اسلام آباد – 11 آڪٽوبر (اي پي پي) ترڪي ڪشمير ڪاز لاءِ پنهنجي مضبوط ۽ روايتي حمايت جو ورجاءُ ڪندي چيو آهي ته ڪشمير مسئلي جو حل نه ٿيڻ افسوسناڪ آهي ۽ ان سان خطي ۾ امن ۽ استحڪام تي منفي اثر پوندا. ڪالهه اڱاري ڏينهن جاري پريس رليز موجب ترڪي جي دوري تي ويل ڪشمير مسئلي بابت وزيراعظم جي خصوصي نمائندن محمد پرويز ملڪ ۽ محسن شاهنواز رانجها ترڪي جي پارلياماني قيادت، ميڊيا، سول سوسائٽي ۽ ٿنڪ ٽينڪس سان ملاقاتون ڪيون ۽ کين والاريل ڪشمير ۾ ڀارتي ظلمن ۽ اتي ٿيندڙ انساني حقن جي خلاف ورزين کان آگاهه ڪيو. خصوصي نمائندن ترڪ گرينڊ نيشنل اسيمبلي (ٽي جي اين اي) جي اسپيڪر به ملاقات ڪئي ۽ کين والاريل ڪشمير جي صورتحال تي بريفنگ ڏني.
