اسلام آباد – 23 – جنوري (اي پي پي) وزيراعظم محمد شهباز شريف چيو آهي ته حڪومت ميڊيا جي تعميري تنقيد جي آجيان ڪري ٿي، حڪومتي پاليسين تي تعميري تنقيد گورننس جي بهتري جي لاءِ تمام ضروري آهي. اهڙن خيالن جو اظهار هن پاڪستان براڊ ڪاسٽرز ايسوسيئيشن جي وفد سان ڳالهائيندي ڪيو جنهن ساڻس ملاقات ڪئي. وزيراعظم آفيس جي ميڊيا ونگ پاران جاري بيان موجب وزيراعظم وفد سان ڳالهائيندي چيو ته حڪومت ۽ ميڊيا جو گڏيل اعتماد جو رشتو آهي، حڪومتي پاليسين تي ميڊيا جي تعميري تنقيد گورننس جي بهتري جي لاءِ تمام ضروري آهي، حڪومت ميڊيا جي تعميري تنقيد جي آجيان ڪري ٿي، ملڪ ۾ اظهار راءِ جي مڪمل آزادي آهي ۽ حڪومت ميڊيا جي رياست جو چوٿون ٿنڀ هجڻ تي يقين رکي ٿي. وزيراعظم چيو ته اڏار پاڪستان مقامي طور تي تيار ڪيل ملڪي ترقي جو منصوبو آهي جنهن کي ميڊيا ۽ سمورين ڌرين جي تعاون سان ڪامياب بڻائينداسين، الله جي فضل ۽ ڪرم سان ملڪي استحڪام کانپوءِ پاڪستان جي ترقي جي رفتار 2018ع تي جتي روڪي وئي هئي اتان ٻيهر شروع ٿي چڪي آهي. پاڪستان ميان محمد نواز شريف جي قيادت ۾ ترقي جو سنهري دور ڏٺو ۽ اڄ به ان جي قيادت ۾ معاشي استحڪام کانپوءِ ترقي جو سفر جاري آهي. وزيراعظم چيو ته دوست ۽ ڀائر ملڪن جا انتهائي ٿورائتا آهيون، انهن جي تعاون سان پاڪستان ڊيفالٽ کان واپس اچي معاشي ترقي طرف گامزن ٿيو. هن چيو ته ملڪ ۾ مهانگائي جي شرح ۽ وياج جي شرح ۾ خاطرخواهه گهٽتائي ٿو ڪريڊٽ معاشي ٽيم جي محنت ڏانهن وڃي ٿو، روانگي واپار ۾ اضافي، صنعتي ۽ زرعي شعبي جي ترقي حڪومت جي ڪاروبار دوست پاليسين جي ڪري حاصل ٿي رهي آهي ۽ ايف بي آر ۾ سڌارن جو لاڳو ۽ مڪمل ڊيجيٽائيزيشن تي ڪم تيزي سان جاري آهي. ڪسٽمز جي نظام جي بهتري جي لاءِ فيس ليس اسيسمنٽ جو نظام شروع ڪيو ويو آهي، ان نظام سان اوڳاڙين ۾ اضافي سان گڏوگڏ شفافيت ۾ اضافي ۽ ڪرپشن جي خاتمي ۾ مدد ملندي. وزيراعظم چيو ته پيٽروليم مصنوعات، کنڊ، ڀاڻ ۽ اٽو وغيره جي اسمگلنگ جي روڪٿام سان قومي خزاني کي فائدو ٿيندو. مٽاسٽا جي ناڻي ۾ اضافو ٻاهرئين ملڪ رهندڙ پاڪستانين جي حڪومتي پاليسين تي اعتماد ۾ اضافي جو عڪاس آهي. وزيراعظم چيو ته دوست ملڪن سان لاڳاپن ۾ اضافي ۽ سفارتي محاذ تي ڪاميابين جو سلسلو جاري آهي، الله جي فضل ۽ ڪرم سان پاڪستان جو عالمي منظرنامي تي تشخص بحال ڪيو. وزيراعظم چيو ته دهشتگردي جي خلاف جنگ ۾ پوري قوم قرباني ڏني، پاڪ فوج سميت پوري قوم ان لعنت جي ملڪ مان مڪمل خاتمي تائين ان جي خلاف جنگ جاري رکندي. وزيراعظم چيو ته چين پاڪستان اقتصادي لنگهه جا ثمر ملڻ شروع ٿي ويا آهن، ميان محمد نواز شريف ۽ چيني صدر شي جن پنگ جو پاڪستان ۽ خطي جي ترقي جو خواب تعبير جي بلڪل ويجهو آهي، حڪومت سي پيڪ جي منصوبن جي جلد تڪميل جي لاءِ ڏينهن رات ڪوششون ڪري رهي آهي. هن چيو ته پاڪستان جي ڊيفالٽ جا خواب ڏسندڙ ملڪ دشمن مخصوص ٽولو بار بار اسلام آباد تي چڙهائي جي ڪوشش ڪري ٿو، اهڙن عنصرن کي پاڪستان جو معاشي استحڪام ۽ ترقي هضم ڪرڻ مشڪل ٿي رهيو آهي. هن چيو ته اسان پاڪستان جي معاشي سلامتي جي لاءِ پنهنجي سياست جي قرباني ڏني، ملڪ جي ترقي جي لاءِ ڏينهن رات مصروف عمل رهنداسين. هن باصلاحيت نوجوانن ۽ افرادي قوت کي پاڪستان جو سڀ کان وڏو اثاثو قرار ڏيندي چيو ته نوجوانن کي عالمي معيار جي تعليم ۽ تربيت جون سهولتون ۽ هڪ جهڙي ترقي جا موقعا فراهم ڪرڻ اسان جي اولين ترجيحن ۾ شامل آهي. وفد جي شرڪت ڪندڙن معاشي انگن اکرن ۾ بهتري کي خوش آئنده قرار ڏيندي چيو ته ميڊيا ملڪي ترقي ۽ گورننس جي بهتري ۾ پنهنجو مثبت ڪردار ادا ڪندي رهندي. وفد بجلي جي قيمتن کي گهٽ ڪرڻ ۽ بجلي جي شعبي ۾ سڌارن جي لاءِ آءِ پي پيز سان حڪومتي معاملن کي خوش اسلوبي سان طئي ڪرڻ تي وزيراعظم جي ڪوششن کي ساراهيو. وفد جي ميمبرن چيو ته ملڪ کي سياسي استحڪام جي ضرورت آهي، حڪومت ان ڏس ۾ پنهنجو مثبت ڪردار ادا ڪري. ان موقعي تي اطلاعات ۽ نشريات وارو وفاقي وزير عطاءُ الله تارڙ، اطلاعات واري وزارت جا اعليٰ آفيسر، پاڪستان براڊ ڪاسٽرز ايسوسيئيشن جو چيئرمين ميان عامر محمود، مير ابراهيم، ناز آفرين سهگل، سلطان لاکاڻي، سلمان اقبال، شڪيل مسعود، نديم ملڪ ۽ ڪاظم خان موجود هئا.
