گڏيل قومون-22 آڪٽوبر (اي پي پي) روس يوڪرين جي نيٽو ۾ شموليت کي پنھنجي لاءِ نه قبولڻ جوڳو قرار ڏنو آھي. پرڏيھي رپورٽ مطابق گڏيل قومن ۾ روس جي مستقل نمائندي واسيلي نيبنز چيو آھي ته ڪنھن به علائقائي ترتيب ۾ نيٽو ۾ يوڪرين جي شموليت روس لاءِ قطعي طور قبولڻ جوڳي نه آھي. اولھه جي ملڪن جي درخواست تي يوڪرين جي صورتحال تي غور ڪرڻ لاءِ سڏايل گڏيل قومن جي سلامتي ڪائونسل جي اجلاس کي خطاب ڪندي روس جي سفير چيو آھي ته يوڪرين جي نيٽو ۾ شموليت کي ڪنھن به امن منصوبي يا ٽياڪڙي جي قدمن جو حصو نه ٿا بڻائي سگھون. ھن چيو ته روس جي سلامتي کي درپش خطرا يوڪرين جي فوجي طاقت کي ختم ڪرڻ بنان ۽ ان کي غير فعال ڪرڻ بنان ختم نٿا ڪري سگھجن.
