راولپنڊي- 07 مئي (اي پي پي) پاڪ فوج جي ترجمان ميجر جنرل احمد شريف چيو آهي ته 9 مئي صرف پاڪستان جي فوج جو نه پر پوري پاڪستان جي عوام جو ڪيس آهي، جيڪڏهن ڪو سياسي سوچ، ليڊر يا ٽولو پنهنجي فوج تي حمله آور ٿئي، قوم جي شهيدن جي بي حرمتي ڪندڙن سان ڪا ڳالهه نه ٿيندي، 9 مئي وارا واقعا ڪرڻ يا ڪرائڻ وارن کي سزا ڏيڻي پوندي، جزا ۽ سزا تي يقين رکڻ لاءِ ضروري آهي ته 9 مئي جي جوابدارن کي قانون ۽ آئين مطابق جلد کان جلد سزا ڏني وڃي. جوڊيشل ڪميشن ته ان تي بڻجي ٿو جنهن تي ڪو ابهام هجي، اهي واقعا ته تاريخ تي آهن ۽ سڀني آڏو آهن. هو آءِ ايس پي آر ڊائريڪٽوريٽ ۾ پريس ڪانفرنس کي خطاب ڪري رهيو هو. ميجر جنرل احمد شريف چوڌري چيو ته خطي ۾ دهشتگردي خلاف سڀني کان اهم ڪردار پاڪستان جو رهيو آهي، پاڪستان دهشتگرديءَ جي نيٽ ورڪ کي ختم ڪرڻ ۾ ڪا ڪسر نه ڇڏيندو، دهشتگردن خلاف هر ممڪن حد تائين وينداسين، دهشتگردي جهڙي ناسور کي پاڙؤن پٽڻ لاءِ تيار آهيون. پاڪستاني فوج جي اولين ترجيح ملڪ ۾ امن امان جو قيام آهي، اسان دهشتگردن ۽ انهن جي سهولتڪارن کي منتقي انجام تائين پهچائڻ لاءِ هر حد تائين وينداسين. پاڪستان دهشتگرديءَ خلاف وڙهي رهيو آهي، پاڪستان دهشتگرديءَ خلاف ڊگهي جنگ وڙهي آهي. هن چيو ته 5 لک 63 هزار کان وڌيڪ افغان شهري واپس وڃي چڪا آهن، جڏهن ته لکين افغان شهري اڃا به پاڪستان ۾ موجود آهن. افغان شهرين سان ملڪي معيشت تي بار پئجي رهيو هو ۽ امن امان جي صورتحال خراب ٿي رهي هئي، جڏهن ته بلوچستان ۾ دهشتگرد امن امان جي صورتحال خراب ڪري رهيا آهن. پاڪ فوج دهشتگردن جي سامهون ڀِت وانگر بيٺل آهي. پاڪ فوج جي ترجمان جو چوڻ هو ته اُتر وزيرستان جي چيڪ پوسٽ تي دهشتگرد حملي ۾ جوان شهيد ٿيا، ناڪام دهشتگرد ڪارروايون ثبوت آهن ته سيڪيورٽي فورسز دشمن جا عزم ناڪام بڻائي رهي آهي. 26 مارچ تي هڪ افسوسناڪ واقعو پيش آيو جنهن جو تعلق افغان شهريءَ سان مليو. داسو ڊيم حملي جي منصوبا بندي افغانستان مان ڪئي وئي. داسو ڊيم حملي جو آپگهاتي حملي آور افغان هو. تازن حملن ۾ ملوث دهشتگرد افغان شهري آهن، دهشتگردن کي ڪٽهڙي ۾ آڻڻ لاءِ قدم کنيا پيا وڃن. آرمي چيف چئي چڪو آهي ته پاڪستان ۾ دهشتگردن خلاف ڪابه جاءِ ناهي. هن چيو ته افغان سرزمين استعمال ڪري ٽي ٽي پي ڪارروايون ڪري رهي آهي. تازي دهشتگرديءَ جون واڳون افغانستان ملن ٿيون. پاڪستان افغانستان جي عبوري حڪومت جي هر سطح تي مدد ڪئي پر افغانستان جي عبوري حڪومت وعدن تي عملدرآمد اڃا تائين ناهي ڪيو، ٺوس شاهديون موجود آهن. ٽي ٽي پي جا دهشتگرد افغان سرزمين استعمال ڪري رهيا آهن. هڪ سوال جي جواب ۾ پاڪ فوج جي ترجمان چيو ته 9 مئي صرف پاڪ فوج جو ڪيس ناهي، هي سڄي پاڪستان جي عوام جو ڪيس آهي، ڪنهن به ملڪ ۾ ان جي فوج تي حملو ڪرايو وڃي، شهيدن جي يادگارن کي نقصان پهچايو وڃي، باني جي گهر کي ساڙيو وڃي، عوام ۽ فوج ۾ نفرت پيدا ڪئي وڃي ۽ اهو جيڪي ماڻهو ڪرائي رهيا آهن ۽ ڪري رهيا آهن انهن کي ڪيفر ڪردار تائين نه پهچايو وڃي، ڪنهن به ملڪ ۾ ائين ٿئي ته اُتي جي انصاف جي نظام تي سوال اُٿندو آهي. هن وڌيڪ چيو ته پاڪستان جزا ۽ سزا جي نظام تي يقين رکي ٿو، 9 مئي جو سانحو ڪندڙ ۽ ڪرائيندڙن کي آئين مطابق سزا ڏيڻي پوندي. اسان سڀني پنهنجي اکين سان اهو واقعو ٿيندي ڏٺو، اسان سڀني ڏٺو ته ڪهڙيءَ طرح سان ماڻهن جي ذهن سازي ڪئي وئي، فوج، ايجنسين ۽ ادارن خلاف ماڻهن جا ذهن ٺاهيا ويا، اسان ڏٺو ته ڪهڙيءَ طرح ڪجهه سياسي ليڊرن چونڊي چونڊي ٻُڌايو ته هتي حملو ڪريو، اسان ڏٺو صرف فوجي ٺڪاڻن تي حملا ڪرايا ويا، جڏهن اهي شاهديون ۽ سموريون شيون سامهون آيون ته عوام جو غصو ۽ ردعمل به توهان ڏٺو، توهان ڏٺو عوام ڪهڙيءَ طرح انتشاري ٽولي کان پوئتي هٽي، جڏهن کُلي ڪري سامهون اچي ويو ته پروپيگنڊا شروع ڪئي وئي ته اهو فالس فليگ آپريشن آهي. هڪ ٻئي سوال جي جواب ۾ هن چيو ته چيو ويندو آهي ته جوڊيشل ڪميشن بڻائي وڃي، جوڊيشل ڪميشن تي ان شيءِ تي ٺهندي آهي جنهن تي ڪو ابهام هجي، هي واقعو ته تاريخ تي آهي ۽ توهان جي سامهون آهي ۽ بلڪل واضح آهي، اهو به واضح آهي ته ڪهڙيءَ طرح ذهن سازي ڪئي وئي ۽ ڪهڙيءَ طرح هدف بڻايا ويا، ان تي به چيو ويو ته جوڊيشل ڪميشن ٺاهي ڇڏيو ته خبر پئجي سگهي ته اهو حملو ٿيو يا نه، اسان ڪميشن لاءِ تيار آهيون پر ڪميشن گهرائيءَ تائين وڃي، ڪميشن اهو احاطو ڪري ته 2014ع جي ڌرڻي جا ڪهڙا مقصد هئا؟ پارليامينٽ، پي ٽي وي تي حملي جو احاطو ڪري، ڪهڙيءَ طرح ماڻهن کي اها ترغيب ڏني وئي ته هو رياست خلاف بيهن، سول نافرماني ڪن، بجليءَ جا بل ساڙين، ڪهڙيءَ طرح 2016ع ۾ ڪي پي ڪي جي وسيلن سان گاديءَ واري شهر تي حملو ڪيو ويو. جوڊيشل ڪميشن ان ڳالهه جو احاطو ڪري، هو اهو به ڏسي آءِ ايم ايف کي ڪهڙيءَ طرح خط لکيا ويا، لابنگ ڪئي وئي ته پاڪستان جو ڏيوالو ٿيڻ ڏنو وڃي ان کي پئسا نه ڏيو، ڪميشن احاطو ڪري ته ڪٿان کان فنڊنگ اچي رهي هئي ۽ ڪيڏانهن وڃي رهي هئي، ڪهڙا ماڻهو هئا جيڪي سوشل ميڊيا تي ادارن خلاف نفرت ڦهلائي رهيا هئا، جيڪڏهن اسان انهن شين جو احاطو نه ڪيو ته 9 مئي ته ٿيڻو هو. هن چيو ته هڪ مخصوص گروهه اهو سڄو ڪم ڪندو رهندو ته هڪ ڏينهن هو پنهنجي فوج سان مهاڏو اٽڪائيندو، اوهان آڏو اهو سڀ ڪجهه ٿيو، جڏهن هو ڪوڙ ڳالهائي ۽ ڪوڙ ڳالهائيندو وڃي اوهان ان جي ڪوڙ اڳيان سچ نه ڳالهايو ته هو هر طرح جي پروپيگنڊا ڪندو. 9 مئي جي اصل حقيقت آهي ته سياسي ٽولو ڪنهن جي چوڻ تي هيستائين پهتو، هن پنهنجي فوج ۽ اداري تي حملو ڪري ڇڏيو. پاڪستان جي باشعور عوام 9 مئي تي بيٺل ان ٽولي کان پوئتي هٽي وئي، هن پاڻ کي ان انتشاري ٽولي کان پاسي تي ڪري ڇڏيو، ان جي انڪاري ۽ مذمت ڪئي. جڏهن عوامي ردعمل ڏٺو ويو ته ٻيو ڪوڙ فالس فليگ آپريشن جو ڳالهايو ويو ته اسان پاڻ مظلوم آهيون. هن چيو ته ان ڳالهه جي اجازت نٿي ڏئي سگهجي ته ان عوام کي ايترو بيوقوف سمجهيو وڃي، جيڪڏهن 9 مئي ڪندڙن ۽ ڪرائيندڙن کي قانون مطابق سز ا نه ڏني وئي ته ڪنهن جي به جان، مال ۽ عزت محفوظ نه رهندي. جزا ۽ سزا تي يقين رکڻ لاءِ ضروري آهي ته 9 مئي جي جوابدارن کي قانون ۽ آئين مطابق سزا ڏيون ۽ جلد کان جلد کان ڏيون. ميجر جنرل احمد شريف چيو ته جيڪا پاڪستان جي فوج آهي اها قومي فوجي آهي، ان جي اندر زندگيءَ جي سمورن شعبن سان تعلق رکندڙ ماڻهو آهن ۽ ان ۾ هر رنگ ۽ نسل جا ماڻهو آهن ان جي ڪابه سياسي سوچ ناهي هوندي. اسان پارلياماني جمهوري نظام ۾ آهيون هر حڪومت وقت سان فوج جو هڪ غير سياسي پر آئيني ۽ قانوني تعلق هوندو آهي، اسان لاءِ سموريون سياسي سوچون، سياسي پارٽيون ۽ سياسي اڳواڻ قابل احترام آهن، جيڪڏهن ڪا سياسي سوچ يا ليڊر يا ٽولو پنهنجي فوج تي حملي آور ٿئي، عوام ۽ فوج وچ ۾ نفرت ۽ ويڇا پيدا ڪري، قوم جي شهيدن جي بي حرمتي ڪري، فوج خلاف پروپيگنڊا ڪري ته ان سان ڪابه ڳالهه ٻولهه نه ڪئي ويندي، اهڙن سياسي انتشاري ٽولي لاءِ هڪ رستو آهي اهو قوم آڏو سچي دل سان معافي گُهري، وعدو ڪري ته هو نفرت بجاءِ تعميري سياست ۾ حصو وٺي، جڏهن ته ڳالهيون سياسي پارٽين کي پاڻ ۾ زيب ڏينديون آهن، ان ۾ فوج يا اداري جو هجڻ مناسب ناهي.
