستان جو مطلب ڇا ”لا اله الله“ جو نعرو لڳو هو، جنهن جي فلسفي تحت اسان غيرتمند قوم بڻجي سگهون ٿا. هن چيو ته قومي خودداري جي لاءِ اسان فيصلو ڪيو ته پوري قوم جو هڪ تعليمي نصاب هوندو ته جيئن تعليم ۾ فرق ختم ٿي سگهي ۽ پاڪستان جي تاريخ ۾ 70 سالن کانپوءِ هڪ نصاب متعارف ڪرايو ويو آهي جنهن تي تعليم ۽ تربيت وارو وفاقي وزير شفقت محمود خراج تحسين جو مستحق آهي. هن چيو ته اسان چاهيون ٿا ته سمورا شاگرد انگريزي پڙهن پر ان سان انسانن ۾ فرق پيدا نه ٿئي جنهن جي لاءِ اسان اهو ڪم ڪيو آهي، شروع ۾ پنجين درجي تائين هڪ جهڙو نصاب متعارف ڪرايو ويو آهي ان کي باقي ڪلاسز تائين به وڌائينداسين ته جيئن ديني مدرسن سميت سڀني ٻارن کي انگريزي سميت ٻيا جديد علم پڙهايون ته جيئن ٻار ترقي ڪري سگهن. هن چيو ته مون پوري قوم جي ترقي لاءِ تعليم جي شعبي تي خاص ڌيان ڏنو آهي ان حوالي سان نوجوانن کي 26 لک اسڪالرشپس ڏئي رهيا آهيون جن جي سڌوسنئون نگراني وزيراعظم آفيس مان ڪئي پئي وڃي ته جيئن ميرٽ ۽ شفافيت يقيني بڻجي ته جيئن قابل ۽ ذهين ٻارن کي وظيفا ملن، اسان ٽيڪنالاجي شعبي جي ترقي لاءِ پاڪستان ۾ پهريون ڀيرو ٻه يونيورسٽيون ٺاهي رهيا آهيون جن ۾ سموريون جديد ٽيڪنالاجيز پڙهايون وينديون انهي حوالي سان هڪ ايرو اسپيس ٽيڪنالاجي يونيورسٽي ٺاهي پئي وڃي ته جيئن اسان به ان شعبي ۾ ترقي ڪري سگهون ۽ ملڪ پنهنجي پيرن تي بيهي سگهي. وزيراعظم عمران خان نوجوانن کي مخاطب ڪندي چيو ته سڀ کان ضروري ڳالهه اها آهي ته جڏهن نبي ﷺ مسلمانن جي ٿوري انگ جي باوجود ان وقت جي ٻن سپر پاورز کي خط لکيا هئا، نبي ﷺ روم ۽ فارس جي سپر پاورز کي پيغام ڏنو ته آئون الله جو پيغام کڻي آيو آهيان، جيڪڏهن توهان ان تي هلندا ته توهان جي بهتري آهي. هن چيو ته ليڊر ڪنهن جي آڏو ناهي جهڪندو ۽ اها نبي ﷺ جي سنت به آهي، ڪلمو پڙهڻ کانپوءِ ڪو انسان ڪنهن ڪوڙي جي آڏو نه ٿو جهڪي پر اسان جي بدقسمتي آهي ته جڏهن اسان جو وزيراعظم آمريڪي صدر آڏو ويهي ته ان جون ڪانپين ٽانگ رهيون هيون، پرچيءَ سان پڙهندو هو، جيڪڏهن اهڙي طرح جو رويو ڪو ليڊر ڪنهن آڏو ڪري ته ان جي قوم جو معيار هيٺ ڪري ٿو ڇو ته هڪ ليڊر ئي قوم کي مٿي اٿاريندو آهي. هن چيو ته اسان جو عظيم ليڊر قائداعظم محمد علي جناح غلام ملڪ ۾ آزاد ليڊر هو جيڪو ڪنهن جي آڏو نه جهُڪيو. يورپي يونين جي سفيرن جي خط جي حوالي سان وزيراعظم عمران خان چيو ته انهن خط ۾ روس جي خلاف بيان ڏيڻ جو چيو جيڪا سفارتي آدابن جي خلاف ورزي آهي. هن چيو ته دنيا جي ڪنهن ٻئي ملڪ به سفير حڪومت کي خط نه ٿو لکي سگهي جنهن جي ڪري مون ان تي تنقيد ڪئي، اسان هڪ آزاد ملڪ آهيون ڪنهن جا غلام نه آهيون. هن چيو ته فضل الرحمان، شهباز شريف ۽ بلاول ان تي چيو ته وزيراعظم وڏو ظلم ڪيو آهي. هن چيو ته آئون اولهه کي سڀ کان بهتر ڄاڻان ٿو ۽ انهن جي ذهنيت به ڄاڻان ٿو جيڪي ماڻهو انهن جا بوٽ پالش ڪن ٿا انهن کي اهي حقارت سان ڏسن ٿا، جڏهن ته قوم جي مفادن جي لاءِ بيهندڙن جي عزت ڪن ٿا. وزيراعظم نوجوانن تي زور ڏنو ته جيڪو پنهنجي عزت ڪري ٿو دنيا ان جي عزت ڪري ٿي ۽ جيڪو پنهنجي عزت نه ڪري دنيا ان جي عزت نه ٿي ڪري، ان کي پنهنجي زندگي جو اصول بڻائي ڇڏيو. هن چيو ته 2008ع کان 2018ع دوران پاڪستان ۾ 400 کان وڌيڪ ڊرون حملا ان ملڪ ڪيا جنهن جي لاءِ اسان جنگ وڙهي رهيا هئاسين، آصف زرداري ۽ نواز شريف انهن حملن جي هڪ ڀيرو به مذمت نه ڪئي، اهي حملا دنيا جي قانونن جي خلاف هئا ۽ ڪو به قانون ان جي اجازت نه ٿو ڏي، جن جي لاءِ اسان جنگ وڙهي رهيا هئاسين اهي ئي اسان تي بمباري ڪري رهيا هئا، مون هر جڳهه تي چيو ته اها انساني حقن جي خلاف ورزي آهي. وزيراعظم چيو ته ان وقت مختلف ملڪن جي سفيرن چيو هو ته توهان ڊرون حملن جي مخالفت ڇو ٿا ڪريو ان سان ته دهشتگرد ماريا پيا وڃن جنهن تي مون چيو ته اسان جو هڪ دهشتگرد لنڊن ۾ 30 سالن کان ويٺل آهي جنهن ڪراچي ۾ ايترن ماڻهن کي قتل ڪيو آهي جيڪو ڪنهن ٻئي ناهي ڪيو پر فرق اهو آهي ته ان پاڪستاني قتل ڪيا آهن ۽ گهرڻ تي به ان کي اسان جي حوالي نه پيو ڪيو وڃي. هن چيو ته ڇا توهان اجازت ڏيندا ته اسان ڊرون حملي سان ان کي لنڊن ۾ ماري ڇڏيون، توهان ان جي اجازت نه ڏيندا ڇو ته ڪو به مهذب معاشرو ان جي اجازت نه ٿو ڏي. وزيراعظم واضح ڪيو ته پاڪستان دنيا ۾ هر ملڪ سان سٺا لاڳاپا رکڻ چاهي ٿو، آئون 22 ڪروڙ عوام جو وزيراعظم آهيان ۽ پاڪستانين جي حقن جو تحفظ منهنجي سڀ کان وڏي ذميواري آهي، آئون ڪنهن جي خوشي جي لاءِ ڪڏهن به اجازت نه ڏيندس ته ڪير اسان جي ملڪ جي خلاف قدم کڻي. پنهنجي آمريڪا جي دوري جو حوالو ڏيندي هن چيو ته مون سڀ کان گهٽ خرچ ڪيو، ڪمرشل فلائيٽ سان سفر ڪيو، هوٽل بدران سفارتخاني جي ڪمري ۾ رهيس ڇو ته مون ٻڌائڻ چاهيو پئي ته ملڪ جي معاشي حالتن جي ڪري آئون بچت ڪري رهيو آهيان. هن چيو ته ماضي ۾ نواز شريف ۽ آصف زرداري 12 ۽ 14 لک ڊالرز ۾ دورا ڪيا هئا جڏهن ته منهنجي دوري تي ڪل خرچ 1.5 لک ڊالر ٿيو. هن چيو ته جڏهن توهان اتي وڏين هوٽلن ۾ رهو ٿا تحفا ڏيو ٿا ته اهي توهان جي عزت نه ٿا ڪن پر مذاق اڏائين ٿا، ٻئي طرف جڏهن اهي ڏسن ته ڪنهن ليڊر کي پنهنجي ملڪ جو فڪر آهي ته اهي ان جي عزت ڪن ٿا، غيرملڪي حڪومتي سربراهه اسان جي حڪمرانن جي تعليم، سياست ۽ ايمانداري بابت به سڀ ڄاڻين ٿا، انهن کي خبر هوندي آهي ته ڪنهن جون اربين رپين جون پراپرٽيون ٻاهرئين ملڪ آهن ته اهي ان جي عزت نه ٿا ڪن. هن چيو ته الله تعاليٰ مون کي سڄي دنيا ۾ عزت ڏني آهي ڇو ته انهن کي خبر آهي ته منهنجو ڪو پئسو ٻاهر نه آهي ۽ نه ئي مون ڪرپشن ڪئي آهي. وزيراعظم چيو ته چين به اسان جي عزت ڪري ٿو ۽ ان رڪارڊ وقت ۾ جي 10 سي جهاز اسان کي ڏنا آهن، 1982ع کانپوءِ اهڙي طرح جا جديد جهاز پاڪستان آيا آهن ۽ 7 مهينن ۾ اهو اسڪوارڊن مليو آهي ۽ ايف 16 کانپوءِ اهي جديد جهاز آهن جن سان ملڪ جي دفاع کي مستحڪم ڪرڻ ۾ مدد ملندي. پنهنجي روس جي دوري بابت وزيراعظم عمران خان چيو ته دوري دوران اسان کي ٽي گارڊ آف آرنرز ڏنا ويا ۽ اسان کي عزت ڏني وئي، اهڙي طرح اڳوڻي آمريڪي صدر ٽرمپ سان جڏهن مليس ته ان به عزت ڏني هئي ڇو ته هو ڄاڻيندو هو ته آئون غلط نه آهيان. هن چيو ته قوم جي عزت ليڊر سان ٿئي ٿي جڏهن اهو جُهڪي ٿو ته قوم جي عزت نفس به تباهه ٿئي ٿي. هن چيو ته مون 25 سال اڳ چيو هو ته آئون نه جهُڪيو آهيان ۽ نه جهُڪندس. او آءِ سي ڪانفرنس جي حوالي سان هن چيو ته 22 مارچ تي 15 سالن کانپوءِ اسلام آباد ۾ او آءِ سي ڪانفرنس ٿي رهي آهي جنهن ۾ سمورن مسلمان ملڪن جا پرڏيهي وزير شرڪت ڪري رهيا آهن، اسان جا لاڳاپا سڀني سان آهن ۽ رکڻ چاهيون ٿا پر ملڪ جي مفادن تي ٺاهه نه ڪنداسين. اسان مديني جي فلاحي رياست جي طز تي قدم کنيا آهن جن تحت ماڻهن جو تحفظ رياست ڪندي ۽ فلاحي رياست جو اهو سفر پاڪستان کي هڪ قوم بڻائيندو. هن چيو ته رحمت للعالمين ﷺ اٿارٽي، هڪ جهڙو نصاب ۽ خوددار قيادت اسان کي هڪ قوم بڻائيندي، فلاحي رياست جي قدمن تحت ملڪ ۾ صحت ڪارڊ آندو آهي ۽ سنڌ کانسواءِ ٻين سڀني صوبن ۾ صحت ڪارڊ جي سهولت فراهم ڪري رهيا آهيون. هن چيو ته ان منصوبي تي پنجاب حڪومت 400 ارب رپيا خرچ ڪيا آهن هر خاندان کي 10 لک رپين جو صحت ڪارڊ ڏئي رهيا آهيون جنهن سان بيماري جي صورت ۾ هو ڪنهن به سرڪاري يا نجي اسپتال مان 10 لک رپين تائين جو علاج ڪرائي سگهي ٿو. هن چيو ته عام ماڻهو نجي اسپتال بابت سوچي به نه سگهندو هو پر صحت ڪارڊ سان ممڪن ٿيو آهي. هن چيو ته لاهور جي سڀ کان مهانگي نجي ڊاڪٽرز اسپتال جي سربراهه مون کي ٻڌايو ته اسان صحت ڪارڊ تي هڪ ڊرائيور جي دل جي آپريشن ڪئي آهي. هن چيو ته 70 سالن ۾ ڪنهن به عام ماڻهو بابت نه سوچيو هو، پاڪستان تحريڪ انصاف عام ماڻهو جي ڀلائي تي خاص ڌيان ڏئي رهي آهي، ملڪ جي وڏن وڏن شهرن ۾ مزدوري جي لاءِ ايندڙ ماڻهو رستن تي سمهندا هئا پر اسان انهن جي لاءِ پناهگاهن جو سلسلو شروع ڪيو ته جيئن مزدورن کي سهولت ملي سگهي ۽ اهي پئسو بچائڻ جي لاءِ رستي تي نه سمهن. هن چيو ته سڄي ملڪ ۾ موجود پناهگاهن جي معيار کي بهتر ڪرڻ سان گڏوگڏ وڌيڪ پناهگاهون پڻ تعمير ڪري رهيا آهيون جتي رهائش ۽ کاڌو مفت ملندو جنهن سان مزدور طبقو پنهنجي خاندانن کي وڌ کان وڌ پئسو موڪلي سگهندا، مستقبل ۾ پناهگاهن سان گڏ دڪان ٺاهيا ويندا ته جيئن انهن جو خرچ هلي سگهي. وزيراعظم عمران خان چيو ته فلاحي رياست جو هڪ ٻيو قدم ڪامياب پاڪستان پروگرام تحت شهرن ۽ ڳوٺن ۾ 20 لک خاندانن کي بنا وياج قرض فراهم ڪرڻ سان گڏوگڏ پهريون ڀيرو ملڪ ۾ نوجوانن کي فني ۽ پيشيواراڻي تربيت پڻ ڏني پئي وڃي. پنهنجي گهر جي حوالي سان هن چيو ته عام ماڻهو سوچي به نه سگهندو هو ته شهر ۾ گهر ٺاهي سگهي جنهن جي ڪري ڪچي آباديون ڏينهون ڏينهن وڌي رهيون هيون، اسان بئنڪن سان گڏجي گهٽ آمدني وارن ماڻهن کي گهر جي تعمير لاءِ قرض ڏيڻ شروع ڪيا ته جيئن اهي ڪرائي جي مد ۾ ڏني ويندڙ رقم بئنڪ کي قسط ڏئي پنهنجو گهر ٺاهي سگهن، هيستائين 60 ارب رپين کان وڌيڪ جا قرض ڏنا ويا آهن ان ۾ وڌيڪ اضافو ڪيو ويندو. مهانگائي جي حوالي سان وزيراعظم عمران خان چيو ته حڪومت احساس راشن پروگرام شروع ڪري رهي آهي جنهن ۾ 2 ڪروڙ خاندانن کي پئسا ڏينداسين ته جيئن اهي گيهه، اٽي ۽ کنڊ تي 30 سيڪڙو رعايت حاصل ڪري سگهن. وزيراعظم رڪارڊ ٽيڪس اوڳاڙين تي خوشي جو اظهار ڪندي چيو ته اسان ان سان پيٽرول ۽ ڊيزل جون قيمتون 10 رپيا في ليٽر گهٽ ڪيون آهن جڏهن ته دنيا ۾ قيمتن ۾ اضافي جو رجحان آهي، اهڙي طرح بجلي جي قيمت ۾ به 5 رپيا في يونٽ گهٽتائي ڪئي وئي آهي. هن مثال ڏنو ته آمريڪا، برطانيا، يورپ ۽ دبئي سميت ڪيترن ئي ملڪ ۾ تيل اسان کان مهانگو آهي پر اسان تيل درآمد ڪرڻ جي باوجود ٻين ملڪن جي ڀيٽ ۾ سستو فراهم ڪري رهيا آهيون. هن چيو ته جيئن جيئن ٽيڪس جا پئسا وڌندا ويندا توهان جو بار گهٽ ڪندو ويندس. هن چيو ته گذريل 100 سالن دوران ڪورونا جو تازو سڀ کان وڏو بحران آيو ته سڄي دنيا لاڪ ڊائون هنيو، مون کي به چيو ويو ته ائين ئي ڪيو وڃي، مون هڪ سوال بار بار ڪيو ته اسان جي ڏهاڙي تي ڪم ڪندڙ طبقي جو ڇا ٿيندو، سڀني چيو ته وزيراعظم ملڪ کي مارائي ڇڏيندو پر الله جي ڪرم سان اڄ ٻن سالن کانپوءِ پوري دنيا چوي ٿي ته وزيراعظم ۽ پاڪستان جي حڪمت عملي سڀ کان سٺي رهي آهي جنهن جي پوئيواري دنيا ڪري رهي آهي. هن چيو ته جيڪڏهن اسان ايترا ئي نااهل هئاسين ته مشڪل وقت ۾ حڪمت عملي جي دنيا تعريف ڇو ڪري رهي آهي، ڪورونا وبا دوران قومي معيشت 5.6 سيڪڙو وڌي جنهن تي سڀئي دنگ رهجي ويا، برآمدات ۽ خاص طور تي ٽيڪسٽائيل برآمدات ۾ رڪارڊ اضافي کانسواءِ مٽاسٽا جي ناڻي ۾ پڻ نمايان بهتري ٿي، تعميرات جي شعبي ۾ 1500 ارب رپيا آيا، آءِ ٽي جي روانگي واپار ۽ ڪڻڪ، ڪمند، چانور، مڪئي وغيره چار وڏين فصلن جي رڪارڊ پيداوار ٿي. هن چيو ته تازو صنعتي پئڪيج ئي پاڪستان کي بدلائي ڇڏيندو. هن چيو ته پاڪستان موسمياتي تبديلين جا جيڪي قدم کنيا ان تي برطانيا جي وزيراعظم چيو ته اهو هڪ مثال آهي جڏهن ته گڏيل قومن پڻ ان کي تسليم ڪيو. هن چيو ته گذريل 50 سالن ۾ پهريون ڀيرو ملڪ ۾ ڊيم ٺهيا آهن ۽ اسان 10 نوان ڊيم ٺاهي رهيا آهيون جنهن سان پاڻي جي بچت ٿيندي ۽ سستي بجلي دستياب ٿيندي. هن چيو ته انشاءَ الله ٽن سالن ۾ مهمند ڊيم مڪمل ٿي رهيو آهي جنهن کانپوءِ داسو ۽ ڀاشا ڊيم مڪمل ٿيندا ته ملڪ ۾ پاڻي ذخيرو ڪرڻ جي صلاحيت ٻيڻي ٿي ويندي. پنهنجي خطاب جي آخر ۾ وزيراعظم عمران خان چيو ته منهنجو ايمان آهي ته اسان جو ملڪ هڪ عظيم ملڪ بڻجندو جيڪو 27 رمضان تي وجود ۾ آيو. هن چيو ته اسان کي دنيا کي ٻڌائڻو آهي ته حضور ﷺ جي مديني جي رياست جي اصولن تي هلي اسان دنيا جو عظيم ترين ملڪ بڻجنداسين. گذريل ڏينهن ڀارتي ميزائيل جي پاڪستاني حدن ۾ ڪرڻ تي هن چيو ته ان تي اسان حڪمت جي راهه اختيار ڪئي، اسان پنهنجو دفاع ڪري سگهون ٿا، قومي معيشت صحيح رخ ۾ ترقي ڪري رهي آهي ۽ ايندڙ ڏيڍ سال ۾ وڌيڪ ترقي ڪنداسين. وزيراعظم عمران خان چيو ته توهان فڪر نه ڪريو مخالف ڌر حڪومت ڪيرائڻ جي ڪوشش ڪري رهي آهي پر توهان ڏسندا ته حڪومت ڪرڻ بدران اهڙي طرح جي ڪوشش ڪندڙ ناڪام رهندا. ان کان اڳ وزيراعظم عمران خان جڏهن هڪ ڏينهن جي دوري تي حافظ آباد پهتو ته سندس شاندار استقبال ڪيو ويو. وزيراعظم مختلف منصوبن جو افتتاح پڻ ڪيو جن ۾ 6 ارب رپين جي لاڳت سان قائم ڪئي ويندڙ يونيورسٽي آف حافظ آباد، 10 ارب رپين سان 400 بيڊز تي ٻڌل ڊي ايڇ ڪيو اسپتال ۽ 10 ارب رپين جي لاڳت سان حافظ آباد کان گوجرانوالا ٻن ڦاڪن واري رستي جي تعمير جا منصوبا شامل هئا. وزيراعظم عمران خان جي حافظ آباد جي دوري جي موقعي تي وفاقي وزير شاهه محمود قريشي، اسد عمر، شفقت محمود، خاص معاون شهباز گل ۽ سينيٽر فيصل جاويد پڻ وزيراعظم سان گڏ هئا.
